ଗୁଣପୁର,୬ା୧୨(ଡି.ଏନ୍.ଏ.): ଚାଷୀଙ୍କ ଏବେ ବିଷମ ସ୍ଥିତି। ବର୍ଷ ତମାମ ଜମିରେ ଖଟି ଧାନ ସଂଗ୍ରହ କରିଥିବାବେଳେ ଏବେ ତାହାକୁ ବିକ୍ରି କରିବାକୁ ନେଇ ଦେଖାଦଇଛି ଜଟିଳ ପରିସ୍ଥିତି। ଯୋଗାଣ ବିଭାଗ ଏବଂ ରାଜସ୍ବ ବିଭାଗ ମଧ୍ୟରେ ଛନ୍ଦି ହୋଇ ପଡିଥିବା ଚାଷୀ କହିଛନ୍ତି। ଚଳିତ ଖରିଫ ଋତୁ ପାଇଁ ଚାଷୀମାନେ ନିଜର ନାମ ଲ୍ୟାମ୍ପ୍ସ ମାଧ୍ୟମରେ ପଞ୍ଜିକରଣ କରିଥିଲେ। କେତ ସଂଖ୍ୟାରେ ନିଜ ଅଞ୍ଚଳର ଚାଷୀ ଲ୍ୟାମ୍ପ୍ସ ଜରିଆରେ ପଞ୍ଜିକରଣ କରିଛନ୍ତି ତାହାର ଏକ ରିପୋର୍ଟ ଲ୍ୟାମ୍ପ୍ସ ପକ୍ଷରୁ ଜିଲା ଯୋଗାଣ ବିଭାଗକୁ ଦିଆଯାଇଛି। ୧୦ ଏକରରୁ ଊର୍ଦ୍ଧ୍ୱ ଜମି ଥିବା ଚାଷୀଙ୍କ ତଥ୍ୟ ସଂଗ୍ରହ ନେଇ ଯୋଗାଣ ବିଭାଗ ସମ୍ପୃକ୍ତ ତହିସଲ ତଥା ରାଜସ୍ବ ବିଭାଗକୁ ଜଣାଇଥିଲେ। ଏପରି ପ୍ରକ୍ରିୟା ମଧ୍ୟରେ ଦେଖାଦେଇଛି ବିବାଦ। ତହସିଲ ବିଭାଗ ସେମାନଙ୍କ ତଥ୍ୟ ଯୋଗାଣ ବିଭାଗକୁ ପ୍ରଦାନ କରିଥିବା କହୁଥିବାବେଳେ ଯୋଗାଣ ବିଭାଗ ସେହି ତଥ୍ୟ ପାଇ ନ ଥିବା କହିଛି। ଏପରି ଉଭୟ ବିଭାଗର ଟଣା ଓଟରା ମଧ୍ୟରେ ଅନେକ ଚାଷୀ ଟୋକନ ପାଇବାରୁ ବଞ୍ଚିତ ହୋଇଥିବା ଅଭିଯୋଗ ହେଉଛି। ଗୁଣପୁର ଉପଖଣ୍ଡରେ ୩୦ଟି ମଣ୍ଡି ରହିଛି। ଗତ ୨୭ ତାରିଖରେ ଏହି ମଣ୍ଡି ଖୋଲା ଯାଇଛି। ହେଲେ ଚାଷୀ ଟୋକନ ପାଇ ନ ଥିବାରୁ ଅନେକସ୍ଥାନରେ ଧାନକିଣା ଆରମ୍ଭ ହୋଇପାରୁନି। କାଁ ଭାଁ କେତେକ ମଣ୍ଡିରେ ଧାନ କ୍ରୟ ଆରମ୍ଭ ହୋଇଛି। ଫଳରେ ଅନେକ ସ୍ଥାନରେ ଜମିରେ ଓ ଘରେ ଧାନ ପଡି ରହିଛି। ଆଉ କେତେକ ଚାଷୀ ଶୀତ କାକରରେ ଖଳାରେ ଧାନ ଜଗି ରହିଛନ୍ତି। ଧାନ କ୍ରୟ ପାଇଁ ତୁରନ୍ତ ଟୋକନ ବ୍ୟବସ୍ଥା ଗ୍ରହଣ କରା ନ ଗଲେ ଚାଷୀ ଅଭାବି ବିକ୍ରିର ଶୀକାର ହେବା ଆଶଙ୍କା ଉପୁଜିଛି। ତେଣୁ ଚାଷୀଙ୍କ ହିତ ଦୃଷ୍ଟିରୁ ତୁରନ୍ତ ସମସ୍ତ ବ୍ୟତିକ୍ରମ ଏବଂ ତ୍ରୁଟି ସୁଧାର କରି ଟୋକନ ଦେବାକୁ ଦାବି ହୋଇଛି।
