କୋକସରା,୭।୧୧(ଡି.ଏନ.ଏ.): ଧାନ ଫସଲରେ ଚକଡ଼ା ରୋଗ ଲାଗି ସବୁ ନଷ୍ଟ ହୋଇଯାଇଛି। ଏହି ଚିନ୍ତାରେ ମାନସିକ ଭାରସାମ୍ୟ ହରାଇ ଜଣେ ଚାଷୀ ନିଜ ଫସଲରେ ନିଆଁ ଲଗେଇ ଦେଇଥିବା ଜଣାପଡ଼ିଛି। ସୋମବାର ଏଭଳି ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲା କୋକସରା ବ୍ଲକ ବରାଡଙ୍ଗା ପଞ୍ଚାୟତର ସିଉନି ଗ୍ରାମରେ। ଏହି ଗ୍ରାମର ଜଣେ ଛୋଟ ଚାଷୀ ପୃଥିରାଜ ବେହେରା ନିଜ ୩ ଏକର ଚାଷ ଜମି ମଧ୍ୟରୁ ପ୍ରାୟ ୧ ଏକର ଚାଷ ଜମି ଚକଡ଼ା ରୋଗ ଲାଗି ସମ୍ପୂର୍ଣ୍ଣ ନଷ୍ଟ ହୋଇଛି। ଏହା ଦେଖି ମାନସିକ ଭାରସାମ୍ୟ ହରାଇ ନିଆଁ ଲଗାଇ ଦେଇଛନ୍ତି। ଏହି ଘଟଣା ଦେଖି ସ୍ଥାନୀୟ ବରାଡଙ୍ଗା ସମିତି ସଭ୍ୟ ଗୁପ୍ତେଶର ବାଗ, ପଞ୍ଚାୟତ କୃଷି କର୍ମଚାରୀ ଅଜିତ କୁମାର ସାହୁଙ୍କୁ ଖବର ଦେଇଥିଲେ। ଖବର ପାଇ ଘଟଣାସ୍ଥଳରେ ଜିଲା କୃଷି ଅଧିକାରୀ ଜେ. ସୂର୍ଯ୍ୟ ରାଓ, କୃଷି ଅଧିକାରୀ ହେମାନନ୍ଦ ମାଝି, ଅତିରିକ୍ତ ତହସିଲଦାର ମୋହନ ଚରଣ ଜେନା, ବିଡିଓ ଉତ୍ତମ କୁମାର ବାଗ, ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲ, ଆମପାଣି ଥାନାଧିକାରୀ ଚତୁର୍ଭୁଜ ନାଏକ ପହଞ୍ଚତ୍ଥିଲେ। ନିଆଁ ଲାଗିଥିବା ଚାଷଜମି ଦେଖିବା ସହ ସମ୍ପୃକ୍ତ ଚାଷୀଙ୍କୁ ଭେଟି ସମସ୍ତ ଘଟଣା ଉପରେ ଆଲୋଚନା କରିଥିଲେ। ତେବେ କୃଷି କର୍ମଚାରୀଙ୍କ ପରାମର୍ଶରେ ଚକଡ଼ା ରୋଗ ପ୍ରତିହତ ପାଇଁ ବିଭିନ୍ନ କୀଟନାଶକ ପ୍ରଯୋଗ ପରେ ମଧ୍ୟ କୌଣସି ଫଳପ୍ରଦ ନ ହେବା କାରଣରୁ ନିରାଶ ହୋଇ ନିଆଁ ଲଗେଇ ଦେଇଥିବା ଚାଷୀ ଜଣଙ୍କ କହିଛନ୍ତି। ବରାଡଙ୍ଗା ପଞ୍ଚାୟତର ୧୦୦ରୁ ଊର୍ଦ୍ଧ୍ୱ ଚାଷୀଙ୍କ ୧୨୦ ହେକ୍ଟର ଚାଷଜମି ଚକଡ଼ା ରୋଗ ପ୍ରଭାବିତ ହୋଇଥିବା କୃଷି କର୍ମଚାରୀ ସୂଚନା ଦେଇଛନ୍ତି। ବିଭାଗ ପକ୍ଷରୁ ଚାଷୀମାନଙ୍କୁ ସଚେତନ ମଧ୍ୟ ପୂର୍ବରୁ କରିଥିବା ନେଇ କୃଷି କର୍ମଚାରୀ କହିଛନ୍ତି। ସ୍ଥିତି ଅନୁଧ୍ୟାନ କରିବାକୁ ଆସିଥିବା ଜିଲା କୃଷି ଅଧିକାରୀ ରାଓଙ୍କ ପ୍ରତିକ୍ରିୟା ନେବାରୁ ଚାଷୀଙ୍କୁ ସଚେତନ କରାଯାଇଛି। ତେବେ ଏଭଳି ହତାଶ ହୋଇ ଧାନ ଚାଷରେ ନିଆଁ ଲଗାଇବା ଦୁର୍ଭାଗ୍ୟ ଜନକ ବୋଲି କହିଛନ୍ତି। କୃଷି ବିଭାଗ ସରକାରୀ ନିୟମ ଅନୁସାରେ ଯାହା କ୍ଷତିପୂରଣ ରହିଛି ତାହା ଯୋଗାଇ ଦିଆଯିବ ବୋଲି କହିଛନ୍ତି।
