କୋକସରା,୨୧।୮(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଳକ ବିଜୁ ଏକ୍ସପ୍ରେସ ୱେ ଏବଂ ୨୬ ନମ୍ବର ଜାତୀୟ ରାଜପଥରେ ୧୫ରୁ ଊଦ୍ଦର୍ବ ଟୁରିଷ୍ଟ ବସ୍ ବେଆଇନ ଭାବେ ଯାତ୍ରୀବାହୀ ବସ୍ ଭଲି ଟିକଟ କାଟି ରାଜ୍ୟ ବାହାରକୁ ଗଡୁଛି। ତେବେ ଏହି ବସ୍ଗୁଡ଼ିକ ବିଭିନ୍ନ ସମୟରେ ଯାତ୍ରୀଙ୍କୁ ହଇରାଣ କରିବା ସହ ଗନ୍ତବ୍ୟ ସ୍ଥଳକୁ ନ ନେଇ ଅଧା ବାଟରେ ଛାଡି ଦେଉଥିବା ଯାତ୍ରୀମାନେ ଅଭିଯୋଗ କରିଛନ୍ତି।
ଶୁକ୍ରବାର ଏକ ଟୁରିଷ୍ଟ ବସ ହାଇଦ୍ରାବାଦରୁ ପ୍ରବାସୀ ଶ୍ରମିକଙ୍କୁ ଆଣୁଥିବା ବେଳେ ସେମାନଙ୍କ ଗନ୍ତବ୍ୟ ସ୍ଥଳରେ ଛାଡ଼ିବା ପରିବର୍ତ୍ତେ ଆମପାଣି ବସ୍ ଷ୍ଟପରେ ଓହ୍ଲାଇ ଦେଇଥିଲା। ଏନେଇ ଘଟଣାସ୍ଥଳ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଖବର ପାଇ ଆମପାଣି ପୋଲିସ ଘଟଣାସ୍ଥଳରେ ପହଞ୍ଚି ମାମଲାର ହସ୍ତକ୍ଷେପ କରି ପ୍ରବାସୀ ଶ୍ରମିକଙ୍କୁ ଗନ୍ତବ୍ୟ ସ୍ଥଳକୁ ପଠାଇଥିଲା।
ଏନେଇ ‘ଧରିତ୍ରୀ’ ସମେତ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଶୁକ୍ରବାର କଳାହାଣ୍ଡି ଆଞ୍ଚଳିକ ପରିବହନ ବିଭାଗ ତତ୍ପରତା ଦେଖାଇଛି। ଆମପାଣିଠାରେ ଶୁକ୍ରବାର ବିଭାଗ ପକ୍ଷରୁ କଡ଼ାକଡ଼ି ଯାଞ୍ଚ କରିବା ପରେ ୨ଟି ଘରୋଇ ବସ୍କୁ ୧୦ ହଜାର ଟଙ୍କା ଲେଖାଏ ଫାଇନ କରାଯାଇଛି।
ଉକ୍ତ ବସଗୁଡ଼ିକ ଟୁରିଷ୍ଟ ପରମିଟ ଥିବା ବେଳେ ସେମାନେ ସାଧାରଣତଃ ଯାତ୍ରୀବାହୀ ବସ ଭଲି ଲୋକଙ୍କୁ ଟିକଟ କାଟି ହାଇଦ୍ରାବାଦ, ବେଙ୍ଗାଲୁରୁ ଭଲି ସହରକୁ ନେଉଥିଲେ। ଏପରିକି ବସ୍ରେ ଆବଶ୍ୟକଠାରୁ ଅଧିକ ଯାତ୍ରୀଙ୍କୁ ଠେଲାପେଲା କରି ବସ୍ରେ ଚଢାଉଥିଲେ। ତେବେ ଆଞ୍ଚଳିକ ପରିବହନ ବିଭାଗର ଯାଞ୍ଚ ହେଉଥିବା ଜାଣିବା ପରେ ବେଆଇନ ଭାବେ ଗଡୁଥିବା ଅନେକ ବସ ଅନେକ ସ୍ଥାନରେ ଅଟକି ଯାଇ ଆସି ନ ଥିବାବେଳେ ବେଆଇନ ବସ୍ ଚଳାଚଳ କରୁଥିବା ଅସାଧୁ ମାଲିକଙ୍କ ମଧ୍ୟରେ ଛନକା ପଶିଯାଇଛି। ଏହି ଚଢାଉରେ ଏମଭିଆଇ ଅଧିକାରୀ ମିଥୁନ ପ୍ରଧାନଙ୍କ ନେତୃତ୍ୱରେ କନଷ୍ଟେବଳ ସବ୍ୟସାଚୀ ମିଶ୍ର, ଦେବବ୍ରତ ସା ପ୍ରମୁଖ ସାମିଲ ହୋଇଥିଲେ।
