ତାଳଚେର,୫।୩ (ମନୋଜ ନନ୍ଦ): ଅନୁଗୋଳ ଜିଲା ତାଳଚେରଠାରେ ଥିବା ତାଳଚେର ଥର୍ମାଲ ପାଓ୍ବାର ଷ୍ଟେଶନ (ଟିଟିପିଏସ୍)କୁ ଅଧିଗ୍ରହଣ କରିବାର ୫ ବର୍ଷ ପରେ ଏନ୍ଟିପିସି ଉତ୍ତରପ୍ରଦେଶ(ୟୁପି)ର ଟାଣ୍ଡା ଥର୍ମାଲ ପାୱାର ଷ୍ଟେଶନ (ଟିଟିପିଏସ୍)କୁ ଅଧିଗ୍ରହଣ କରିଥିଲା। ଏହି ଦୁଇ ପୁରୁଣା ପାଓ୍ବାର ପ୍ଲାଣ୍ଟ ସ୍ଥାନରେ ୧୩୨୦ ମେଗାୱାଟ୍ ବିଶିଷ୍ଟ ୨ଗୋଟି ଲେଖାଏ ନୂତନ ୟୁନିଟ୍ (୬୬୦x୨) ସ୍ଥାପନ ପାଇଁ ସ୍ଥିର କରାଯାଇଥିଲା। ଇତିମଧ୍ୟରେ ଏନ୍ଟିପିସି ଉତ୍ତରପ୍ରଦେଶର ଟାଣ୍ଡା ଥର୍ମାଲ ପାୱାର ଷ୍ଟେଶନରେ ଷ୍ଟେଜ-୩ ୟୁନିଟ୍ କାର୍ଯ୍ୟକ୍ଷମ ସହ ୨୦୧୮ରୁ ଉତ୍ପାଦନ ଆରମ୍ଭ କରିସାରିଲାଣି। ଏହାକୁ ନେଇ ସେଠାକାର ଶ୍ରମିକ ମହଲରେ ଉତ୍ସାହ ରହିଛି। କିନ୍ତୁ ତାଳଚେରଠାରେ ଏଯାଏ ଏହି ନୂତନ ୟୁନିଟ୍ ସ୍ଥାପନର ଭିତ୍ତିପ୍ରସ୍ତର ପଡ଼ିପାରି ନାହିଁ। ଏଣେ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ନିର୍ଦ୍ଦେଶ ପାଳନ କରି ନ ଥିବାରୁ ମାର୍ଚ୍ଚ ୩୧ ତାରିଖ ପରେ ପୁରୁଣା ପ୍ଲାଣ୍ଟ ଚଳାଇବାକୁ ଏନ୍ଟିପିସି କର୍ତ୍ତୃପକ୍ଷଙ୍କ ନିକଟରେ ଆବଶ୍ୟକ ଅନୁମତି ନାହିଁ। ଫଳରେ ତାଳଚେର ଥର୍ମାଲ ପାଓ୍ବାର ଷ୍ଟେଶନ ଚାଲୁରହିବା ଦିଗରେ ଅନିଶ୍ଚିତତା ଦେଖାଦେଇଛି। ଏଥିଯୋଗୁ ବହୁ ସଂଖ୍ୟକ ଶ୍ରମିକ, କର୍ମଚାରୀଙ୍କ ମଧ୍ୟରେ ନିରାଶା ଖେଳିଯାଇଛି। ନୂତନ ୟୁନିଟ୍ ସ୍ଥାପନକୁ ନେଇ କେନ୍ଦ୍ର ଓ ରାଜ୍ୟ ମଧ୍ୟରେ ବିବାଦ ମଧ୍ୟ ଛିଣ୍ଡୁନି। ୨୦୧୮ ସେପ୍ଟେମ୍ବର ୨୨ରେ ତାଳଚେର ଗସ୍ତରେ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଷ୍ଟେଜ-୩ ୟୁନିଟ୍ର ଭିତ୍ତିପ୍ରସ୍ତର ସ୍ଥାପନ କରିବାର କାର୍ଯ୍ୟକ୍ରମ ଥିଲା। ହେଲେ ଏହି ପ୍ରକଳ୍ପକୁ ରାଜ୍ୟ ସରକାରଙ୍କ ଉଚ୍ଚସ୍ତରୀୟ କମିଟି (ଏଚ୍ଏଲ୍ସି)ର ଅନୁମୋଦନ ସେତେବେଳେ ମିଳିପାରି ନ ଥିବାରୁ ଶେଷ ମୁହୂର୍ତ୍ତରେ ତାହା ଅଟକିଯାଇଥିଲା ବୋଲି କୁହାଯାଉଛି। ୨ ବର୍ଷ ପରେ ଏ ଦିଗରେ କାର୍ଯ୍ୟ ଆଗେଇ ନ ଥିବା ଓ ପୁରୁଣା ପ୍ଲାଣ୍ଟ ବନ୍ଦ ଦ୍ୱାରଦେଶରେ ପହଞ୍ଚିବା ପାଇଁ ଏନ୍ଟିପିସିର ଅବହେଳା ଦାୟୀ ବୋଲି ଆଲୋଚନା ହେଉଛି।
ପ୍ରକାଶ ଯେ, ୫ ଜାନୁୟାରୀ ୧୯୬୪ରେ ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ତାଳଚେର ଥର୍ମାଲ ପାଓ୍ବାର ଷ୍ଟେଶନର ଶୁଭ ଦେଇଥିଲେ। ଷ୍ଟେଜ-୧ର ୪ ୟୁନିଟ୍ (ପ୍ରତ୍ୟେକ ୬୦ ମେଗାୱାଟ୍ ବିଶିଷ୍ଟ) ମଧ୍ୟରୁ ପ୍ରଥମ ୟୁନିଟ୍ ୧୭ ଡିସେମ୍ବର ୧୯୬୭ରେ, ୨ୟ ୟୁନିଟ୍ ୨୮ ମାର୍ଚ୍ଚ ୧୯୬୮ରେ, ୩ୟ ୟୁନିଟ୍ ୧୧ ଜୁଲାଇ ୧୯୬୮ରେ ଓ ୪ର୍ଥ ୟୁନିଟ୍ ୧୧ ଏପ୍ରିଲ ୧୯୬୯ରେ କାର୍ଯ୍ୟକ୍ଷମ ହୋଇଥିଲା। ପରବର୍ତ୍ତୀ ସମୟରେ ଷ୍ଟେଜ-୨ରେ ୧୧୦ ମେଗାୱାଟ୍ ବିଶିଷ୍ଟ ୫ମ ୟୁନିଟ୍ ୨୪ ଏପ୍ରିଲ ୧୯୮୨ ଓ ୬ଷ୍ଠ ୟୁନିଟ୍ ୨୪ ମାର୍ଚ୍ଚ ୧୯୮୩ରେ କାର୍ଯ୍ୟକ୍ଷମ ହୋଇଥିଲା। କିନ୍ତୁ କ୍ରମାଗତ କ୍ଷତିରେ ଚାଲିବାରୁ ତତ୍କାଳୀନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକ ଏହାକୁ ୧୯୯୫ ଜୁନ୍ ୩ରେ ଏନ୍ଟିପିସିକୁ ହସ୍ତାନ୍ତର କରିଥିଲେ। ଏହି ପୁରୁଣା ପ୍ଲାଣ୍ଟକୁ ନବୀକରଣ କରି ଏନ୍ଟିପିସି ଶତପ୍ରତିଶତ ବିଜୁଳି ଉତ୍ପାଦନ ସହ ଅନେକ ପୁରସ୍କାର ପାଇଛି। ଏଠାରୁ ଉତ୍ପାଦିତ ସମସ୍ତ ବିଦ୍ୟୁତ୍ ରାଜ୍ୟ ସରକାରଙ୍କୁ ଯୋଗାଇ ଦିଆଯାଇଥାଏ। ହେଲେ ଏହି ପୁରୁଣା ୟୁନିଟ୍ଗୁଡ଼ିକ ସ୍ଥାନରେ ୭୭୩୨ କୋଟି ଟଙ୍କା ବ୍ୟୟରେ ୧୩୨୦ ମେଗାୱାଟ ବିଶିଷ୍ଟ ଷ୍ଟେଜ-୩ର ୨ଗୋଟି ନୂତନ ୟୁନିଟ୍ ସ୍ଥାପନ ପାଇଁ ଏନ୍ଟିପିସି ପକ୍ଷରୁ ଦୀର୍ଘବର୍ଷ ତଳେ ଲକ୍ଷ୍ୟ ରଖାଯାଇଥିଲା। ୨୦୧୧ରେ ଏଥିପାଇଁ ପ୍ରଥମ ଓ ଜୁଲାଇ ୨୦୧୭ରେ ଦ୍ୱିତୀୟ ଜନଶୁଣାଣି ହୋଇଥିଲା। ପ୍ଲାଣ୍ଟ ପରିସରରେ ଥିବା ବହୁ ଗଛ କଟାଯିବା ସହ ଘରଗୁଡିକୁ ଭଙ୍ଗାଯାଇଥିଲା। ପୁରୁଣା ୟୁନିଟ୍ ସ୍ଥାନରେ ନୂଆ ୟୁନିଟ୍ ସ୍ଥାପନ କରାଯିବାକୁ ଥିବାରୁ ଏଥିପାଇଁ ଜମି ଅଧିଗ୍ରହଣର ଆବଶ୍ୟକତା ନାହିଁ। ତେଣୁ ତାହାକୁ ବିଳମ୍ବର କାରଣ ଭାବେ ଏନ୍ଟିପିସି କର୍ତ୍ତୃପକ୍ଷ ଦର୍ଶାଇପାରିବେ ନାହିଁ। ଏ ପରିସ୍ଥିତିରେ ଆସନ୍ତା ୩୧ ତାରିଖ ପରେ ପ୍ଲାଣ୍ଟ ଚଳାଇବାକୁ କର୍ତ୍ତୃପକ୍ଷଙ୍କ ନିକଟରେ ଅନୁମତି ନ ଥିବା ଟିଟିପିଏସ୍କୁ ଆଶଙ୍କା ମଧ୍ୟକୁ ଠେଲିଦେଇଛି। ପ୍ଲାଣ୍ଟ ବନ୍ଦ ହେଲେ ବହୁ ସଂଖ୍ୟକ ଶ୍ରମିକ, କର୍ମଚାରୀଙ୍କ ରୋଜଗାର ବନ୍ଦ ହୋଇଯିବା ସମ୍ଭାବନା ରହିଛି। ଅପରପକ୍ଷରେ ଉତ୍ତରପ୍ରଦେଶର ଟାଣ୍ଡା ଥର୍ମାଲ ପାଓ୍ବାର ଷ୍ଟେଶନରେ ଷ୍ଟେଜ-୩ ୟୁନିଟ୍ ସ୍ଥାପନ ଦିଗରେ ଏନ୍ଟିପିସି କର୍ତ୍ତୃପକ୍ଷ ପ୍ରବଳ ଇଚ୍ଛାଶକ୍ତି ପ୍ରଦର୍ଶନ କରିଛନ୍ତି। ଏହି ପାଓ୍ବାର ପ୍ଲାଣ୍ଟକୁ ୟୁପିଏସ୍ଇବିଠାରୁ ୨୦୦୦ ମସିହା ଜାନୁୟାରୀ ୧୫ରେ ଏନ୍ଟିପିସିକୁ ହସ୍ତାନ୍ତର କରାଯାଇଥିଲା। ଏଠାରେ ନୂତନ ଷ୍ଟେଜ-୩ ୟୁନିଟ୍ ସ୍ଥାପନ ସହ ୬୬୦ ମେଗାୱାଟ୍ର ପ୍ରଥମ ୟୁନିଟ୍ ମାର୍ଚ୍ଚ ୨୦୧୮ ଏବଂ ୬୬୦ ମେଗାୱାଟ୍ ବିଶିଷ୍ଟ ୨ୟ ୟୁନିଟ୍ ନଭେମ୍ବର ୨୦୧୮ରେ କାର୍ଯ୍ୟକ୍ଷମ ହୋଇଛି। ଫଳରେ ତାଳଚେର ପ୍ରତି ଏନ୍ଟିପିସି କର୍ତ୍ତୃପକ୍ଷଙ୍କ ଅବହେଳା ପଦାରେ ପଡ଼ିଯାଇଥିବା ଚର୍ଚ୍ଚା ହେଉଛି।
ବଡ଼ ଧରଣର ଆନ୍ଦୋଳନ ହେବ
ଲାଭରେ ଚାଲୁଥିବା ତାଳଚେର ଥର୍ମାଲ ପାଓ୍ବାର ଷ୍ଟେଶନକୁ ବନ୍ଦ କରିବା ପାଇଁ ଏନ୍ଟିପିସି କର୍ତ୍ତୃପକ୍ଷ ଅଗ୍ରସର ହେଲେ ଏଥିପାଇଁ ଅନେକ ସଂସ୍ଥାରେ ତାଲା ପଡ଼ିଯିବ। ତାଳଚେରରେ ବଡ଼ ଧରଣର ଆନ୍ଦୋଳନ ମୁଣ୍ଡ ଟେକିବା ସହ ଅର୍ଥନୈତିକ ଅବରୋଧ ଆରମ୍ଭ ହେବ।
-ମହେଶ ସାହୁ, ଏମ୍ପି, ଢେଙ୍କାନାଳ
ମନ୍ତ୍ରୀଙ୍କ ସହ ଆଲୋଚନା କରିଛି
ଟିଟିପିଏସ୍ ସମ୍ପର୍କରେ ରାଜ୍ୟ ସରକାରଙ୍କ ବିଭାଗୀୟ ମନ୍ତ୍ରୀଙ୍କୁ ଅବଗତ କରିବା ସହ ବିଶଦ ଭାବେ ଆଲୋଚନା କରିଛି। ପ୍ଲାଣ୍ଟ ବନ୍ଦ ନେଇ କେନ୍ଦ୍ର ସରକାରଙ୍କ ପକ୍ଷରୁ କୌଣସି ସୂଚନା ଆସି ନ ଥିବା ମନ୍ତ୍ରୀ କହିଛନ୍ତି। ତେଣୁ ସମସ୍ୟା ସମାଧାନ ପାଇଁ ମନ୍ତ୍ରୀଙ୍କୁ ଅନୁରୋଧ କରିଛି।
-ବ୍ରଜକିଶୋର ପ୍ରଧାନ, ବିଧାୟକ, ତାଳଚେର
ନିଷ୍ଠାର ସହ ଚେଷ୍ଟା କରିବୁ
ଟିଟିପିଏସ୍ ସମ୍ପର୍କରେ ସଚେତନ ଅଛୁ। ଶ୍ରମିକମାନଙ୍କୁ ନେଇ କେନ୍ଦ୍ରମନ୍ତ୍ରୀ, ବିରୋଧୀ ଦଳ ନେତା, ଦଳର ସଭାପତିଙ୍କ ସହ ଆଲୋଚନା କରିଛୁ। ଏହି ପାଓ୍ବାର ଷ୍ଟେଶନ କିପରି କାର୍ଯ୍ୟକ୍ଷମ ହୋଇପାରିବ ସେ ଦିଗରେ ନିଷ୍ଠାର ସହ ଚେଷ୍ଟା କରିବୁ।
-କାଳନ୍ଦୀ ସାମଲ, ଭାଜପା ସାଧାରଣ ସମ୍ପାଦକ, ତାଳଚେର
ନିନ୍ଦନୀୟ ଘଟଣା
ନେହେରୁଙ୍କ ଅମଳର ଏହି ପ୍ଲାଣ୍ଟ ବନ୍ଦ ହେବ। ତାଳଚେରରେ ଗୋଟିଏ ପରେ ଗୋଟିଏ ପ୍ଲାଣ୍ଟ ବନ୍ଦ ହେଉଛି। ଏଠାରୁ ଆମର କେନ୍ଦ୍ରମନ୍ତ୍ରୀ, ବିଧାୟକ, ଏମ୍ପିଙ୍କ ପରି ୩ଜଣ ଟାଣୁଆ ନେତା ଥାଇ ମଧ୍ୟ ଟିଟିପିଏସ୍ ବନ୍ଦ ଦ୍ୱାରଦେଶରେ ପହଞ୍ଚିବା ଏକ ନିନ୍ଦନୀୟ ଘଟଣା।
-ସୁରେଶ ବେହେରା, ବରିଷ୍ଠ ନେତା, କଂଗ୍ରେସ, ତାଳଚେର
