ନୂଆଦିଲ୍ଲୀ,୩।୧୨: କୃଷି ଆଇନ ନେଇ ଅନ୍ନଦାତାଙ୍କ ଆନ୍ଦୋଳନ ତୀବ୍ରତର ହେବାରେ ଲାଗିଛି। ପଞ୍ଜାବ ଏବଂ ହରିୟାଣାର ଚାଷୀ ଦିଲ୍ଲୀ ମୁହାଁ ହୋଇଥିବାବେଳେ ସେମାନଙ୍କୁ ଦିଲ୍ଲୀରେ ପ୍ରବେଶ ନ କରାଇବା ଲାଗି ସୀମାକୁ ସିଲ୍ କରିଦିଆଯାଇଛି। ଫଳରେ ଚାଷୀମାନେ ଏନ୍ଏଚ୍-୯ ଅବରୋଧ କରି ଖରା କାକରରେ ଭୋକ ଉପାସରେ ବସି ରହିଛନ୍ତି। ଆନ୍ଦୋଳନ ପ୍ରତ୍ୟାହାର ଲାଗି କେନ୍ଦ୍ର ସରକାରଙ୍କ ପାଖରେ ଏବେ ୩ଟି ବିକଳ୍ପ ରହିଥିବା ଚର୍ଚ୍ଚା ହେଉଛି। ପ୍ରଥମ ବିକଳ୍ପ ହେଉଛି ସରକାର କୃଷି ଉତ୍ପାଦର ସର୍ବନିମ୍ନ ସହାୟକ ମୂଲ୍ୟ ନିଶ୍ଚିତ କରୁଥିବା ଆଇନ ପ୍ରଣୟଡ଼ କରିବା ଆବଶ୍ୟକ। ଏପରି ହେଲେ ଚାଷୀମାନେ ସର୍ବନିମ୍ନ ସହାୟକ ମୂଲ୍ୟ ପାଇବା କ୍ଷେତ୍ରରେ ଚିନ୍ତା କରିବେ ନାହିଁ। ସେହିପରି ଚାଷୀଙ୍କ ପାଇଁ ରିଟର୍ନ କ୍ଷେତ୍ରରେ ସରକାର ପଦକ୍ଷେପ ଗ୍ରହଣ କରିବା ଆବଶ୍ୟକ ବୋଲି ବିଶେଷଜ୍ଞ ମତପୋଷଣ କରିଛନ୍ତି। ସେହିପରି ଦ୍ୱିତୀୟରେ କେନ୍ଦ୍ର ସରକାରଙ୍କ ପକ୍ଷରୁ ପରାଳି ଜଳାଇବା ଲାଗି ଆଣି ଅଧ୍ୟାଦେଶ ଦ୍ୱାରା ଚାଷୀଙ୍କୁ ଏକ ବର୍ଷ ଜେଲ୍ ଏବଂ ଏକ କୋଟି ଟଙ୍କା ଜରିମାନା ଆଇନ ଆଣିଛନ୍ତି। ଦିଲ୍ଲୀରେ ହେଉଥିବା ବାୟୁପ୍ରଦୂଷଣକୁ ଦୃଷ୍ଟିରେ ରଖି ଏହା କରାଯାଇଛି। ମାତ୍ର ଏହାଦ୍ୱାରା ଚାଷୀଙ୍କ ମଧ୍ୟରେ ଏକଭାବନା ସୃଷ୍ଟି ହୋଇଛି ଯେ, ସରକାର ବଳ ପୂର୍ବକ ସବୁ କିଛି କରିବାକୁ ଚାହୁଁଛନ୍ତି। ପଞ୍ଜାବ ଏବଂ ହରିୟାଣା ଚାଷୀଙ୍କ ମଧ୍ୟରେ ଏଭଳି ମନୋଭାବ ଅଧିକ ସୃଷ୍ଟି ହୋଇଛି। ଚାଷୀ ଏକ କ୍ୱିଣ୍ଟାଲ ପରାଳି ପାଇଁ ୨ଶହ ଟଙ୍କା କ୍ଷତିପୂରଣ ଦାବି କରୁଛନ୍ତି। ଅପରପକ୍ଷରେ ସୁପ୍ରିମ୍କୋର୍ଟ ଏହାକୁ ଶହେ ଟଙ୍କା କରିବା ଲାଗି ସରକାରଙ୍କୁ ପରାମର୍ଶ ଦିଆଯାଇଛି। ଏହା ଉପରେ ବିଚାର କରିବା ଲାଗି କୋର୍ଟ କହିଛନ୍ତି। ଏକ୍ଷେତ୍ରରେ ସରକାର ରିହାତି ଯୋଜନା ଲାଗୁକଲେ ପଞ୍ଜାବ, ହରିୟାଣା ଏବଂ ଉତ୍ତରପ୍ରଦେଶର ଚାଷୀ ଉପକୃତ ହୋଇପାରିବେ। ତୃତୀୟରେ ସରକାରଙ୍କୁ ନୂଆ ବଜାର ଆଇନ ପ୍ରଣୟନ କରିବା ଉପରେ ଧ୍ୟାନ ଦେବାକୁ ପଡ଼ିବ ବୋଲି ବିଶେଷଜ୍ଞ ମତପୋଷଣ କରିଛନ୍ତି। ଏହା ଦ୍ୱାରା ମୁକ୍ତ ବଜାର ସ୍ଥାପନ ହେବା ସହିତ ବେପାରିଙ୍କୁ ଶୁଳ୍କ ଦେବାକୁ ପଡ଼ିବ ନାହିଁ। ଏହି ୩ ଟି ବିକଳ୍ପ ଉପରେ କେନ୍ଦ୍ର ସରକାର ଧ୍ୟାନ ଦେଲେ ହୁଏତ ଅନ୍ନଦାତାଙ୍କ ଆନ୍ଦୋଳନ ବନ୍ଦ ହୋଇପାରିବ ବୋଲି ବିଶେଷଜ୍ଞ ଆଶା ପ୍ରକାଶ କରିଛନ୍ତି।
