ଲଣ୍ଡନ, ୨୦।୧୦: ପୃଥିବୀରେ କରୋନା ମହାମାରୀ ସଂକ୍ରମଣ ନେଇ ଆତଙ୍କ ଦେଖାଦେଇଛି। ଏପରିସ୍ଥଳେ ବ୍ରିଟେନ୍ର ବରିଷ୍ଠ ବୈଜ୍ଞାନିକ ପାଟ୍ରିକ୍ ଓ୍ବାଲେସ୍ଙ୍କ ମନ୍ତବ୍ୟ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ପାଟ୍ରିକ୍ କହିଛନ୍ତି ଯେ, ପ୍ରତିଷେଧକ ଟିକା ନେଲେ ବି କରୋନା ମହାମାରୀ ସଂକ୍ରମଣରୁ ଦୂରେଇ ରହିବା ସମ୍ଭବ ହେବ ନାହିଁ। ପୃଥିବୀରେ ସମ୍ପ୍ରତି ୧୫୦ଟି ପାଖାପାଖି କରୋନା ଟିକା ଉପରେ ପରୀକ୍ଷା ଜାରି ରହିଛି। ଆସନ୍ତା ୨୦୨୧ ବର୍ଷ ମାର୍ଚ୍ଚ ସୁଦ୍ଧା କରୋନା ଟିକା ଆସିବାର ସମ୍ଭାବନା ଥିବା ସେ କହିଛନ୍ତି। ଆଗାମୀ ଦିନରେ କରୋନାର ଚିକିତ୍ସା ସାଧାରଣ ଜ୍ୱର ଭାବେ କରାଯିବ। ସମ୍ପୂର୍ଣ୍ଣ ଭାବେ କରୋନା ସଂକ୍ରମଣକୁ ରୋକି ପାରୁଥିବା ଟିକା ପ୍ରସ୍ତୁତି କରିବା କଷ୍ଟକର ବୋଲି ସେ କହିଛନ୍ତି। ସଂକ୍ରମଣ ବଢ଼ିବା ସହିତ ଧୀରେଧୀରେ ଏହା ଏକ ସାଧାରଣ ସ୍ବାସ୍ଥ୍ୟ ସମସ୍ୟା ପାଲଟିବ । ଟିକା ଦ୍ୱାରା ସଂକ୍ରମଣ ଆଶଙ୍କା କମ୍ ହେବା ସହିତ ଗୁରୁତର ସମସ୍ୟା ସୃଷ୍ଟି ହେବ ନାହିଁ। ପାଟ୍ରିକ୍ କହିଛନ୍ତି, ଆଉ ୫ ମାସ ମଧ୍ୟରେ ଜଣାପଡ଼ିଯିବ ଟିକା କେତେଦୂର ଉପଯୋଗୀ ଏବଂ ଏହା କେତେ ସମୟ ପର୍ଯ୍ୟନ୍ତ ସୁରକ୍ଷା ଦେଇ ପାରିବ।
