ପାଟନା,୧୦।୮:ବିହାରର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ନୀତୀଶ କୁମାର। ନୀତୀଶଙ୍କ ବ୍ୟତୀତ ଆରଜେଡି ନେତା ତେଜସ୍ବୀ ଯାଦବ ବିହାରର ଉପ-ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ତେଜସ୍ବୀଙ୍କ ଚତୁର ରାଜନୀତିକୁ ନେଇ ଏବେ ଜୋରଦାର ଚର୍ଚ୍ଚା ହେଉଛି। ଏକଦା ଜଣେ କ୍ରିକେଟର୍ ଭାବରେ କ୍ୟାରିୟର ଆରମ୍ଭ କରିଥିବା ତେଜସ୍ବୀ ଯଦିଓ ପଡ଼ିଆରେ ଫେଲ ମାରିଛନ୍ତି, କିନ୍ତୁ ରାଜନୀତିରେ ଜଣେ ପୋଖତ ଖେଳାଳି ଭାବେ ପରିଚିତ ହାସଲ କରିଛନ୍ତି।
ତେଜସ୍ବୀ ଯାଦବ ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ ଏବଂ ରାବ୍ରି ଦେବୀଙ୍କ ସାନପୁଅ। ସେ ୯ ନଭେମ୍ବର ୧୯୮୯ରେ ବିହାରର ଗୋପାଳଗଞ୍ଜରେ ଜନ୍ମଗ୍ରହଣ କରିଥିଲେ। ଏକ ବଡ ରାଜନୈତିକ ପରିବାରରେ ଜନ୍ମଗ୍ରହଣ କରିଥିବା ତେଜସ୍ବୀ କେବଳ ନବମ ପର୍ଯ୍ୟନ୍ତ ପଢିଛନ୍ତି। ଘରେ ସବୁଠୁ ସାନ ଥିବାରୁ ସେ ସମସ୍ତଙ୍କ ପାଇଁ ପ୍ରିୟ ଅଟନ୍ତ
ତେଜସ୍ବୀ ଯାଦବ ରାଜନୀତିରେ ପ୍ରବେଶ କରିବା ପୂର୍ବରୁ କ୍ରିକେଟ ଖେଳୁଥିଲେ। ସେ ନିଜେ କ୍ରିକେଟରେ କ୍ୟାରିୟର କରିବାକୁ ଚାହୁଁଥିଲେ। ତେଜସ୍ବୀ ମଧ୍ୟ ଝାଡଖଣ୍ଡ ପାଇଁ ରଣଜୀ ମ୍ୟାଚ ଖେଳିଛନ୍ତି। ସେ ଦିଲ୍ଲୀ ଅଣ୍ଡର-୧୯ ଦଳରେ ଭାରତୀୟ ଅଧିନାୟକ ବିରାଟ କୋହଲିଙ୍କ ସହ ଥିଲେ। ତାଙ୍କୁ ଆଇପିଏଲରେ ମଧ୍ୟ ଚୟନ କରାଯାଇଥିଲା। ତାଙ୍କୁ ୨୦୦୮ରେ ଦିଲ୍ଲୀ ଡେୟାରଡେଭିଲ୍ସ ଦଳ କିଣିଥିଲା। ତେବେ ଆଇପିଏଲ ସମୟରେ ସେ ପଡ଼ିଆରେ ଖେଳିବାର ସୁଯୋଗ ପାଇନାହାଁନ୍ତି। ପରେ ତେଜସ୍ବୀ ଅନୁଭବ କରିଥିଲେ ଯେ, ସେ କ୍ରିକେଟରେ କ୍ୟାରିୟର କରି ପାରିବେ ନାହିଁ, ୨୦୧୨ରେ ତାଙ୍କ ପିତାଙ୍କ ରାଜନୈତିକ ଉତ୍ତରାଧିକାରୀ ଦାୟିତ୍ୱ ଗ୍ରହଣ କରିଥିଲେ। ଏହାପରଠାରୁ ସେ ବିଧିବଦ୍ଧ ଭାବେ ରାଜନୀତିରେ ପ୍ରବେଶ କରିଥିଲେ। ୨୦୧୨ ପରଠାରୁ ତେଜସ୍ବୀ ଯାଦବ ତାଙ୍କ ପିତାଙ୍କ ସହ ନିର୍ବାଚନ କାର୍ଯ୍ୟକ୍ରମରେ ଯୋଗଦେବା ଆରମ୍ଭ କରିଥିଲେ। ୨୦୧୫ ବିଧାନସଭା ନିର୍ବାଚନରେ ତେଜସ୍ବୀ ଆରଜେଡିର ସମ୍ପୂର୍ଣ୍ଣ ଦାୟିତ୍ୱ ଗ୍ରହଣ କରିଥିଲେ।
ତେଜସ୍ବୀ ଯାଦବ ୨୦୧୫ ବିଧାନସଭା ନିର୍ବାଚନରେ ପ୍ରଥମ ଥର ପାଇଁ ରାଘୋପୁର ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ। ତା’ପରେ ତାଙ୍କୁ ୨୬ ବର୍ଷ ହୋଇଥିଲା। ସେ ବିଧାୟକ ଭାବରେ ନିର୍ବାଚିତ ହୋଇଥିଲେ। ମୁଖ୍ୟମନ୍ତ୍ରୀ ପଦ ପାଇଁ ପ୍ରତିଦ୍ୱନ୍ଦ୍ୱୀ ଥିଲେ, କିନ୍ତୁ ସେତେବେଳେ ମହାଗଠବନ୍ଧନର ମୁଖ୍ୟ ନୀତୀଶ କୁମାର ଥିଲେ। ତେଣୁ ଅଧିକ ଆସନ ଜିତିବା ସତ୍ତ୍ୱେ ନୀତୀଶ କୁମାର ମୁଖ୍ୟମନ୍ତ୍ରୀ ହୋଇଥିଲେ। ତେବେ ସେ ନିଜେ ଉପମୁଖ୍ୟମନ୍ତ୍ରୀ ହୋଇଥିଲେ।
ତେଜସ୍ବୀ ଯାଦବଙ୍କ ନାଁରେ ଅନେକ ଠକେଇ ମାମଲା ରହିଛି। ତାଙ୍କ ନାଁରେ ଅନେକ ବେନାମୀ ସମ୍ପତ୍ତି ରଖିଥିବା ମଧ୍ୟ ଅଭିଯୋଗ ଆସିଥିଲା। ଉପମୁଖ୍ୟମନ୍ତ୍ରୀ ଥିବାବେଳେ ତେଜସ୍ବୀ ଯାଦବଙ୍କୁ ମଧ୍ୟ ସିବିଆଇ ପଚରାଉଚରା କରିଥିଲା। ୨୦୧୭ରେ ତେଜସ୍ବୀଙ୍କ ନାଁରେ ଗୋଟିଏ ପରେ ଗୋଟିଏ ଦୁର୍ନୀତି ଅଭିଯୋଗ କରାଯାଇଥିଲା। ସେତେବେଳେ ନୀତୀଶ କୁମାର ତେଜସ୍ବୀଙ୍କୁ ଇସ୍ତଫା ଦେବାକୁ କହିଥିଲେ, କିନ୍ତୁ ସେ ରାଜି ହୋଇ ନ ଥିଲେ। ଏହା ପରେ, ୨୦୧୭ରେ ନୀତୀଶ ଆରଜେଡି ସହ ମେଣ୍ଟ ଭାଙ୍ଗି ପୁଣି ଭାଜପା ସହ ହାତ ମିଳାଇ ସରକାର ଗଠନ କରିଥିଲେ।
୨୦୨୦ ବିଧାନସଭା ନିର୍ବାଚନରେ ଦିଆଯାଇଥିବା ଆଫିଡେଭିଟ ଅନୁଯାୟୀ ତେଜସ୍ବୀ ଯାଦବଙ୍କର ୪ କୋଟି ୭୩ ଲକ୍ଷ ୨୦ ହଜାର ୬୧ ମୂଲ୍ୟର ସ୍ଥାବର ସମ୍ପତ୍ତି ରହିଛି। ଏହା ବ୍ୟତୀତ ତେଜସ୍ବୀ ଙ୍କର ଏକ କୋଟି ୧୫ ଲକ୍ଷ ୭୦ ହଜାର ଟଙ୍କା ମୂଲ୍ୟର ଅସ୍ଥାବର ସମ୍ପତ୍ତି ଅଛି। ତେଜସ୍ବୀଙ୍କର ୧୦୦ ଗ୍ରାମ ସୁନା ଅଳଙ୍କାର ମଧ୍ୟ ଅଛି। ସେ ଷ୍ଟକ ମାର୍କେଟରେ ମଧ୍ୟ ବିନିଯୋଗ କରିଛନ୍ତି।
