ରାଉରକେଲା,୧।୧୦(ବିପ୍ଳବ ରଞ୍ଜନ ଦାଶ)ରାଉରକେଲା ଜଗଦା ସ୍ଥିତ ସାମୂଦାୟିକ କଲ୍ୟାଣ ସୋସାଇଟି (ସିଡବ୍ଲ୍ୟୁଏସ୍) ଜେନେରାଲ ହସ୍ପିଟାଲ ଅବ୍ୟବସ୍ଥାରେ ଚାଲିଛି। ଏଠାକୁ ଆସୁଥିବା ରୋଗୀଙ୍କୁ ଆବଶ୍ୟକ ଚିକିତ୍ସା ସୁବିଧା ମିଳୁ ନ ଥିବା ଅଭିଯୋଗ ହେଉଛି। ଫଳରେ ଏହି ହସ୍ପିଟାଲ ତାର ମୂଳଲକ୍ଷ୍ୟରୁ ଦୂରେଇ ଯିବାରେ ଲାଗିଛି।
ସୂଚନା ଅନୁସାରେ, ସିଡବ୍ଲ୍ୟୁଏସ୍ ହସ୍ପିଟାଲରେ ୫୫ ଡାକ୍ତରଙ୍କ ସ୍ଥାନରେ ୪୭ ଜଣ ଡାକ୍ତର ରୋଗୀସେବା କରୁଛନ୍ତି। ହସ୍ପିଟାଲରେ ରୋଗୀଙ୍କୁ ପର୍ଯ୍ୟାପ୍ତ ପରିମାଣର ଜେନେରିକ ମେଡିଶିନ ମିଳୁନାହିଁ। ଫଳରେ ରୋଗୀମାନେ ଦାମୀ କମ୍ପାନୀର ଔଷଧ କିଣିବାକୁ ବାଧ୍ୟ ହେଉଛନ୍ତି। ସେହିପରି ଜଗଦାରେ ୨ଏକର ପରିମିତ ଜମିରେ ୨୦୦୨ ନଭେମ୍ବରରେ ହସ୍ପିଟାଲ ସ୍ଥାପନ ହେବା ସମୟରେ ସ୍ଥାନୀୟ ଲୋକମାନଙ୍କୁ ରୋଜଗାର ସୁଯୋଗ ପ୍ରଦାନ କରାଯିବାର ଥିଲା। ମାତ୍ର ଏପର୍ଯ୍ୟନ୍ତ ତାହା ହେଲାନାହିଁ। ଅନେକ ଡାକ୍ତରଙ୍କୁ ମନଇଚ୍ଛା ହସ୍ପିଟାଲରେ ରଖାଯାଉଛି। ପର୍ଯ୍ୟାପ୍ତ ଡାକ୍ତର ଥିଲେ ସୁଦ୍ଧା ସେମାନଙ୍କ ଉପସ୍ଥାନ ସାମାନ୍ୟ ରହୁଛି। ଫଳରେ ରୋଗୀମାନେ ଚିକିତ୍ସା ସୁବିଧା ନ ପାଇ ଅସୁବିଧା ଭୋଗୁଛନ୍ତି। ହସ୍ପିଟାଲରେ ଜଣେ ସୁପର ସ୍ପେଶାଲିଷ୍ଟ ନ୍ୟୁରୋ ସର୍ଜନ ନିୟୋଜିତ ହୋଇଥିଲେ ମଧ୍ୟ ସେ କେବଳ ରାତ୍ରିରେ ଚିକିତ୍ସା କରୁଛନ୍ତି। ହସ୍ପିଟାଲ ଶଯ୍ୟା ସଂଖ୍ୟା ୩ ଗୁଣା ବୃଦ୍ଧି ସହ ୧୪ଟି ନିଦାନ ବିଭାଗ, ୧୭ମେଡିକାଲ ଜନିତ ସରକାରୀ ସେବା ଓ ୮ଟି ଲାବୋରେଟୋରୀ ବ୍ୟବସ୍ଥା ଉପଲବ୍ଧ ଥିଲେ ମଧ୍ୟ ପୂବଭଳି ରୋଗୀଙ୍କ ଭିଡ ଜମୁନାହିଁ। ଏ ନେଇ ଜଗଦା ସାସ୍କୃତିକ ପରିଷଦ ପରାମର୍ଶଦାତା ସଞ୍ଜୀବ ମହାନ୍ତି କୁହନ୍ତି, ସିଡବ୍ଲ୍ୟୁଏସ୍ ହସ୍ପିଟାଲରେ ପ୍ରାୟ ସବୁ ବିଭାଗର ଡକ୍ତର ଅଛନ୍ତି। କିନ୍ତୁ ଡାକ୍ତରଙ୍କ ଉପସ୍ଥାନ କମ୍ ରହୁଛି। ଡାକ୍ତର ରୋଗୀମାନଙ୍କୁ ସପ୍ତାହରେ ଥରେ ଦେଖୁଛନ୍ତି। ଡାକ୍ତରଙ୍କ ଅନୁପସ୍ଥିତି ଯୋଗୁ ରୋଗୀ ଅନ୍ୟ ହସ୍ପିଟାଲକୁ ଯିବାକୁ ବାଧ୍ୟ ହେଉଛନ୍ତି। ରବିବାର ପ୍ରାୟ ଡାକ୍ତର ଅନୁପସ୍ଥିତ ରହୁଛନ୍ତି। ସିଡବ୍ଲ୍ୟୁଏସ ହସ୍ପିଟାଲକୁ ବଣେଇ ବହମୁଷା ଗାଁରୁ ହାଡଭଙ୍ଗା ଚିକିତ୍ସା ପାଇଁ ଆସିଥିବା କହ୍ନେଇ କିଷାନ କୁହନ୍ତି, ସପ୍ତାହେ ହେଲା ମେଡିକାଲରେ ଭର୍ତ୍ତି ହେଲି। ମାତ୍ର ୩ଦିନ ପରେ ମୋର ଚିକିତ୍ସା ହେଲା ଏବଂ ୭ଦିନ ପରେ ମେଡିକାଲ ରିପୋର୍ଟ ପାଇଲି। ଏ ସମ୍ପର୍କରେ ହସ୍ପିଟାଲ ଅଧ୍ୟକ୍ଷ ବେନ୍ନିଚନ କେ. ପିଟର କହିଛନ୍ତି, ସିଡବ୍ଲ୍ୟୁଏସ୍ ହସ୍ପିଟାଲ ଜେନେରାଲ ହସ୍ପିଟାଲ। ଏଠାରେ ରୋଗୀଙ୍କୁ ଆବଶ୍ୟକ ମୁତାବକ ସମସ୍ତ ପ୍ରକାର ଚିକିତ୍ସା ସେବା ପ୍ରଦାନ ହେଉଛି। ସୁପର ସ୍ପେଶାଲିଷ୍ଟ ଡାକ୍ତର ନ୍ୟୁରୋଲୋଜିଷ୍ଟ ରାତିରେ ଆସନ୍ତି। ଆଗକୁ ଖାଲିଥିବା ପଦବୀରେ ଡାକ୍ତର ଆଣିବାକୁ ଉଦ୍ୟମ ଚାଲିଛି। ଆମର ଜନ ଔଷଧି କେନ୍ଦ୍ର ରହିଛି। ମାତ୍ର ଜେନେରିକ ଔଷଧ ମଗାଇଲେ ମଧ୍ୟ ମିଳୁନାହିଁ। ହସ୍ପିଟାଲ ବ୍ୟବସ୍ଥିତ ଭାବେ ଚାଲିଛି । ଆଗକୁ ଅନ୍ୟ ସବୁ ଦିଗ ଉପରେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଥିଲେ।
