ବରଗଡ଼,୧୮।୪(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଚାଷୀଙ୍କ ସମସ୍ୟା ଲାଗି ରହିଛି। ଏଠାରେ ଧାନବିକ୍ରି ସମସ୍ୟା ସାଧାରଣରେ ପରିଣତ ହୋଇଥିବାବେଳେ ଅଦିନିଆଁ ବର୍ଷା, କରାମାଡ଼, ରୋଗପୋକ ଉପଦ୍ରବରୁ ଫସଲକ୍ଷତି ଚାଷୀଙ୍କ ଆର୍ଥିକ ମେରୁଦଣ୍ଡକୁ ଦୋହଲାଇ ଦେଉଛି। ଅନ୍ୟପଟେ ଜିଲାର ଚାଷୀମାନେ ଫସଲବୀମା କରିଥିଲେ ମଧ୍ୟ ସେମାନଙ୍କୁ ବର୍ଷ ବର୍ଷ ଧରି କ୍ଷତିପୂରଣ ସହାୟତା ମିଳୁ ନ ଥିବା ଅଭିଯୋଗ ହୋଇଛି। ଜିଲାର ପାଇକମାଳ ବ୍ଲକ ଅନ୍ତର୍ଗତ ବୁକ୍ରାମୁଣ୍ଡା, ମହୁଲପାଲି, ବାଦିକଟା ଆଦି ଅଞ୍ଚଳର କ୍ଷତିଗ୍ରସ୍ତ ଚାଷୀମାନେ ଏଭଳି ସମସ୍ୟାର ସମ୍ମୁଖୀନ ହୋଇଛନ୍ତି। ଏ ନେଇ ବାରମ୍ବାର ବିଭାଗୀୟ ଅଧିକାରୀଙ୍କଠାରେ ଅଭିଯୋଗ କରିବା ସତ୍ତ୍ୱେ କିଛି ସୁଫଳ ମିଳି ନ ଥିବା ଚାଷୀମାନେ କହିଛନ୍ତି। ଏ ନେଇ ଶୁକ୍ରବାର କ୍ଷତିଗ୍ରସ୍ତ ଚାଷୀମାନେ ବରଗଡ଼ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇଥିଲେ। ଜିଲାପାଳ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ ସହିତ କ୍ଷତିପୂରଣ ସହାୟତା ପ୍ରଦାନ ଦିଗରେ ବିହିତ ପଦକ୍ଷେପ ନେବା ପାଇଁ ଚାଷୀମାନେ ନିବେଦନ କରିଛନ୍ତି।
ସୂଚନା ଅନୁଯାୟୀ, ଗତବର୍ଷ ଅକ୍ଟୋବର ମାସରେ ଅଦିନିଆଁ ବର୍ଷା ହେବା ଯୋଗୁ ଉପରୋକ୍ତ ଗ୍ରାମର ଚାଷୀମାନଙ୍କ ଖରିଫ ଧାନ ଫସଲ ନଷ୍ଟ ହୋଇଥିଲା। କ୍ଷେତରେ ଅମଳ ଏବଂ ଅମଳ ଅପେକ୍ଷାରେ ରହିଥିବା ଧାନ ଫସଲ ଉଜୁଡ଼ି ଯାଇଥିଲା। ସେତେବେଳେ ସମ୍ପୃକ୍ତ ଗ୍ରାମର କ୍ଷତିଗ୍ରସ୍ତ ଚାଷୀମାନେ ପାଇକମାଳ ତହସିଲଦାର ଏବଂ ପଦ୍ମପୁର ଉପଜିଲାପାଳଙ୍କୁ ଅବଗତ କରିବା ପରେ ବିଭାଗୀୟ କର୍ମଚାରୀମାନେ କ୍ଷେତ୍ର ପରିଦର୍ଶନ କରି ଫସଲକ୍ଷତି ଆକଳନ କରିଥିଲେ। ତେବେ ବିଭାଗୀୟ କର୍ମଚାରୀମାନେ ୩୩ପ୍ରତିଶତରୁ ଅଧିକ ଫସଲକ୍ଷତି ହୋଇଥିବା ସେହି ସମୟରେ ଆକଳନ କରିଥିଲେ ବୋଲି ଚାଷୀମାନେ କହିଛନ୍ତି। କିନ୍ତୁ ଏପର୍ଯ୍ୟନ୍ତ ଚାଷୀମାନଙ୍କୁ ବୀମା କ୍ଷତିପୂରଣ ମିଳିନାହିଁ।
ଅନ୍ୟପଟେ ସ୍ଥାନୀୟ ବିଭାଗୀୟ କର୍ମଚାରୀମାନଙ୍କୁ କ୍ଷତିଗ୍ରସ୍ତ ଚାଷୀମାନେ ଭେଟିଲେ ସେମାନେ ଫସଲକ୍ଷତି କିମ୍ବା ବୀମା କ୍ଷତିପୂରଣ ନେଇ ସେଭଳି ରିପୋର୍ଟ ଆସି ନ ଥିବା ସେମାନଙ୍କୁ କହିଥିବା ଚାଷୀମାନେ ପ୍ରକାଶ କରିଛନ୍ତି। ସମ୍ପୃକ୍ତ ଚାଷୀମାନେ ସେ ସମ୍ପର୍କରେ ଜାଣିବାକୁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ସମ୍ପୃକ୍ତ ଅଞ୍ଚଳରେ ସେତେବେଳେ କିଛି ଫସଲକ୍ଷତି ହୋଇ ନ ଥିବା ନେଇ ବିଭାଗୀୟ କର୍ମଚାରୀମାନେ ଆକଳନ ରିପୋର୍ଟ ଦେଇଥିବା ଜାଣି ସେମାନେ ଚକିତ ହୋଇପଡ଼ିଛନ୍ତି ବୋଲି ଚାଷୀମାନେ କହିଛନ୍ତି। ତେବେ କ୍ଷେତ୍ର ପରିଦର୍ଶନ ସମୟରେ ଯେଉଁ ବିଭାଗୀୟ କର୍ମଚାରୀମାନେ ୩୩ ପ୍ରତିଶତରୁ ଅଧିକ ଫସଲକ୍ଷତି ହୋଇଥିବା ନେଇ ଚାଷୀମାନଙ୍କୁ କହିଥିଲେ, ସମ୍ପୃକ୍ତ କର୍ମଚାରୀମାନେ କିଛି ଫସଲକ୍ଷତି ହୋଇ ନ ଥିବା ନେଇ କିଭଳି ଆକଳନ ରିପୋର୍ଟ ଦେଲେ ବୋଲି ଚାଷୀମାନେ ପ୍ରଶ୍ନ କରି ଏହାର ତଦନ୍ତ ଦାବି କରିଛନ୍ତି। ବୈଲୋଚନ ପ୍ରଧାନ, ରଙ୍କମଣି ବାରିକଙ୍କ ସମେତ ଅନେକ ଚାଷୀ ସ୍ମାରକପତ୍ର ପ୍ରଦାନ ପାଇଁ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
