ଗୋପବନ୍ଧୁ ନଗର,୧୮।୧୨(ଡି.ଏନ.ଏ): ଗୋପବନ୍ଧୁ ନଗର ବ୍ଲକ୍ ଆଦିବାସୀ ଅଧୂଷିତ ଅଞ୍ଚଳରେ ୯୦ ପ୍ରତିଶତ ଲୋକେ କୃଷି ଉପରେ ନିର୍ଭରଶୀଳ। କୃଷି ମୁଖ୍ୟ ଓ ପ୍ରଧାନ ଜୀବିକା। ତେବେ ଡିସେମ୍ବର ଅଧା ହୋଇ ଯାଇଥିଲେ ମଧ୍ୟ ସରକାରୀସ୍ତରରେ ମଣ୍ଡି ଖୋଲିନାହିଁ। ଫଳରେ ସାଧାରଣ ଖର୍ଚ୍ଚ ପାଇଁ ଚାଷୀ ଗାଁ ଗଣ୍ଡାରେ ଲାଗିଥିବା ଧାନ କଣ୍ଟା ଗୁଡ଼ିକରେ ଶାଗମାଛ ଦରରେ ବିକିବାକୁ ବାଧ୍ୟ ହେଉଛନ୍ତି। ମଣ୍ଡି ନ ଖୋଲିବାର ସୁଯୋଗ ନେଇ ଗାଁ ଦଲାଲଙ୍କ ସହାୟତାରେ ବାହାର ରାଜ୍ୟର ବେପାରୀ ଟ୍ରକ ଟ୍ରକ ଧାନ ଚାଲାଣ କରୁଛନ୍ତି। ଚାଷୀ ମହେଶ ଦାସ ଓ ଗିରିଧର ସିଂ କହିଛନ୍ତି, ଚାଷରେ ବହୁତ ପଇସା ଖର୍ଚ୍ଚ ହୋଇଛି। ଏବେ ମେସିନ ଲଗାଇ ଧାନ କଟାଯାଇଛି। ଏଥିସହ ମୁଲିଆ ମଜୁରୀ ଟଙ୍କା ବାକି ରହିଛି। ଏ ପର୍ଯ୍ୟନ୍ତ ସରକାରୀ ମଣ୍ଡି ଖୋଲି ନାହିଁ। କିନ୍ତୁ ଘର ଚଳାଇବାକୁ ଓ ବାକି ସୁଜିବାକୁ ବାଧ୍ୟ ହୋଇ ୧୩୫୦ ଟଙ୍କାରେ ଧାନ ବିକିବାକୁ ପଡୁଛି। ଏପରି ଭାବେ ୨୦ ପ୍ରତିଶତ ଧାନ ଗାଁମାନଙ୍କରେ ବିକ୍ରି ସରିଲାଣି। ମୟୂରଭଞ୍ଜ ଜିଲାରେ ଆସନ୍ତା ୨୦ରେ ମଣ୍ଡି ଖୋଲାଯିବ ବୋଲି ଶୁଣିବାକୁ ମିଳୁଥିବା ବେଳେ ଉକ୍ତ ବ୍ଲକ୍ରେ କେବେ ଶୁଭାରମ୍ଭ ହେବ ତାହା ସଠିକ୍ ଜଣାପଡ଼ିନାହିଁ। ଚଳିତ ବର୍ଷ ଗୋପବନ୍ଧୁ ନଗର ବ୍ଲକ୍ର ମୋଟ ୩୨୯୬ ଜଣ ଚାଷୀଙ୍କର ପଞ୍ଜୀକରଣ ହୋଇଛି। ସେଥି ମଧ୍ୟରୁ କୁଶଳଦା ଲ୍ୟାମ୍ପସର ୯୭୮, ପଶୁଦା ଲ୍ୟାମ୍ପସର ୧୨୪୭ ଓ ଖୁଣ୍ଟା ଲ୍ୟାମ୍ପସର ୧୦୭୧ ଜଣ ପଞ୍ଜୀକରଣ କରିଛନ୍ତି। ଗତ ବର୍ଷ ୧୨୭ ହଜାର କ୍ବିଣ୍ଟାଲ ଧାନ କିଣାଯାଇଥିବା ବେଳେ ଚଳିତ ବର୍ଷ ୧୬୫ ହଜାର କ୍ବିଣ୍ଟାଲକୁ ବୃଦ୍ଧି ପାଇବ ବୋଲି ଜଣାପଡ଼ିଛି।
