ଯାଜପୁର ଅଫିସ,୧୬ା୩: ଯାଜପୁର ଜିଲା ଗ୍ରାମାଞ୍ଚଳରେ ଥିବା କେତେକ ସରକାରୀ ସ୍ବୀକୃତିପ୍ରାପ୍ତ ଡିଗ୍ରୀ କଲେଜ କର୍ତ୍ତୃପକ୍ଷ ଛାତ୍ରୀଛାତ୍ରଙ୍କଠାରୁ ବେଆଇନ ଭାବେ ଅର୍ଥ ଆଦାୟ କରୁଛନ୍ତି। ଏହି ମର୍ମରେ ଅଞ୍ଚଳବାସୀଙ୍କ ପକ୍ଷରୁ ଅଭିଯୋଗ ହେବା ପରେ ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶକଙ୍କୁ ଆବଶ୍ୟକ ତଦନ୍ତ କରି ରିପୋର୍ଟ ଦାଖଲ କରିବାକୁ ଉଚ୍ଚ ଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ହୋଇଛି। ଏହା ପୂର୍ବରୁ ଓଡ଼ିଶା ମହିଳା କମିଶନ ଉକ୍ତ ଅଭିଯୋଗ ଉପରେ ତଦନ୍ତ କରି ପଦକ୍ଷେପ ଗ୍ରହଣ କରିବାକୁ ଉଚ୍ଚଶିକ୍ଷା ବିଭାଗ ପ୍ରିନ୍ସିପାଲ ସେକ୍ରେଟାରୀଙ୍କୁ ଚିଠି କରିଛନ୍ତି। ଅଭିଯୋଗ ଅନୁସାରେ ଯାଜପୁର ଟାଉନ୍ ନିକଟ ଚିତାଳୋ ଡିଗ୍ରୀ କଲେଜର ୨୦୧୯-୨୦ ବର୍ଷଠାରୁ ଛାତ୍ରୀମାନଙ୍କଠାରୁ ଏକାଡେମୀ, ଟ୍ୟୁଶନ, ଅନର୍ସ, ସିଏଲ୍ସି, ଟିସି ଇତ୍ୟାଦି ବାବଦକୁ ଅର୍ଥ ଆଦାୟ କରାଯାଉଛି। ଏହି ଅର୍ଥ ବାବଦକୁ ୩୦୦ ଟଙ୍କାର ଏକ ଡୁପ୍ଲିକେଟ ରିସିପ୍ଟ ପ୍ରତ୍ୟେକ ଛାତ୍ରୀମାନଙ୍କୁ ଦିଆଯାଉଛି। ଏହି କଲେଜ ୨୦୦୦-୦୧ରେ ପ୍ରତିଷ୍ଠା ହୋଇଥିବାବେଳେ ରାଜ୍ୟ ସରକାରଙ୍କ ଦ୍ୱାରା ସ୍ବୀକୃତିପ୍ରାପ୍ତ ଏବଂ ଉକତ୍ଳ ବିଶ୍ୱବିଦ୍ୟାଳୟର ସହବନ୍ଧିତ ହୋଇଛି। ଏହାସହ ୱାର୍ଲଡ ବ୍ୟାଙ୍କର ସାହାଯ୍ୟପ୍ରାପ୍ତ ଏବଂ ଉଚ୍ଚଶିକ୍ଷା ବିଭାଗର ସିଏପିଏ ଅଧୀନରେ ରହିଛି। ତଥାପି ଛାତ୍ରୀମାନଙ୍କଠାରୁ ଅର୍ଥ ଆଦାୟ କରାଯାଇଥିବା ଅଭିଯୋଗ ହୋଇଛି। ସରକାରୀ ନିୟମ ଅନୁସାରେ ଉପରୋକ୍ତ ଫି’ଗୁଡିକ ଛାତ୍ରୀମାନଙ୍କ ପାଇଁ ଦେୟମୁକ୍ତ କରାଯାଇଛି। ତେଣୁ ଆଦାୟ ଅର୍ଥ ଗରିବ ଛାତ୍ରୀମାନଙ୍କୁ ଫେରସ୍ତ ଦେବାକୁ ଅଞ୍ଚଳବାସୀ ଦାବି କରିଛନ୍ତି। ଏହାସହ ବର୍ତ୍ତମାନର ମହିଳା ହଷ୍ଟେଲ ବିପଦପୂର୍ଣ୍ଣ ଅବସ୍ଥାରେ ରହିଛି। ବିଭିନ୍ନ କାନ୍ଥରେ ଫାଟ ସୃଷ୍ଟି ହୋଇଛି। ହଷ୍ଟେଲର ପରିମଳ ଓ ପରିବେଶ ଠିକ୍ ରହୁନାହିଁ। ଅନ୍ତେବାସୀଙ୍କଠାରୁ ମୋଟା ଅଙ୍କର ଅର୍ଥ ଆଦାୟ ହେଉଛି, କିନ୍ତୁ ସେହି ତୁଳନାରେ ଉପଯୁକ୍ତ ସେବା ପ୍ରଦାନ କରାଯାଇ ପାରୁନାହିଁ। ତେଣୁ ଆବଶ୍ୟକ ତଦନ୍ତ କରି କଲେଜ କର୍ତ୍ତୃପକ୍ଷଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଯାଜପୁର ଜିଲାପାଳଙ୍କ ସମେତ ଉଚ୍ଚଶିକ୍ଷା ବିଭାଗ ପ୍ରିନ୍ସିପାଲ ସେକ୍ରେଟାରୀ, ଉଚ୍ଚ ଶିକ୍ଷା ବିଭାଗର ନିର୍ଦ୍ଦେଶକ, ଆଞ୍ଚଳିକ ଶିକ୍ଷା ନିର୍ଦ୍ଦେଶକଙ୍କୁ ଅନୁରୋଧ କରିଛନ୍ତି। ଅଞ୍ଚଳବାସୀଙ୍କ ଉକ୍ତ ଅଭିଯୋଗ ଏବଂ ରାଜ୍ୟ ମହିଳା କମିଶନରଙ୍କ ପତ୍ର ଆଧାରରେ ଉଚ୍ଚଶିକ୍ଷା ବିଭାଗର ସ୍ବତନ୍ତ୍ର ସଚିବ ରମାକାନ୍ତ ନାୟକ ତୁରନ୍ତ ତଦନ୍ତ କରି ବିହିତ ପଦକ୍ଷେପ ଗ୍ରହଣ କରିବାକୁ ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶକଙ୍କୁ ମଙ୍ଗଳବାର ନିର୍ଦ୍ଦେଶ ଜାରି କରିଛନ୍ତି।
