ଥୁଆମୂଳ ରାମପୁର, ୨୫।୬ (ଦୁର୍ଗା କୀର୍ତ୍ତି): ରାଜ୍ୟ ସରକାରଙ୍କ ଦୁଇ ବର୍ଷ ପୂର୍ତ୍ତି ଉପଲକ୍ଷେ “ବିକାଶର ଧାରା ଓଡ଼ିଶା ସାରା” ଅଭିଯାନର ବ୍ଲକ ସ୍ତରୀୟ ସମ୍ବୀଳନୀ ଗୁରୁବାର ଦିନ ଥୁଆମୂଳ ରାମପୁରଠାରେ ଅନୁଷ୍ଠିତ ହୋଇଯାଇଛି। ମାତ୍ର ସରକାରୀ ଯୋଜନାର ସଫଳତା ପ୍ରଦର୍ଶନ ପାଇଁ ଆୟୋଜିତ ଏହି କାର୍ଯ୍ୟକ୍ରମରେ ବ୍ୟାପକ ପ୍ରଶାସନିକ ଅବ୍ୟବସ୍ଥା ଏବଂ ପ୍ରକୃତ ଯୋଗ୍ୟ ହିତାଧିକାରୀମାନଙ୍କୁ ଅଣଦେଖା କରାଯାଇଥିବା ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି। ଶେଷରେ ଲୋକେ ଅତିଷ୍ଠ ହୋଇ ଅଧାରୁ ସଭାସ୍ଥଳ ଛାଡ଼ି ଚାଲିଯାଇଥିବା ଦେଖିବାକୁ ମିଳିଥିଲା।
କାର୍ଯ୍ୟକ୍ରମରେ ପ୍ରଶାସନିକ ଅବ୍ୟବସ୍ଥା ଏପରି ଚରମ ସୀମାରେ ପହଞ୍ଚିଥିଲା ଯେ, ସେଠାରେ ଉପସ୍ଥିତ ଥିବା କିଛି ସରକାରୀ ଅଧିକାରୀ ବସିବା ପାଇଁ ଚେୟାର ସୁଦ୍ଧା ପାଇ ନ ଥିଲେ। ଶେଷରେ ସେମାନେ ବାଧ୍ୟ ହୋଇ ତଳେ ପଡ଼ିଥିବା ଏକ ଲୁହା ଆଙ୍ଗେଲ୍ ସାହାଯ୍ୟରେ ବସିଥିବା ଦେଖାଯାଇଥିଲା, ଯାହା ପ୍ରଶାସନର ଆୟୋଜନ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଏହି ସମ୍ବୀଳନୀରେ ମଞ୍ଚାସୀନ ଅତିଥିମାନଙ୍କ ଦ୍ୱାରା ବିଭିନ୍ନ ସରକାରୀ ଯୋଜନାରେ ସହାୟତା ଓ କାର୍ଯ୍ୟାଦେଶ ବଣ୍ଟନ କରାଯାଇଥିଲା। ଏଥିରେ ମୁଖ୍ୟମନ୍ତ୍ରୀ ଅନ୍ନପୂର୍ଣ୍ଣା ଯୋଜନାରେ ୪୦ ଜଣଙ୍କୁ ରାସନ କାର୍ଡ, ଗ୍ରାମୀଣ ଆବାସ ପ୍ରୋତ୍ସାହନ ରାଶି ଅନ୍ତର୍ଗତ ୮ ଜଣଙ୍କୁ ସହାୟତା ଏବଂ ଅନ୍ତ୍ୟୋଦୟ ଗୃହ ଯୋଜନାରେ ୬ ଜଣଙ୍କୁ କାର୍ଯ୍ୟାଦେଶ ପ୍ରଦାନ କରାଯାଇଥିଲା। ଏହା ସହିତ ୧୦ ଜଣ ‘ଲକ୍ଷପତି ଦିଦି’ଙ୍କୁ ପ୍ରଶଂସା ପତ୍ର, ୨ଟି ମହିଳା ସ୍ୱୟଂ ସହାୟକ ଗୋଷ୍ଠୀକୁ ବ୍ୟାଙ୍କ ଋଣ ଏବଂ ୧୨ ଜଣଙ୍କୁ ସାମାଜିକ ସୁରକ୍ଷା ଭତ୍ତା ପ୍ରଦାନ କରାଯାଇଥିଲା। ମାତ୍ର ଏହି ବଣ୍ଟନ ପ୍ରକ୍ରିୟାରେ ଅନେକ ପ୍ରକୃତ ଓ ଯୋଗ୍ୟ ହିତାଧିକାରୀଙ୍କୁ ବଞ୍ଚିତ କରାଯାଇଥିବା ନେଇ ସାଧାରଣରେ ଅସନ୍ତୋଷ ଦେଖାଦେଇଥିଲା, ଯାହାକୁ ନେଇ ଜନସାଧାରଣ ସଭା ବର୍ଜନ କରିଥିଲେ।
ବ୍ଲକ ଅଧ୍ୟକ୍ଷ ଦୟାନିଧି ମାଝୀଙ୍କ ସଭାପତିତ୍ୱରେ ଆୟୋଜିତ ଏହି ସମାରୋହରେ ସାଂସଦଙ୍କ ବ୍ଲକ ପ୍ରତିନିଧି ପବିତ୍ର ନାଏକ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ବିଡ଼ିଓ ଧ୍ରୁବ ଚରଣ ମୁଦୁଲିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କାର୍ଯ୍ୟକ୍ରମ ସମ୍ପାଦିତ ହୋଇଥିଲା। ସମ୍ମାନିତ ଅତିଥି ଭାବେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡାକ୍ତର ପ୍ରଦ୍ୟୁସ କୁମାର ପଣ୍ଡା, ଅତିରିକ୍ତ ତହସିଲଦାର ତପନ କୁମାର ପତି, ସିଡିପିଓ ମଧୂମାଳ ବାଗ, ବ୍ୟାଙ୍କ କ୍ଷେତ୍ର ନିରୀକ୍ଷକ ଶମ୍ଭୁନାଥ ସ୍ୱାଇଁ ଓ ପିଇଓ ତ୍ରିଲୋଚନ ନାଏକ ଉପସ୍ଥିତ ଥିଲେ।
ଏହା ସହିତ ଏସସି ସେଲ୍ ଜିଲ୍ଲା ମୋର୍ଚ୍ଚା ସଭାପତି ବିଷ୍ଣୁ ନାଏକ, ସମିତି ସଭ୍ୟା ପୁଷ୍ପାଞ୍ଜଳି ନାଏକ, ଯୁବ ନେତା ସୁଜନ ନାଏକ, BJP ନେତା ଲକ୍ଷ୍ମୀଧର ନାଏକ, କିଆମଣି ନାଏକ, ଆଲୋକ ନାଏକ, ରାଧାକାନ୍ତ ନାଏକ, କୃଷ୍ଣ ଚନ୍ଦ୍ର ପରିଚ୍ଛା ଏବଂ ମହୁଲ ପାଟଣା ସରପଞ୍ଚ ରତ୍ନି ମାଝୀ ପ୍ରମୁଖ ମଞ୍ଚାସୀନ ରହିଥିଲେ। ବିପିସି ଆର.ଏଚ. ରାଜେନ୍ଦ୍ର ନାରାୟଣ ଦେବ ମଞ୍ଚ ସଂଚାଳନ କରିଥିଲେ।
ଏହି ଅବସରରେ ବିଭିନ୍ନ ସରକାରୀ ବିଭାଗ ପକ୍ଷରୁ ସ୍ୱତନ୍ତ୍ର ଷ୍ଟଲ୍ମାନ ସ୍ଥାପନ କରାଯାଇଥିଲା, ଯେଉଁଥିରେ ବହୁ ସଂଖ୍ୟାରେ ଏମ୍ବିକେ, ସିଆରପି, ମିଶନ ଶକ୍ତି ମହିଳା, ସ୍ୱୟଂ ସହାୟକ ଗୋଷ୍ଠୀ, ଆଶା ଓ ଅଙ୍ଗନୱାଡ଼ି କର୍ମୀ ଅଂଶଗ୍ରହଣ କରିଥିଲେ। କାର୍ଯ୍ୟକ୍ରମ ପରିଚାଳନାରେ ବିଏସଏସଓ ସୁନାରାମ, ଏମ୍ଆଇ ବିଭୁ ରଞ୍ଜନ ସାହୁ, ଜିପିଡିଓ ବାଲେଶ୍ୱର ନାୟକ, ଡବ୍ଲୁଇଓ ସୁଭଜିତ୍ ରଞ୍ଜନ ସ୍ୱାଇଁ ଏବଂ ବିପିସି ସୁଭଦ୍ରା ଶକ୍ତି ପ୍ରତାପ ନାଏକ ପ୍ରମୁଖ ସକ୍ରିୟ ସହଯୋଗ କରିଥିଲେ। ସରକାରଙ୍କ ବିକାଶର ପ୍ରଚାର ପାଇଁ ଆୟୋଜିତ ଏହି ମେଳା ଶେଷରେ ପ୍ରଶାସନିକ ତ୍ରୁଟି ଯୋଗୁ ବିବାଦ ଘେରକୁ ଚାଲିଯାଇଛି।
