ବରଗଡ଼,୨୧।୧(ପ୍ରେମାନନ୍ଦ ଖମାରୀ)- ଧାନବିକ୍ରିରେ ଚାଷୀଙ୍କ ଦୁଃଖ ତୁଟୁ ନାହିଁ । ବୈଷୟିକ ତୃଟି ମଧ୍ୟ ଧାନବିକ୍ରିରେ ଚାଷୀଙ୍କ ପାଇଁ କାଳ ସାଜିଛି । ବରଗଡ଼ ଜିଲା ବିଜେପୁର ଅଞ୍ଚଳରୁ ଏଭଳି ଏକ ଘଟଣା ସାମ୍ନାକୁ ଆସିଛି । ଆଧାର ଡାଟାବେସର ଗୁରୁତର ତ୍ରୁଟି ଯୋଗୁଁ ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ପିପିଲିପାଲି ଗ୍ରାମର ଜଣେ ଚାଷୀ ଟଙ୍କଧର ଗିରି ନିଜ ଅମଳ ଧାନ ବିକ୍ରି କରି ନ ପାରିବା ଏବେ ଚର୍ଚ୍ଚାର ବିଷୟ ହୋଇଛି । ସମ୍ପୃକ୍ତ ଚାଷୀ ଜୀବିତ ଅଛନ୍ତି । କିନ୍ତୁ ଆଧାରରେ ‘deceased status’ ଦର୍ଶାଯାଉଥିବାରୁ ଚାଷୀ ଗଭୀର ଆର୍ଥିକ ଓ ମାନସିକ ସଙ୍କଟରେ ପଡ଼ିଛନ୍ତି ।
ପିପିଲିପାଲି ଗ୍ରାମର ଚାଷୀ ଟଙ୍କଧର ଗିରି (ଆଧାର ନଂ– ୯୮୬୬୮୩୭୧୪୦୪୫) ଟୋକନ ନମ୍ବର ୨୯୬୧୬୦ ଅନୁଯାୟୀ ୨୮କ୍ୱିଣ୍ଟାଲ ୮୬କେଜି ଧାନ ବିକ୍ରି ପାଇଁ ବୁଡ଼ାପାଲି ଧାନ କ୍ରୟ କେନ୍ଦ୍ରକୁ ଧାନ ଆଣିଥିଲେ । କିନ୍ତୁ ଆଖି ସ୍କାନ ସମୟରେ ସିଷ୍ଟମରେ ଆଧାର ସମ୍ପର୍କିତ ତ୍ରୁଟି ଦର୍ଶାଯିବାରୁ ଧାନକ୍ରୟ ସମ୍ଭବ ହୋଇ ନଥିଲା । ଚାଷୀଙ୍କ କହିବାନୁସାରେ, ସେ ଜୀବିତ ଓ ସମସ୍ତ କାଗଜପତ୍ର ସଠିକ୍ ଥିବା ସତ୍ତ୍ବେ ଆଧାର ଡାଟାବେସରେ ତାଙ୍କ ନାମରେ ‘deceased status’ ଦର୍ଶାଯାଉଛି।
ଜାନୁଆରୀ ୩ ତାରିଖରେ ଟୋକନର ଶେଷ ସମୟ ସମାପ୍ତ ହୋଇଯାଇଥିଲେ ମଧ୍ୟ କୌଣସି ବିକଳ୍ପ ବ୍ୟବସ୍ଥା ହୋଇନଥିଲା।
ବିଜେପୁର ଆଧାର କେନ୍ଦ୍ରରେ ଯାଞ୍ଚ ପରେ ‘Aadhaar deactivated due to deceased status’ ବୋଲି ସୂଚନା ଦିଆଯାଇ ଭୁବନେଶ୍ୱରକୁ ଯିବାକୁ ପରାମର୍ଶ ମିଳିଥିଲା। ଚାଷୀ ଜିଲାପାଳ ଓ ଭୁବନେଶ୍ୱର ଆଧାର କେନ୍ଦ୍ରରେ ସମସ୍ତ କାଗଜପତ୍ର ଦାଖଲ କରିଥିଲେ । ସମୟ ଭିତରେ ସମାଧାନ ନ ମିଳିବାରୁ ଶେଷରେ ମଣ୍ଡିରୁ ଧାନ ଘରକୁ ଫେରାଇ ଆଣିବାକୁ ବାଧ୍ୟ ହୋଇଥିବା ସେ ଅଭିଯୋଗ କରିଛନ୍ତି । ଏହି ଘଟଣା ଧାନ କ୍ରୟ ବ୍ୟବସ୍ଥାର ପ୍ରାଯୁକ୍ତିକ ତ୍ରୁଟିକୁ ସାମ୍ନାକୁ ଆଣିଥିବା ବେଳେ ଚାଷୀଙ୍କ ଆର୍ଥିକ କ୍ଷତି ପାଇଁ ଦାୟୀ କିଏ ବୋଲି ସଂଯୁକ୍ତ କୃଷକ ସଙ୍ଗଠନ ଉପଦେଷ୍ଟା ରମେଶ ମହାପାତ୍ର କହିଛନ୍ତି । ଆହୁରି ଏନେକ ଚାଷୀଙ୍କ ଏହିପରି ମଣ୍ଡିରେ ଧାନ ପକାଇ ସରକାରଙ୍କ ତ୍ରୁଟିପୂର୍ଣ୍ଣ କେନ୍ଦ୍ରୀକରଣ ବ୍ୟବସ୍ଥା କାରଣରୁ ଟୋକନ ଅବଧି ସରିଛି । ଏଣୁ ଏ ଦିଗରେ ପ୍ରଶାସନ ତୁରନ୍ତ ପଦକ୍ଷେପ ନ ନେଲେ ଆନ୍ଦୋଳତ୍ମକ ପନ୍ଥା ଅବଲମ୍ବନ କରିବା ପାଇଁ ବାଧ୍ୟ ହେବୁ ବୋଲି ସେ ଚେତାବନୀ ଦେଇଛନ୍ତି ।
Dharitri – Odisha’s No.1 Odia Daily
