ବାଲେଶ୍ୱର ଅଫିସ, ୨୦।୯: ବାଲେଶ୍ୱର ରେମୁଣା ବାମପଦାସ୍ଥିତ ନୋସି ବିଜିନେସ ପାର୍କ ସମ୍ମିଳନୀ କକ୍ଷରେ ରାଜ୍ୟ ସରକାରଙ୍କ ମହିଳା ଓ ଶିଶୁ ବିଭାଗ ଏବଂ ୟୁନିସେଫ୍ ସହଯୋଗରେ ମହିଳା ଓ ଶିଶୁ ଅପରାଧ ନିରାକରଣ ଶାଖା ଭୁବନେଶ୍ୱର ପକ୍ଷରୁ ମହିଳା ଏବଂ ଶିଶୁ ଅପରାଧର ଅନୁସନ୍ଧାନ ମାର୍ଗଦର୍ଶିକାର ସଚେତନତା କାର୍ଯ୍ୟକ୍ରମ ସୋମବାର ଆୟୋଜିତ ହୋଇଛି। ଏଥିରେ ୫ଟି ଜିଲା (ବାଲେଶ୍ୱର, ଭଦ୍ରକ, ଯାଜପୁର, କେନ୍ଦୁଝର ଓ ମୟୂରଭଞ୍ଜ) ଥାନାରେ କାର୍ଯ୍ୟ କରୁଥିବା ମହିଳା ଓ ଶିଶୁ ଡେସ୍କର ଅଧିକାରୀ ଏବଂ ଇଣ୍ଟିଗ୍ରେଟେଡ୍ ଟ୍ରାଫିକ୍ ୟୁନିଟ୍ରେ ନିୟୋଜିତ ଅଧିକାରୀମାନେ ଯୋଗଦେଇଛନ୍ତି। ଏହି କର୍ମଶାଳା ୨ଦିନ ଧରି ଚାଲୁ ରହିବ। ଅଭିଜ୍ଞ ଅଧିକାରୀମାନେ ମହିଳା ଓ ଶିଶୁ ଅପରାଧ ନିରାକରଣ ଉପରେ ବ୍ୟାଖ୍ୟା କରି ଭବିଷ୍ୟତରେ ଏହାକୁ ସରଳ ଉପାୟରେ ଆଇନର ଦିଗକୁ ବୁଝାଇବା, ତଦନ୍ତ ପ୍ରକ୍ରିୟା ଓ କ୍ଷତିପୂରଣ ବାବଦରେ ସାହାଯ୍ୟ କରିପାରିବାର ଲକ୍ଷ୍ୟ ନେଇ କର୍ମଶାଳା ଆୟୋଜିତ ହୋଇଛି। ପୂର୍ବାଞ୍ଚଳ ଆଇଜି ହିମାଂଶୁ କୁମାର ଲାଲ୍ ଓ ଜିଲା ଆରକ୍ଷୀ ଅଧୀକ୍ଷକ ସୁଧାଂଶୁ ଶେଖର ମିଶ୍ର ପ୍ରମୁଖ ଉପସ୍ଥିତ ଥିଲେ।
ପ୍ରଶିକ୍ଷକ ଭାବେ ସିନିୟର ପ୍ରୋଗ୍ରାମ କୋର୍ଡିନେଟର ତଥା ଓଡ଼ିଶାର ଚାଇଲ୍ଡଲାଇନ୍ ମୁଖ୍ୟ ଅର୍କା ଲାହା, ସିନିୟର ପ୍ରୋଗ୍ରାମ କୋର୍ଡ଼ିନେଟର କୋକେରାଗଡ୍ଡା ରମେଶ ଓ ସିନିୟର ପ୍ରୋଗ୍ରାମ କୋର୍ଡ଼ିନେଟର ତଥା ତେଲେଙ୍ଗାନାର ଚାଇଲ୍ଡ ଲା A ଇନ୍ ମୁଖ୍ୟ ରାଜୁ କୋଟାଇ ଯୋଗଦେଇ ମହିଳା ଓ ଶିଶୁଙ୍କ ଉପରେ ଦେଶର ପ୍ରଣୟନ ହୋଇଥିବା ଆଇନ ଓ ସହାୟତା ଉପରେ ଆଲୋକପାତ କରିଥିଲେ। ଅତିରିକ୍ତ ପୋଲିସ ମହାନିର୍ଦ୍ଦେଶକ ତଥା ମହିଳା ଓ ଶିଶୁ ଅପରାଧ ନିରାକରଣ ଶାଖା ଭୁବନେଶ୍ୱରର ରେଖା ଲୋହାନି କହନ୍ତି, ମହିଳା ଓ ଶିଶୁ ଡେସ୍କର ଅବସ୍ଥାପିତ ଲୋକମାନଙ୍କୁ ନେଇ ସମ୍ବେଦନଶୀଳ ସମ୍ମିଳନୀ ଆୟୋଜିତ ହେଉଛି। ବାଲେଶ୍ୱରରେ ସୋମବାର ଏବଂ ମଙ୍ଗଳବାର ୫ଟି ଜିଲାକୁ ନେଇ କରାଯାଉଛି। ସୋମବାର ବାଲେଶ୍ୱର, ଭଦ୍ରକ ଓ ଯାଜପୁର ଏବଂ ମଙ୍ଗଳବାର କେନ୍ଦୁଝର ଓ ମୟୂରଭଞ୍ଜର ଅଧିକାରୀମାନଙ୍କୁ ନେଇ କର୍ମଶାଳା ଅନୁଷ୍ଠିତ ହେବ। ପୋଲିସ ସାଙ୍ଗରେ ମିଶି ଇଣ୍ଟିଗ୍ରେଟେଡ୍ ଟ୍ରାଫିକ୍ ୟୁନିଟ୍ର ଲୋକମାନେ କିପରି ଭଲ ଭାବେ କାର୍ଯ୍ୟ କରିପାରିବେ ଆଲୋଚନା ହୋଇଛି। ଗତ ୨୦୦୫ରୁ ମହିଳା ଓ ଶିଶୁ ଡେସ୍କ ୪୦ଟି ଥାନାରେ ଆରମ୍ଭ ହୋଇଥିବା ବେଳେ ସମୟକ୍ରମେ ବଢ଼ି ବଢ଼ି ବର୍ତ୍ତମାନ ୬୦୮ ପୋଲିସ ଷ୍ଟେସନରେ ମହିଳା ଓ ଶିଶୁ ଡେସ୍କ କାର୍ଯ୍ୟକ୍ଷମ କରୁଛି। କେବଳ ସଂଖ୍ୟା ନୁହେଁ ଉପଯୁକ୍ତ ପ୍ରଶିକ୍ଷଣ, ଆସବାବପତ୍ର ଓ ଭିତ୍ତିଭୂମି ମଧ୍ୟ ଯୋଗାଇ ଦିଆଯାଉଛି। ଏହାକୁ ସଶକ୍ତ କରିବା ପାଇଁ ସରକାରଙ୍କ ପକ୍ଷରୁ ସମସ୍ତ ପ୍ରକାର ପ୍ରୟାସ ଜାରି ରହିଛି। ସମସ୍ତ ଥାନାରେ ଏହି ବିଭାଗର ଅଧିକାରୀଙ୍କୁ ନିଯୁକ୍ତି ଦିଆଯାଇଛି।
