ନିର୍ଭୀକ ରାଷ୍ଟ୍ରପତି

ୟୁକ୍ରେନ୍‌ ଉପରେ ରୁଷିଆର ଆକ୍ରମଣ ବିଶ୍ୱ ଭୂରାଜନୈତିକ ସ୍ଥିତିରେ ଏବେ ଭୂକମ୍ପନ ସୃଷ୍ଟି କରିଛି। ୟୁକ୍ରେନ୍‌ ପଛରେ ଆମେରିକା ଓ ନର୍ଥ ଆଟ୍‌ଲାଣ୍ଟିକ୍‌ ଟ୍ରିଟି ଅର୍ଗାନାଇଜେଶନ (ନାଟୋ)ର ସମର୍ଥନ ରହିଥିବା ବିଷୟ ଦୀର୍ଘ ଦିନ ହେବ ଆଲୋଚନା ହୋଇଆସୁଥିଲା। ସେଥିପାଇଁ ବିଶ୍ୱବାସୀ ଆଶ୍ୱସ୍ତ ଥିଲେ ଯେ ରୁଷିଆ ଓ ୟୁକ୍ରେନ୍‌ ଯୁଦ୍ଧ କେବଳ ରଣହୁଙ୍କାର ଦେଇ ଚାଲୁଥିବ। କାରଣ ରୁଷିଆ ତା’ ବିପକ୍ଷରେ ଦୃଶ୍ୟମାନ ହେଉଥିବା ଶକ୍ତିସମୂହ ସହିତ ଲଢ଼ିବାକୁ ଚାହିଁବ ନାହିଁ। କିନ୍ତୁ ସମୟ ବିଗିଡ଼ିଗଲା। ଯୁକ୍ରେନ୍‌ ଓ ରୁଷିଆ ମଧ୍ୟରେ ତିକ୍ତତା ବଢ଼ିଗଲା ପରେ କିଏ ପ୍ରକୃତରେ ତା’ ଶତ୍ରୁ ରାଷ୍ଟ୍ରକୁ ସାହାଯ୍ୟ କରୁଛି ତାହା ଜାଣିବା ପାଇଁ ମସ୍କୋ ଆକଳନ କରିବାକୁ ଲାଗିଲା। ତା’ ଗୋଇନ୍ଦା ସୂଚନାକୁ ଭିତ୍ତିକରି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍‌ ସମ୍ଭବତଃ ଜାଣିଗଲେ ଯେ, ୟୁକ୍ରେନ୍‌କୁ ସହଯୋଗ କରିବାକୁ ଆମେରିକା ଓ ନାଟେ ଆଗେଇ ଆସିବେ ନାହିଁ। ଫଳସ୍ବରୂପ ୨୪ ଫେବୃୟାରୀ ୨୦୨୨ରେ ରୁଷିଆର ୟୁକ୍ରେନ ଆକ୍ରମଣ ଆରମ୍ଭ ହୋଇଗଲା। ଦୁଇ ଦିନ ଘମାଘୋଟ ଲଢ଼େଇ ପରେ ୟୁକ୍ରେନ୍‌ ସେନା ରୁଷିଆ ନିକଟରେ ଆତ୍ମସମର୍ପଣ କଲେ ଆଲୋଚନା ହୋଇପାରେ ବୋଲି ପୁଟିନ୍‌ କହିଥିଲେ। ହେଲେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନ୍‌ସ୍କି ନୁଣ୍ଡ ନୁଆଁଇବାକୁ ମନା କରିଦେବା ପରେ ଏବେ ତାଙ୍କ ବ୍ୟକ୍ତିତ୍ୱ ଓ ସାହସିକ ପଦକ୍ଷେପ ବିଶ୍ୱବ୍ୟାପୀ ଚର୍ଚ୍ଚାର ବିଷୟ ପାଲଟିଛି।
ଜେଲେନ୍‌ସ୍କି ୨୫ ଜାନୁୟାରୀ ୧୯୭୮ରେ ୟୁକ୍ରେନ୍‌ର କ୍ରିଭି ରିହଠାରେ ଜନ୍ମଗ୍ରହଣ କରିଥିଲେ। ତାଙ୍କ ମାତାପିତା ଥିଲେ ଇହୁଦୀ। ୟୁକ୍ରେନ୍‌ ଓ ଇଂଲିଶ ଭାଷାରେ ଦକ୍ଷ ଥିବା ଜେଲେନ୍‌ସ୍କି ୧୯୯୫ରେ କ୍ରିଭି ରିହ ଇକୋନୋମିକ୍‌ ଇନ୍‌ଷ୍ଟିଚ୍ୟୁଟ୍‌ରୁ ଆଇନରେ ଡିଗ୍ରୀ ଅର୍ଜନ କରିଥିଲେ। ଆଇନ ବ୍ୟବସାୟ କରିବା ଲାଗି ସେ ଲାଇସେନ୍ସ ବାହାର କରିଦେଇଥିଲେ ମଧ୍ୟ ଭାଗ୍ୟ ତାଙ୍କ ପାଇଁ ନୂଆ ଉପହାର ସାଇତି ରଖିଥିଲା। ଜେଲେନସ୍କି ପିଲାବେଳୁ ଅଭିନୟ ପ୍ରତି ଆକର୍ଷିତ ଥିବାରୁ ସେ ସେହି ଦିଗରେ ଉତ୍କର୍ଷ କରିବେ ବୋଲି ପରିବାରବର୍ଗ ଭାବିଥିଲେ। ଛାତ୍ରାବସ୍ଥାରେ ସେ ଥିଏଟରରେ ସକ୍ରିୟ ଅଂଶ ଗ୍ରହଣ କରିଥିଲେ। ୧୯୯୭ରେ ସେ ‘କେଭାର୍ଟାଲ ୯୫’ ନାମରେ ଏକ ପର୍ଫମାନ୍ସ ଗ୍ରୁପ୍‌ ଗଢ଼ିଥିଲେ। ତାଙ୍କ ଅଭିନୀତ କମେଡି ଶୋ’ ‘କେଭିଏନ୍‌’ ରୁଷୀୟ ଟେଲିଭିଜନରେ ଲୋକପ୍ରିୟତା ଅର୍ଜନ କରିବା ପରେ ସେ ଅଧିକ ଉତ୍ସାହିତ ହୋଇଯାଇଥିଲେ। ୨୦୦୩ ଯାଏ ସେହି ଶୋ’ ଚାଲିଲା। ସେହିବର୍ଷ ଜେଲେନ୍‌ସ୍କି ‘ଷ୍ଟୁଡିଓ କେଭାର୍ଟାଲ ୯୫’ ନାମରେ ମନୋରଞ୍ଜନ କମ୍ପାନୀ ଗଢ଼ି ତା’ର ସହ-ପ୍ରତିଷ୍ଠାତା ହୋଇଥିଲେ। ପରେ ତା’ର ଆର୍ଟିଷ୍ଟିକ୍‌ ଡାଇରେକ୍ଟର ହୋଇ ସେ ଯେଉଁ ନୂଆ ଧରଣର ମନୋରଞ୍ଜନ ଦର୍ଶକଙ୍କୁ ଦେଇଚାଲିଲେ, ତାହା ଦ୍ୱାରା ଉକ୍ତ କମ୍ପାନୀ ବେଶ୍‌ ସଫଳତା ଅର୍ଜନ କଲା। ପରବର୍ତ୍ତୀ ସମୟରେ ସେ ୟୁକ୍ରେନୀୟ ଟେଲିଭିଜନ ଚ୍ୟାନେଲ ‘ଇଣ୍ଟର ଟିଭି’ର ଜେନେରାଲ ପ୍ରଡୁସର ଭଳି ଶୀର୍ଷ ପଦବୀରେ ବସିପାରିଥିଲେ। ୨୦୧୨ରେ ଜେଲେନ୍‌ସ୍କି ଇଣ୍ଟର ଟିଭି ଛାଡ଼ିଦେଇଥିଲେ। ତେବେ ଏହି ସମୟ ମଧ୍ୟରେ ସେ କେତେକ ଫିଚର ଫିଲ୍ମରେ ଅଭିନୟ କରି ପ୍ରଶଂସା ସାଉଁଟି ଥିଲେ। ୨୦୧୩ରେ ତାଙ୍କ କ୍ୟାରିୟର ନୂଆ ମୋଡ଼ ନେଇଥିଲା। ସେ କେଭାର୍ଟାଲ ୯୫ର ଆର୍ଟିଷ୍ଟିକ୍‌ ଡାଇରେକ୍ଟର ହେବା ସହ ୟୁକ୍ରେନ୍‌ ରାଜନୀତିରେ ପାଦ ଦେଇଥିଲେ। ୨୦୧୪ରେ ୟୁକ୍ରେନ୍‌ ରାଜନୀତିରେ ଭୂକମ୍ପ ସୃଷ୍ଟି ହୋଇଥିଲା। ତତ୍‌କାଳୀନ ରାଷ୍ଟ୍ରପତି ଭିକ୍ଟୋର ୟାନୁକୋଭିଚିଙ୍କ ବିରୋଧରେ ଦେଶବ୍ୟାପୀ ପ୍ରତିବାଦ ହେବାରୁ ତାଙ୍କୁ ପଦବୀ ହରାଇବାକୁ ପଡ଼ିଥିଲା। ସେହି ବର୍ଷ ମେ’ରେ ବିଲିୟନେୟାର ପେଟ୍ରୋ ପୋରେଶେଙ୍କୋ ୟୁକ୍ରେନ୍‌ର ରାଷ୍ଟ୍ରପତି ନିର୍ବାଚିତ ହୋଇଥିଲେ। ହେଲେ ରୁଷିଆ ସମର୍ଥିତ ବିଦ୍ରୋହୀମାନେ ପୂର୍ବ ୟୁକ୍ରେନ୍‌ରେ ସକ୍ରିୟ ହେବା ଓ ଦେଶର ଅର୍ଥନୀତି ଦୁର୍ବଳ ହେବାରୁ ତାହାକୁ ସେ ସମ୍ଭାଳିବାରେ ସକ୍ଷମ ହେଲେ ନାହିଁ। ଦେଶର ରାଜନୈତିକ ସ୍ଥିତିକୁ ନେଇ କେଭାର୍ଟାଲ ୯୫ ଦ୍ୱାରା ୨୦୧୫ ଅକ୍ଟୋବରରେ ଜେଲେନ୍‌ସ୍କିଙ୍କ ପରିକଳ୍ପିତ ୟୁକ୍ରେନୀୟ ରାଜନୈତିକ ବିଦ୍ରୂପକାରୀ କମେଡି ଟେଲିଭିଜନ୍‌ ସିରିଜ୍‌ ‘ସର୍ଭେଣ୍ଟ ଅଫ୍‌ ପିପୁଲ’ ଯେତେବେଳେ ପ୍ରସାରିତ ହେଲା ସେତେବେଳେ ତାଙ୍କ ଲୋକପ୍ରିୟତା ଆହୁରି ବଢ଼ିଗଲା। ଏହି ସୁଯୋଗ ତାଙ୍କୁ ସମ୍ପୂର୍ଣ୍ଣ ରାଜନୀତିରେ ସାମିଲ ହେବାକୁ ମଧ୍ୟ ବାଟ ଦେଖାଇଦେଲା। ସେ ସର୍ଭେଣ୍ଟ ଅଫ୍‌ ପିପୁଲକୁ ରାଜନୈତିକ ପାର୍ଟି ଭାବେ ଦେଶରେ ପଞ୍ଜୀକୃତ କରିଦେଲେ। ଭାଗ୍ୟଦେବୀ ଜେଲେନ୍‌ସ୍କିଙ୍କୁ ସହାୟକ ହେଲେ। ୨୦୧୯ ରାଷ୍ଟ୍ରପତି ନିର୍ବାଚନରେ ତାଙ୍କ ପ୍ରଚାର ଶୈଳୀ ଅନ୍ୟମାନଙ୍କଠାରୁ ମଧ୍ୟ ନିଆରା ହେଲା। ଦେଶକୁ ଏକତା ସୂତ୍ରରେ ବାନ୍ଧି ରଖିବା ଲାଗି ତାଙ୍କ କ୍ଷୁଦ୍ର ଭାଷଣ ଓ କମେଡି ଭିଡିଓ ୟୁଟ୍ୟୁବ୍‌ ଓ ଇନ୍‌ଷ୍ଟାଗ୍ରାମ୍‌ରେ ଛାଇଗଲା। ଶେଷରେ ସେ ୨୧ ଏପ୍ରିଲ ୨୦୧୯ରେ ୟୁକ୍ରେନ୍‌ର ରାଷ୍ଟ୍ରପତି ନିର୍ବାଚିତ ହୋଇଥିଲେ। ୨୦ ମେ’ରେ ସେ ଦାୟିତ୍ୱ ଗ୍ରହଣ କଲେ।
ଅଭିନେତାରୁ ରାଜନେତା ପାଲଟିଥିବା ଜେଲେନ୍‌ସ୍କିଙ୍କ ଅନେକ ପଦକ୍ଷେପ ଦେଶବାସୀଙ୍କୁ ସୁହାଇଥିଲା। ଅପରପକ୍ଷରେ ତାଙ୍କ ଗତିବିଧିକୁ ରୁଷିଆ ରାଷ୍ଟ୍ରପତି ପୁଟିନ୍‌ ସହ୍ୟ କରିପାରି ନ ଥିଲେ। କ୍ୱିଭ୍‌ ଉପରେ ରୁଷିଆ ବିଭିନ୍ନ ଦିଗରୁ କର୍ତ୍ତୃତ୍ୱ ଜାହିର କରିବାରୁ ଜେଲେନସ୍କି ତାହାକୁ ବିରୋଧ କରିଥିଲେ। ଏବେ ଯୁଦ୍ଧ ଶୀର୍ଷରେ ପହଞ୍ଚତ୍ଥିବା ବେଳେ ନା ନାଟୋ ନା ଆମେରିକା ଜେଲେନ୍‌ସ୍କିଙ୍କ ୟୁକ୍ରେନ୍‌କୁ ସୁରକ୍ଷା ଦେବାକୁ ସମର୍ଥ ହେଲେ! ତଥାପି ଦମ୍ଭ ଧରି ବିଶ୍ୱର ଅନ୍ୟତମ କ୍ଷମତାଶାଳୀ ତଥା ସମ୍ବଳ ଓ ସାମର୍ଥ୍ୟ ଦୃଷ୍ଟିରୁ ଭାରି ବୋଲି ଜଗତ ଜାଣିଥିବା ରୁଷିଆ ଆଗରେ ଏ ଯାଏ ଜେଲେନ୍‌ସ୍କି ମୁଣ୍ଡ ନୁଆଁଇ ନ ଥିବାରୁ ତାଙ୍କ ବ୍ୟକ୍ତିତ୍ୱ ପୁଟିନ୍‌ଙ୍କ ବିଶାଳ ପଦକ୍ଷେପକୁ ନୂ୍ୟନ କରିଦେଇଛି ବୋଲି କୁହାଯାଇପାରେ।
-ଜିତେନ୍ଦ୍ର କୁମାର ନାୟକ


Enter your email to get our daily news in your inbox.

All Right Reserved By Dharitri.Com

ଏଇ ଭାରତରେ

ପିଲାମାନେ ଟଙ୍କାଟିଏ ପାଇଲେ ବଜାରରୁ ବିସ୍କୁଟ କି ଚକୋଲେଟ କିଣିଦିଅନ୍ତି। କିନ୍ତୁ ଏମିତି ପିଲା ଅଛନ୍ତି ଯେଉଁମାନେ ତାଙ୍କ ପକେଟ୍‌ ଖର୍ଚ୍ଚ ସଞ୍ଚୟ କରି ଚଳାଉଛନ୍ତି...

ଶିଶୁ ଓ ସାଇବର ଅପରାଧ

ଘାସିରାମ ପଣ୍ଡା ଇଣ୍ଟରନେଟ ବ୍ୟବହାର ବର୍ତ୍ତମାନର ଏକ ଆବଶ୍ୟକତା ହୋଇଗଲାଣି। ସବୁ ବର୍ଗର ଲୋକେ ଭିନ୍ନ ଭିନ୍ନ କାରଣ ପାଇଁ ଏହାକୁ ବ୍ୟବହାର କରୁଛନ୍ତି। ପିଲାମାନେ...

ସେବିର ସର୍ବେସର୍ବା

ନ୍ୟାଶନାଲ ଷ୍ଟକ୍‌ ଏକ୍ସଚେଞ୍ଜ(ଏନ୍‌ଏସ୍‌ଇ) ପରିଚାଳନା ନିର୍ଦ୍ଦେଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପଦବୀରେ ରହିଥିବା ବେଳେ ଚିତ୍ରା ରାମକ୍ରିଷ୍ଣ ହିମାଳୟର ଜଣେ ଯୋଗୀଙ୍କ ସହ ବାରମ୍ବାର...

ସାମ୍ବାଦିକରୁ ସାହିତ୍ୟିକ

ବ୍ୟକ୍ତିତ୍ୱ/ଶିବ ପ୍ରସାଦ ପୁହାଣ ସାଧନାର ସ୍ବାଦ ସେ ହିଁ ପ୍ରାପ୍ତ କରନ୍ତି ଯେତେେବେଳ ସମାଜ ଦିଏ ତାଙ୍କୁ ଏକ ସ୍ବତନ୍ତ୍ର ସ୍ବୀକୃତି। ସେହି ସ୍ବୀକୃତି ପ୍ରେରଣା...

ଏକ ନୀରବ ବିପ୍ଳବ

ସୁଧିରାଜ ରାଉତ ଆମ ଗାଁ ସ୍କୁଲ୍‌କୁ ଦୂର ଗ୍ରାମଗୁଡ଼ିକରୁ ପିଲାମାନେ ପଢ଼ିବାକୁ ଆସୁଥିଲେ। ସେମାନଙ୍କ ଗ୍ରାମରେ ସ୍କୁଲ୍‌, ଭଲ ସ୍କୁଲ୍‌ ଥିବା ସତ୍ତ୍ୱେ ଅଭିିଭାବକମାନେ ଆମ...

ଅଧିକ ମଦ ପିଆଇବେ

ଓଡ଼ିଶା ବିଧାନସଭାରେ ୧୨ ଜୁଲାଇ ୨୦୧୯ରେ ଉପସ୍ଥାପିତ ଅବକାରୀ ବିଭାଗ ଷ୍ଟାଣ୍ଡିଂ କମିଟିର ସୁପାରିସ ଅନୁଯାୟୀ ରାଜ୍ୟରେ ଅଧିକ ମଦ ବିକ୍ରି ପାଇଁ ବ୍ୟବସ୍ଥା କରାଯିବା...

ତିନି ତୁଣ୍ଡରେ ଛେଳି କୁକୁର

ଅକ୍ଷୟ କୁମାର ମିଶ୍ର   ସର୍ବବୃହତ୍‌ ଗଣତାନ୍ତ୍ରିକ ରାଷ୍ଟ୍ର ଭାବରେ ଆମ ଦେଶ ଭାରତ ବିଶ୍ୱ ଦରବାରରେ ସୁଖ୍ୟାତି ଅର୍ଜନ କରିଛି ବୋଲି ସବୁଠି ପ୍ରଚାର...

ଏଇ ଭାରତରେ

ପୁଣେର ଝିଅ ଶାଲ୍‌ମଲି ନଳାଓ୍ବାଡେଙ୍କ ଦୃଢ଼ ଇଚ୍ଛାଶକ୍ତି ଆଗରେ ବୟସ ହାର ମାନିଛି। ବୟସ ୧୪, କିନ୍ତୁ ପୁଣେର ମୁଥା ନଦୀକୁ ସଫା କରିବା ଲାଗି...

Advertisement
Archives

Model This Week