ବ୍ରହ୍ମପୁର ଅଫିସ,୨୩।୧- ବ୍ରହ୍ମପୁର ସହରତଳି ଅଞ୍ଚଳରେ ଗୋଟିଏ ପରେ ଗୋଟିଏ ନକଲି କାରଖାନା ଠାବ କରୁଛି ପୋଲିସ। ବଡବଜାର ଥାନା ଫାଷ୍ଟଗେଟ୍ ଗଣପତିନଗରରୁ ଶନିବାର ରାତିରେ ଠାବ ହୋଇଛି ଏକ ନକଲି ସସ୍ କାରଖାନା। ସକାଳେ ବେଆଇନ ଗୁଟ୍ଖା କାରଖାନା ପରେ ରାତିରେ ନକଲି ସସ୍ କାରଖାନା ଠାବ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଗଣପତିନଗରରେ ଥିବା ଉକ୍ତ ସସ୍ କାରଖାନା ଓ ଗୋଦାମକୁ ସିଲ୍ କରାଯାଇଥିବା ଓ ଜଣେ ମହିଳା ଏହି କାରବାର ଚଳାଉଥିବା ଥାନା ଅଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି। ଉକ୍ତ କାରଖାନା ଗୋଦାମରୁ ୨୨୦ ପେଟି ଫ୍ୟାମିଲି ବ୍ରାଣ୍ଡର ଟମାଟୋ, ଚିଲି ଓ ସୋୟା ସସ୍ ଜବତ ହୋଇଛି। ନିମ୍ନମାନର ସାମଗ୍ରୀରୁ ସସ୍ ତିଆରି କରି ବଜାରକୁ ଛଡା ଯାଉଥିଲା। ଯାହାକି ବ୍ରହ୍ମପୁର ସହରର ବିଭିନ୍ନ ହୋଟେଲ, ଫାଷ୍ଟଫୁଡ ଦୋକାନରେ ବ୍ୟବହାର ହେଉଥିଲା। ଏଥିରେ ଆଉ କାହାର ହାତ ରହିଛି କି ନାହିଁ ସେ ନେଇ ପୋଲିସ ତଦନ୍ତ ଚଳାଇଛି। ଟାଉନ ଏସ୍ଡିପିଓ ବିଷ୍ଣୁପ୍ରସାଦ ପତି, ବଡବଜାର ଥାନା ଅଧିକାରୀ ପ୍ରଶାନ୍ତ ଭୂପତି ପ୍ରମୁଖ ଚଢାଉରେ ସାମିଲ ଥିଲେ।
