ବାଲେଶ୍ୱର ଅଫିସ, ୧୫।୬-ବାଲେଶ୍ୱର ସହରସ୍ଥିତ ନୂଆବଜାର ଅଞ୍ଚଳ ଏବେ ବିଦେଶୀ ପକ୍ଷୀଙ୍କ କିଚିରିମିଚିରି ଶବ୍ଦରେ ପ୍ରକମ୍ପିତ ହୋଇଉଠୁଛି। ସହର ନିକଟରେ କୌଣସି ହ୍ରଦ କିମ୍ବା ମୁହାଣ ନ ଥିଲେ ମଧ୍ୟ ବଡ଼ ବଡ଼ ଗଛରେ ପ୍ରାୟ ୭ ପ୍ରଜାତିର ୫ଶହରୁ ଊର୍ଦ୍ଧ୍ୱ ବିଦେଶୀ ପକ୍ଷୀ ବସା ବାନ୍ଧି ରହିଛନ୍ତି। ଫଳରେ ଜନଗହଳି ପରିବେଶରେ ଏହା ନିଆରା ଅନୁଭବ ଆଣି ଦେଇଛି।
ବିଶେଷ କରି ଜିଲାର ପଦ୍ମତୋଳା ହ୍ରଦ, ରିଷିଆ, କୁଲଡ଼ିହା, ତାଳସାରୀ, ସୁବର୍ଣ୍ଣରେଖା ମୁହାଣ, ଚାନ୍ଦିପୁର ଆଇଟିଆର୍ କ୍ୟାମ୍ପସ୍ ଓ ଚାନ୍ଦିପୁର ବେଳାଭୂମିରେ ଶୀତଦିନେ ବିଦେଶୀ ପକ୍ଷୀଙ୍କ ଆଗମନ ହୋଇଥାଏ। କିନ୍ତୁ କିଛିବର୍ଷ ହେବ ନୂଆବଜାର ଅଞ୍ଚଳରେ ପ୍ରତିଦିନ ସକାଳ ଓ ସନ୍ଧ୍ୟାରେ ଏହି ପକ୍ଷୀଙ୍କୁ ଦେଖିବାକୁ ମିଳୁଛି। ତେବେ ସହର ଭିତରେ ଏତେସଂଖ୍ୟକ ପକ୍ଷୀ ରହୁଥିବାରୁ ଶିକାରୀ ସେମାନଙ୍କୁ ମାରିବାକୁ ପ୍ରୟାସ କରୁଛନ୍ତି। ପକ୍ଷୀମାନଙ୍କ ଲାଗି ସୁରକ୍ଷା ଓ ପାନୀୟ ଜଳ ବ୍ୟବସ୍ଥା କରିବାକୁ ପରିବେଶବିତ୍ମାନେ ଦାବି କରିଛନ୍ତି। ସେହିପରି ସହରର ଅନ୍ୟ ଏକ ଜାଗା ହରିପୁର ଅଞ୍ଚଳରେ ମଧ୍ୟ ପ୍ରାୟ ୨ହଜାର ପକ୍ଷୀ ଆଶ୍ରୟ ନେଇଛନ୍ତି। ଉଭୟ ସ୍ଥାନରେ ପକ୍ଷୀମାନଙ୍କ ସୁରକ୍ଷା ବ୍ୟବସ୍ଥା ପାଇଁ ପରିବେଶବିତ୍ ତଥା ଶିକ୍ଷକ ଗଙ୍ଗାନାରାୟଣ ପାଢ଼ୀ ଓ ସ୍ଥାନୀୟ ବାସିନ୍ଦା ଅରୁଣ କୁମାର କୁଣ୍ଡୁ ଦାବି କରିଛନ୍ତି।
ଏ ସମ୍ପର୍କରେ ବାଲେଶ୍ୱର ସଦର ରେଞ୍ଜର ଗଣେଶ ପ୍ରସାଦ ଲେଙ୍କା କହିଛନ୍ତି, ବୁଢ଼ାବଳଙ୍ଗ ନଦୀ କୂଳରେ ଏହି ସହର ଅବସ୍ଥିତ ହୋଇଥିବାରୁ କିଛି ବିଦେଶୀ ପକ୍ଷୀ ସୁରକ୍ଷିତ ମନେ କରି ଗଛ ଉପରେ ବସା ବାନ୍ଧି ରହୁଛନ୍ତି। ଅଳ୍ପ ଦୂରରେ ସମୁଦ୍ରକୁ ମଧ୍ୟ ଦିନ ବେଳେ ଉଡ଼ିଯାଇ ନିଜର ଖାଦ୍ୟ ସଂଗ୍ରହ କରିପାରୁଛନ୍ତି। ଏହି ପକ୍ଷୀଗୁଡ଼ିକ ସାଧାରଣତଃ ବଗ ଜାତୀୟ। ସେମାନଙ୍କର ଥଣ୍ଟ ହଳଦିଆ। ସେମାନେ ବିଦେଶୀ ପ୍ରଜାତିର ବୋଲି ଚିହ୍ନଟ ହୋଇଛନ୍ତି। ଏମାନଙ୍କ ସୁରକ୍ଷା ପାଇଁ ବିଭାଗ ପକ୍ଷରୁ ପଦକ୍ଷେପ ନିଆଯାଉଛି। ସଂଖ୍ୟା ଦୃଷ୍ଟିରୁ ଗତବର୍ଷଠାରୁ ଚଳିତବର୍ଷ ଏହାର ସଂଖ୍ୟା ଅଧିକ। ବାତ୍ୟା ‘ୟାସ୍’ ଦ୍ୱାରା ସେମାନଙ୍କ ଭାଙ୍ଗିଯାଇଥିବାରୁ ନୂଆ ବସା ତିଆରି କରିବା ବେଳେ ସେମାନେ ଜୋରରେ କୋଳାହୋଳ କରୁଛନ୍ତି। ସେମାନଙ୍କ ସୁରକ୍ଷା ପାଇଁ ଯଥେଷ୍ଟ ନଜର ରଖାଯାଇଛି।
