ସମ୍ବଲପୁର, ୧୬ା୧ (ବ୍ୟୁରୋ): କଟକ, ସୋନପୁର, ବରଗଡ ପରେ ସମ୍ବଲପୁର ଜିଲାରେ ନକଲି ସାମଗ୍ରୀ କାରଖାନା ଠାବ ହୋଇଛି। ଶନିବାର ସନ୍ଧ୍ୟାରେ ଜିଲା ପୋଲିସ ପକ୍ଷରୁ ଅଇଁଠାପାଲି ଥାନା ନୂଆଁପଡା ନିକଟ ଏକ ଗୋଦାମରେ ଚଢ଼ାଉ କରାଯାଇ ୨୪୪ ବସ୍ତା ନକଲି ସର୍ଫ ଜବତ କରାଯାଇଛି। ସର୍ଫ ଏକ୍ସେଲ୍ ପ୍ୟାକେଟରେ ନକଲି ସର୍ଫ ପ୍ୟାକିଂ କରି ବିକ୍ରି କରାଯାଉଥିଲା। ଏହି ଘଟଣାରେ ପୋଲିସ ଗୋଦାମ ମାଲିକ ଆକାଶ ଅଗ୍ରୱାଲଙ୍କୁ ଗିରଫ କରିଥିବା ବେଳେ ଅନ୍ୟ ଜଣଙ୍କୁ ଅଟକ ରଖିଛି। ଏ ନେଇ ପୋଲିସ ଏକ ମାମଲା(ନଂ.୩୧/୨୧) ରୁଜୁ କରି ଅଧିକ ତଦନ୍ତ ଚଳାଇଛି। ସୂଚନାଯୋଗ୍ୟ, ହିନ୍ଦୁସ୍ଥାନ ଲିଭର୍ କମ୍ପାନୀ ପକ୍ଷରୁ ଅଇଁଠାପାଲି ଥାନାରେ ନକଲି ସର୍ଫ ତିଆରି କରାଯାଇ ବିକ୍ରି କରାଯାଉଥିବା ଅଭିଯୋଗ ହୋଇଥିଲା। ଅତିରିକ୍ତ ଏସ୍ପି ଅମରେଶ ପଣ୍ଡା, ଅଇଁଠାପାଲି ଥାନା ଅଧିକାରୀ ଯୋଗେଶ ପଣ୍ଡାଙ୍କୁ ନେଇ ଟିମ୍ ଗଠନ କରାଯାଇଥିଲା। ଏହି ଟିମ୍ ଅତର୍କିତ ଚଢ଼ାଉ ସମୟରେ ନକଲି ସର୍ଫ ତିଆରି କରି ପ୍ୟାକିଂ କରାଯାଉଥିବା ଦେଖିବାକୁ ପାଇଥିଲା। ଘଟଣାସ୍ଥଳରୁ ୨୪୪ ବସ୍ତା ନକଲି ସର୍ଫ (ସର୍ଫ ଏକ୍ସେଲ୍) ପ୍ୟାକେଟ ଜବତ ହୋଇଥିଲା। ପ୍ରତ୍ୟେକ ବସ୍ତାରେ ୯୦ ଗ୍ରାମ ଓଜନର ୧୨୦ ପ୍ୟାକେଟ ରହିଛି। ପ୍ରତି ପ୍ୟାକେଟକୁ ବଜାରରେ ୧୦ ଟଙ୍କାରେ ବିକ୍ରି କରାଯାଉଥିଲା। ଘଟଣାରେ ଅନ୍ୟ କେତେଜଣ ସମ୍ପୃକ୍ତ ଥିବା ନେଇ ତଦନ୍ତ କରାଯାଉଛି ବୋଲି ଥାନା ଅଧିକାରୀ ପଣ୍ଡା କହିଛନ୍ତି।
