ଭୋପାଳ,୨୦।୨: ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନଙ୍କୁ ମଶା କାମୁଡ଼ିବାରୁ ଜଣେ ପିଡବ୍ଲ୍ୟୁଡି ନିର୍ବାହୀ ଯନ୍ତ୍ରୀଙ୍କୁ ରିପୋର୍ଟ ତଲବ କରାଯିବା ସହିତ କାହିଁକି ତାଙ୍କର ୨ ବର୍ଷର ଦରମା ବୃଦ୍ଧି ରୋକା ଯିବ ନାହିଁ ସେ ନେଇ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ମୁଖ୍ୟମନ୍ତ୍ରୀ ସିଦ୍ଧିଗସ୍ତ ସମୟରେ ସର୍କିଟ୍ ହାଉସରେ ରାତ୍ରିଯାପନ କରିଥିଲେ। ତେବେ ସେଠାରେ ପ୍ରବଳ ମଶା ଏବଂ ପାଣିଟାଙ୍କି ଭର୍ତ୍ତି ହୋଇ ପାଣି ତଳେ ପଡୁଥିବାରୁ ମୁଖ୍ୟମନ୍ତ୍ରୀ ଉଜାଗରରେ ବିତାଇଥିଲେ। ଏନେଇ ରଓ୍ବୋ ଡିଭିଜିନାଲ କମିଶନର ରାଜେଶ କୁମାର ଜୈନ ପିଡବ୍ଲ୍ୟୁଡି ନିର୍ବାହୀ ଯନ୍ତ୍ରୀ ଦେବେନ୍ଦ୍ର କୁମାର ସିଂଙ୍କୁ ଏଭଳି ନିର୍ଦ୍ଦେଶ ଜାରି କରିଛନ୍ତି। ପମ୍ପ୍ ବନ୍ଦ କରିବାକୁ ନିୟୋଜିତ ଥିବା କର୍ମଚାରୀ ଭୁଲି ଯାଇଥିବାରୁ ପାଣି ଟାଙ୍କି ଭର୍ତ୍ତିି ହୋଇ ପାଣି ଉଛୁଳି ତଳେ ପଡିଥିବା ଜଣାପଡ଼ିଛି। ମୁଖ୍ୟମନ୍ତ୍ରୀ ରାତ୍ରଯାପନ କରିଥିବା ପ୍ରକୋଷ୍ଠରେ ଭୋର୍ ୨ଟା ୩୦ରେ ମଶାମରା ତେଲ ସ୍ପ୍ରେ କରାଯାଇଥିଲା। ମାତ୍ର ଏହା ପରେପରେ ଭୋର୍ ୪ଟାରୁ ପାଣି ଟାଙ୍କିରୁ ପାଣି ପଡ଼ିବା ଆରମ୍ଭ ହୋଇଥିଲା। ଶବ୍ଦରେ ମୁଖ୍ୟମନ୍ତ୍ରୀ ଶୋଇ ପାରି ନ ଥିଲେ। ଶେଷରେ ବାଧ୍ୟ ହୋଇ ମୁଖ୍ୟମନ୍ତ୍ରୀ ନିଜେ ପମ୍ପ୍ ବନ୍ଦ କରିଥିଲେ। ଏବେ ପିଡବ୍ଲ୍ୟୁଡି ନିର୍ବାହୀ ଯନ୍ତ୍ରୀଙ୍କୁ ଏହାର ଉତ୍ତର ଦେବାକୁ ପଡ଼ିବ। ଏହି ଘଟଣାରେ ବାବୁଲାଲ ଗୁପ୍ତା ନାମକ ଜଣେ କର୍ମଚାରୀଙ୍କୁ ନିଲମ୍ବିତ କରାଯାଇଥିବା କୁହାଯାଉଛି। ଏନେଇ ସୋସିଆଲ ମିଡ଼ିଆରେ ମଧ୍ୟ ଚର୍ଚ୍ଚା ଜାରି ରହିଛି।
