ନୂଆଦିଲ୍ଲୀ,୨୦।୫: ଦିଲ୍ଲୀ ସୀମାରେ ଆନ୍ଦୋଳନ କରୁଥିବା କୃଷକ ପୁଣି ସରକାରଙ୍କୁ ଚେତାବନୀ ଦେଇଛନ୍ତି। ସଂଯୁକ୍ତ କୃଷକ ମୋର୍ଚ୍ଚା ପକ୍ଷରୁ କୁହାଯାଇଛି ଯେ, ସରକାର ଆମ କଥା ଶୁଣନ୍ତୁ ଏବଂ ଆମ ଧୈର୍ଯ୍ୟର ଆଉ ପରୀକ୍ଷା ନ ନିଅନ୍ତୁ। ଏହାସହ ପୁଣିଥରେ ୩ କୃଷି ଆଇନ୍ ଫେରାଇ ନେବାକୁ କୃଷକ ସଂଗଠନ ପକ୍ଷରୁ ଦାବି କରାଯାଇଛି। ତାଉକ୍ତାଏ ବାତ୍ୟା ଯୋଗୁ ଅଧିକାଂଶ ରାଜ୍ୟରେ ବର୍ଷା ହେଉଥିବାବେଳେ ଦିଲ୍ଲୀରେ ମଧ୍ୟ ଏହାର ପ୍ରଭାବ ପଡିଛି। ଏହାଦ୍ୱାରା ସୀମାରେ ଆନ୍ଦୋଳନ କରୁଥିବା କୃଷକମାନେ ନାହିଁ ନ ଥିବା ଅସୁବିଧାର ସାମ୍ନା କରିବାକୁ ପଡିଛି। ସଂଯୁକ୍ତ କୃଷକ ମୋର୍ଚ୍ଚା ଦେଇଥିବା ବିବୃତ୍ତିରେ କୁହାଯାଇଛି ଯେ, ସରକାର କୃଷକଙ୍କ ସହ ଅମାନବୀୟ ଆଚରଣ କରୁଛନ୍ତି। ସଂଗଠନ ପକ୍ଷରୁ କୁହାଯାଇଛି ଯେ, କୃଷକ ଆନ୍ଦୋଳନରେ ୪୭୦ରୁ ଅଧିକ ଚାଷୀଙ୍କ ମୃତ୍ୟୁ ଘଟିଛି। ଅନେକ ଆନ୍ଦୋଳନକାରୀଙ୍କୁ ସେମାନଙ୍କର ଚାକିରି, ପାଠପଢା ଏବଂ ଅନ୍ୟାନ୍ୟ ଚାକିରି ଛାଡ଼ିବାକୁ ପଡ଼ିଛି। ସରକାର କୃଷକଙ୍କ ସହ ଏପରି ଅମାନୁଷିକ ମନୋଭାବ ପ୍ରଦର୍ଶନ କରୁଛନ୍ତି। ଯଦି ସରକାର ଚାଷୀଙ୍କ କଲ୍ୟାଣ ଚାହୁଁଛନ୍ତି, ତେବେ ଏହା ଚାଷୀଙ୍କ ସହ କଥାବାର୍ତ୍ତା କରନ୍ତୁ ଏବଂ ସେମାନଙ୍କ ଦାବିକୁ ଗ୍ରହଣ କରନ୍ତୁ ବୋଲି କୃଷକ ସଂଗଠନ ଦାବି କରିଛି।
ସୂଚନାଯୋଗ୍ୟ, ସରକାରଙ୍କ ପକ୍ଷରୁ ଆଗତ ୩ କୃଷି ବିଲ୍କୁ ବିରୋଧ କରି ଗତବର୍ଷ ଡିସେମ୍ବରରୁ ଚାଷୀମାନେ ଆନ୍ଦୋଳନରେ ବସିଛନ୍ତି। ଏହି ସମୟ ମଧ୍ୟରେ ସରକାରଙ୍କ ସହ ଚାଷୀମାନେ ଆଲୋଜଚନା କରିଥିଲେ ମଧ୍ୟ କୌଣସି ନିଷ୍କର୍ଷ ମିଳିପାରି ନାହିଁ।
