ଗୋପ,୨୬।୫(ଡି.ଏନ୍.ଏ.): ପୁରୀ ଜିଲା ଗୋପ ପଞ୍ଚାୟତର କୁଶୁପୁରୁ ଗ୍ରାମ ନିକଟରୁ ବାହାରିବାକୁ ଥିବା ପ୍ରାକୃତିକ ଗ୍ୟାସ ସନ୍ଧାନ ଏବେ ଆଶା ମଉଳିଛି। ଅଏଲ ଇଣ୍ତିଆ କମ୍ପାନୀ ପକ୍ଷରୁ କରାଯାଉଥିବା ସେସମିକ ସର୍ଭେରେ ଖନନ ପାଇଁ ଲଗାଯାଇଥିବା ରିଗ୍ ମେଶିନରୁ ବହୁ ତଳ ପର୍ଯ୍ୟନ୍ତ ଖନନ ସତ୍ତ୍ୱେ କୌଣସି ତୈଳର ସନ୍ଧାନ ନ ମିଳି ପଥର ବାଜିବାରୁ ଶେଷରେ କାର୍ଯ୍ୟ ବନ୍ଦ କରାଯାଇଛି। କମ୍ପାନୀ ପକ୍ଷରୁ ଏବେ ଲଗାଯାଇଥିବା ଅତ୍ୟାଧୁନିକ ରିଗ୍ ମେଶିନଗୁଡ଼ିକୁ ଖୋଲି ଅନ୍ୟତ୍ର ଗ୍ରାମକୁ ଯିବା ପାଇଁ ବ୍ୟବସ୍ଥା ଆରମ୍ଭ ହୋଇଛି। ପ୍ରକାଶ ଯେ, ଅଏଲ ଇଣ୍ତିଆ କମ୍ପାନୀ ପକ୍ଷରୁ ୨୦୨୦ ମସିହାରୁ ଜିଲାର ବିଭିନ୍ନ ସ୍ଥାନରେ ପ୍ରାକୃତିକ ଗ୍ୟାସ ସନ୍ଧାନ ଲାଗି ଖନନ କାର୍ଯ୍ୟ କରାଯାଇଥିଲା। ପରେ ଗୋପର କୁଶୁପୁରୁ ଓ ମହଲପଡା ପଞ୍ଚାୟତର ଚିତେରା ଗ୍ରାମ ନିକଟରେ ପର୍ଯ୍ୟାପ୍ତ ପରିମାଣର ପ୍ରାକୃତିକ ଗ୍ୟାସ ଥିବା ସନ୍ଧାନ ମିଳିଥିଲା। ଏହି ପ୍ରାକୃତିକ ଗ୍ୟାସ ସନ୍ଧାନ ସାଟେଲାଇଟ ଚିତ୍ର ଦ୍ବାରା ମଧ୍ୟ ଜଣାପଡିଥିଲା। ଫଳରେ କମ୍ପାନୀ ପକ୍ଷରୁ କୁଶୁପୁରୁରେ ସନ୍ଧାନ ମିଳିଥିବା ଜମି ଅଧିଗ୍ରହଣ କରାଯାଇ କେତେଜଣ ଚାଷୀଙ୍କୁ ୩ ବର୍ଷ ପାଇଁ ୯୭ ଲକ୍ଷ ଟଙ୍କା କ୍ଷତିପୂରଣ ଦିଆଯିବା ପରେ କାର୍ଯ୍ୟ ଆରମ୍ଭ କରାଯାଇଥିଲା। ବିଭିନ୍ନ ରାଜ୍ୟରୁ କେତେକ ଅତ୍ୟାଧୁନିକ ମେଶିନ ଅଣାଯାଇଥିଲା। ଏହି ଖନନ କାର୍ଯ୍ୟରେ ମୁଖ୍ୟ ଅତ୍ୟାଧୁନିକ ରିଗ ମେଶିନ ଆସିବା ପରେ ଅଏଲ ଇଣ୍ତିଆ କମ୍ପାନୀ ପକ୍ଷରୁ ବିଧାୟକ ସମୀର ରଞ୍ଜନ ଦାଶଙ୍କ ଦ୍ୱାରା ଖନନ କାର୍ଯ୍ୟ ଶୁଭାରମ୍ଭ କରାଯାଇଥିଲା। ୩ ହଜାର ମିଟର ତଳେ ପର୍ଯ୍ୟାପ୍ତ ପରିମାଣର ପ୍ରାକୃତିକ ଗ୍ୟାସ ସହିତ ପେଟ୍ରୋଲ ଡିଜେଲ ଥିବାର ସୂଚନା ମିଳିଥିଲା। ହେଲେ ଏହି ଅତ୍ୟାଧୁନିକ ରିଗ ମେଶିନ ମାତ୍ର ୧୨ ଶହ ମିଟର ଯାଏଁ ବାରମ୍ବାର ଖନନ କାର୍ଯ୍ୟ କରିବା ପରେ ବିରାଟକାୟ ପଥର ବାଧକ ସାଜିବା ସହିତ ରିଗ ମେଶିନ କାର୍ଯ୍ୟ କରିପାରି ନ ଥିଲା। ଏପରି ଅବସ୍ଥା ଉପୁଜିବା ପରେ ଏବେ ଅଏଲ ଇଣ୍ତିଆ କମ୍ପାନୀ ପକ୍ଷରୁ ସମସ୍ତ କାର୍ଯ୍ୟକୁ ବନ୍ଦ କରାଯାଇଛି। ମାତ୍ର ଏବେ ଏହି ଅତ୍ୟାଧୁନିକ ମେଶିନଗୁଡିକୁ ଗୋପ ବ୍ଲକ ଅନ୍ତର୍ଗତ ମହଲପଡା ପଞ୍ଚାୟତର ଚିତେରା ଗ୍ରାମ ନିକଟରେ ସନ୍ଧାନ ମିଳିଥିବା ପ୍ରାକୃତିକ ଗ୍ୟାସ ସ୍ଥାନକୁ ଯାଉଥିବା ଜଣାପଡିଛି। ଏ ପ୍ରସଙ୍ଗରେ ଅଏଲ ଇଣ୍ତିଆ କମ୍ପାନୀ କର୍ତ୍ତୃପକ୍ଷଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ଉତ୍ତର ମିଳିପାରି ନାହିଁ। କିନ୍ତୁ ଯାହା ସୂଚନା ମିଳିଛି ମହଲପଡା ପଞ୍ଚାୟତର ଚିତେରା ଗ୍ରାମ ନିକଟରେ ପ୍ରାକୃତିକ ଗ୍ୟାସ ସନ୍ଧାନ ମିଳିଥିବା ସ୍ଥାନରେ କାର୍ଯ୍ୟ ଚାଲୁ ରହିବ। ପରେ ଗୋପର କୁଶୁପୁରୁ ନିକଟରେ ବାଧକ ସାଜିଥିବା ପଥରକୁ କିପରି ଭଙ୍ଗାଯିବ ସେ ସମ୍ପର୍କରେ ଅଏଲ୍ ଇଣ୍ତିଆ କମ୍ପାନୀ ପକ୍ଷରୁ ଆଲୋଚନା ପରେ ଯାହା କିଛି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ମିଳିଛି।
