ନୂଆଦିଲ୍ଲୀ,୧୯ା୪(ପି.ଟି.):ଦେଶରେ ଲୋକ ସଭା ନିର୍ବାଚନ ଚାଲିଥିବାବେଳେ ଇଲେକ୍ଟ୍ରୋନିକ୍ ଭୋଟିଂ ମେଶିନ୍ରେ ଜାଲିଆତି ଅଭିଯୋଗକୁ ନେଇ ବିବାଦ ଲାଗିରହିଛି। ସେଥିପାଇଁ ଭୋଟର ଭେରିଫାଏବଲ୍ ପେପର ଅଡିଟ୍ ଟ୍ରେଲ୍ (ଭିଭିପିଏଟି) ସ୍ଲିପ୍ଗୁଡ଼ିକର ସମ୍ପୂର୍ଣ୍ଣ ଯାଞ୍ଚ କରିବା ପାଇଁ ହୋଇଥିବା ଆବେଦନ ଉପରେ ସର୍ବୋଚ୍ଚ ଅଦାଲତ ଗୁରୁବାର ଶୁଣାଣି ଶେଷ କରି ରାୟ ସଂରକ୍ଷିତ ରଖିଛନ୍ତି। ଶୁଣାଣି ବେଳେ କେରଳରେ ମକ୍ ଭୋଟିଂ ସମୟରେ ଇଭିଏମ୍ରେ ଭାଜପା ସପକ୍ଷରେ ଅତିରିକ୍ତ ଭୋଟ ରେକର୍ଡ ହୋଇଥିବାର ଅଭିଯୋଗ ହୋଇଥିଲା। ଏହାର ଯାଞ୍ଚ କରିବାକୁ ସୁପ୍ରିମକୋର୍ଟ ଭାରତର ନିର୍ବାଚନ କମିଶନ (ଇସିଆଇ)ଙ୍କୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ସଞ୍ଜୀବ ଖାନ୍ନା ଏବଂ ଦୀପଙ୍କର ଦତ୍ତାଙ୍କ ଖଣ୍ଡପୀଠ ଶୁଣାଣି କରିବା ବେଳେ ଏକ ଗଣମାଧ୍ୟମ ରିପୋର୍ଟ ଆଧାରରେ ଉପରୋକ୍ତ ନିର୍ଦ୍ଦେଶ ଦେଇଛନ୍ତି। ଏହା ନିର୍ବାଚନ ପ୍ରକ୍ରିୟା ହୋଇଥିବାରୁ ପବିତ୍ରତା ରହିବା ଜରୁରୀ। ଯାହା ଆଶା କରାଯାଉଥିଲା ତାହା ହେଉନାହିଁ, ଏଭଳି ଆଶଙ୍କା କାହା ମନରେ ରହିବା ଉଚିତ ନୁହେଁ ବୋଲି ସର୍ବୋଚ୍ଚ ଅଦାଲତ ଟିପ୍ପଣୀ ଦେଇଛନ୍ତି।
ଆବେଦନକାରୀ ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ଆଇନଜୀବୀ ପ୍ରଶାନ୍ତ ଭୂଷଣ ଉପସ୍ଥିତ ରହି ମନୋରମା ଅନ୍ଲାଇନରେ ପ୍ରକାଶିତ ରିପୋର୍ଟ ସମ୍ପର୍କରେ ଖଣ୍ଡପୀଠଙ୍କ ଦୃଷ୍ଟି ଆକର୍ଷଣ କରିଥିଲେ। ଉକ୍ତ ରିପୋର୍ଟ ଅନୁଯାୟୀ କେରଳର କସରଗୋଡ ନିର୍ବାଚନ ମଣ୍ଡଳୀରେ ଇଭିଏମ୍ର
ମକ୍ ପୋଲିଂ କରାଯାଇଥିଲା। ଅନୂ୍ୟନ ୪ଟି ଇଭିଏମ୍ରେ ଭୁଲ୍ବଶତଃ ଭାଜପା ସପକ୍ଷରେ ଅଧିକ ଭୋଟ ଯାଇଥିବା ନେଇ ଉଭୟ ବାମ ଗଣତାନ୍ତ୍ରିକ ମେଣ୍ଟ (ଏଲ୍ଡିଏଫ୍) ଏବଂ ସଂଯୁକ୍ତ ଗଣତାନ୍ତ୍ରିକ ମେଣ୍ଟ (ୟୁଡିଏଫ୍) ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଭିଭିପିଏଟିରେ ଲାଗିଥିବା ଅସ୍ବଚ୍ଛ କାଚ ବଦଳରେ ସ୍ବଚ୍ଛ କାଚ ଲଗାଇବାକୁ ମଧ୍ୟ ଆବେଦନକାରୀମାନେ ଦାବି କରିଛନ୍ତି। ଫଳରେ ଇଭିଏମ୍ରେ ଭୋଟ ଦେବା ସମୟରେ ୭ ସେକେଣ୍ଡ ପାଇଁ ଭିଭିପିଏଟିର ଆଲୋକ ଜଳୁଥିବାବେଳେ ଭୋଟରମାନେ ସ୍ବଚ୍ଛ କାଚ ଉକ୍ତ ସ୍ଲିପ୍କୁ ଦେଖିପାରିବେ ଏବଂ ସେମାନଙ୍କ ଭୋଟ ପ୍ରକୃତ ପ୍ରାର୍ଥୀଙ୍କ ପାଖକୁ ଯାଇଛି କି ନାହିଁ ନିଶ୍ଚିତ ହୋଇପାରିବେ। ନିର୍ବାଚନ କମିଶନଙ୍କ ପକ୍ଷରୁ ବରିଷ୍ଠ ଆଇନଜୀବୀ ମନୀନ୍ଦର ସିଂ ଏବଂ ଆବେଦନକାରୀମାନଙ୍କ ତରଫରୁ ପ୍ରଶାନ୍ତ ଭୂଷଣ, ଗୋପାଳ ଶଙ୍କରନାରାୟଣନ ଓ ଅନ୍ୟ ଆଇନଜୀବୀମାନେ ଉପସ୍ଥିତ ଥିଲେ।
ତେବେ ମକ୍ ପୋଲିଂ ବେଳେ ୪ଟି ଇଭିଏମ୍ରେ ଭାଜପାକୁ ଗୋଟିଏ ଲେଖାଏ ଅଧିକ ଭୋଟ ଯାଇଥିବା ରିପୋର୍ଟକୁ ଗୁରୁବାର ନିର୍ବାଚନ କମିଶନ ଖଣ୍ଡନ କରିଛନ୍ତି। ଏଭଳି ଖବର ସମ୍ପୂର୍ଣ୍ଣ ମିଥ୍ୟା ବୋଲି ଇସି ଅଧିକାରୀ ନିତେଶ କୁମାର ସୁପ୍ରିମକୋର୍ଟଙ୍କୁ ଜଣାଇଥିଲେ। ଜିଲାପାଳଙ୍କଠାରୁ ମିଳିଥିବା ଅଭିଯୋଗକୁ ଆମେ ଯାଞ୍ଚ କରିଛୁ ଏବଂ ତାହା ମିଛ ବୋଲି ଜଣାପଡ଼ିଥିବା ନିତେଶ କହିଥିଲେ। ମଙ୍ଗଳବାର ଶୁଣାଣି ବେଳେ ଇଭିଏମ୍ ବଦଳରେ ପୁଣିଥରେ ବାଲଟ ପେପର ବ୍ୟବସ୍ଥାକୁ ଫେରିବା ପାଇଁ ହୋଇଥିବା ଦାବିକୁ ସୁପ୍ରିମକୋର୍ଟ ଅଗ୍ରାହ୍ୟ କରିଦେଇଥିଲେ।
