ନୂଆଦିଲ୍ଲୀ,୧।୧: ସୁପ୍ରିମକୋର୍ଟଙ୍କ ୨୦୨୨ ନଭେମ୍ବର ୪ ରାୟ ଅନୁଯାୟୀ କର୍ମଚାରୀ ଭବିଷ୍ୟନିଧି ସଂଗଠନ (ଇପିଏଫ୍ଓ)ର ଯୋଗ୍ୟ ସଦସ୍ୟମାନେ ଉଚ୍ଚତର ପେନ୍ସନ ବିକଳ୍ପ ବାଛିପାରିବେ। ଏଥିପାଇଁ ବିକଳ୍ପ ଯୋଗାଇଦେବାକୁ ଇପିଏଫ୍ଓ କର୍ତ୍ତୃପକ୍ଷ ଏହାର କ୍ଷେତ୍ରୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଗତ ୨୯ ତାରିଖରେ ପ୍ରକାଶିତ ଇପିଏଫ୍ଓ ସର୍କୁଲାର ଅନୁଯାୟୀ ସୁପ୍ରିମକୋର୍ଟଙ୍କ ନିର୍ଦ୍ଦେଶନାମା କାର୍ଯ୍ୟକାରୀ କରିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ସୁପ୍ରିମକୋର୍ଟଙ୍କ ରାୟର ପାରା ୪୪(୯)ରେ ଥିବା ନିର୍ଦ୍ଦେଶାବଳୀ ନିର୍ଦ୍ଦିଷ୍ଟ ସମୟ ମଧ୍ୟରେ ଲାଗୁ କରିବାକୁ ଫିଲ୍ଡ ଅଫିସରମାନଙ୍କୁ କୁହାଯାଇଛି। ଇପିଏଫ୍ଓର ଏହି ନିଷ୍ପତ୍ତିର ବ୍ୟାପକ ପ୍ରଚାର କରାଇବାକୁ ସର୍କୁଲାରରେ କୁହାଯାଇଛି।
୨୦୨୨ ନଭେମ୍ବରରେ ସୁପ୍ରିମକୋର୍ଟ କର୍ମଚାରୀ ପେନ୍ସନ (ସଂଶୋଧନ) ଯୋଜନା, ୨୦୧୪କୁ କାଏମ ରଖିଥିଲେ। ୨୦୧୪ ଅଗଷ୍ଟ ୨୨ରେ କାର୍ଯ୍ୟକାରୀ ହୋଇଥିବା ଇପିଏସ୍ ସଂଶୋଧନ ଅନୁଯାୟୀ ପେନ୍ସନ ଯୋଗ୍ୟ ମାସିକ ବେତନ ସୀମା ୬,୫୦୦ରୁ ୧୫,୦୦୦ ଟଙ୍କାକୁ ବୃଦ୍ଧି କରାଯାଇଥିଲା। କର୍ମଚାରୀ ଏବଂ ନିଯୁକ୍ତିଦାତା ପ୍ରକୃତ ବେତନର ୮.୩୩ ପ୍ରତିଶତ ଇପିଏଫ୍ରେ ଯୋଗଦାନ ଲାଗି ବ୍ୟବସ୍ଥା କରାଯାଇଥିଲା। ସଂଶୋଧିତ ଯୋଜନା ଚୟନ ଲାଗି ସେତେବେଳେ ସମସ୍ତ ଇପିଏସ୍ ସଦସ୍ୟଙ୍କୁ ୬ ମାସ ସମୟ ଦିଆଯାଇଥିଲା। ଇପିଏସ୍-୯୫ ଅଧୀନରେ ଅଧିକ ପେନ୍ସନ ବିକଳ୍ପ ଚୟନ କରିବା ଲାଗି ସର୍ବୋଚ୍ଚ ଅଦାଲତ ଯୋଗ୍ୟ ସଦସ୍ୟମାନଙ୍କୁ ଆଉ ୪ ମାସ ସମୟ ଦେଇଥିଲେ। ସଂଶୋଧିତ ଯୋଜନା ଅନୁଯାୟୀ ମାସିକ ୧୫,୦୦୦ ଟଙ୍କା ପରେ ଅଧିକ ବେତନ ଲାଗି କର୍ମଚାରୀଙ୍କୁ ବେତନର ୧.୧୬ ପ୍ରତିଶତ ଯୋଗଦାନ ଦେବାକୁ ହେବ। ଏହାଦ୍ୱାରା ସମ୍ପୃକ୍ତ ସଦସ୍ୟ ଇପିଏଫ୍କୁ ଅଧିକ ଯୋଗଦାନ ଦେବା ସହ ଅଧିକ ପେନ୍ସନ ଓ ଅନ୍ୟାନ୍ୟ ସୁବିଧା ପାଇପାରିବେ। ଏଥିପାଇଁ ଯୋଗ୍ୟ ସଦସ୍ୟ ସେମାନଙ୍କ ନିଯୁକ୍ତିଦାତାଙ୍କ ସହ ମିଳିତ ଭାବେ ବର୍ଦ୍ଧିତ ସୁବିଧା ପାଇଁ ଆବେଦନ କରିବାକୁ ହେବ।
