ଭୁବନେଶ୍ୱର,୩।୪(ବ୍ୟୁରୋ): ରାଜ୍ୟ ସରକାରଙ୍କ ବିଭିନ୍ନ ବିଭାଗରେ ଚାକିରି ଦେବାକୁ ବହୁ ଆଶାୟୀଙ୍କଠାରୁ ଲକ୍ଷାଧିକ ଟଙ୍କା ଠକେଇ କରୁଥିବା ଏକ ରାକେଟର ୨ ସଦସ୍ୟଙ୍କୁ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ସୋମବାର ଗିରଫ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ବମିଖାଲସ୍ଥିତ ବିରଜା କମ୍ପ୍ଲେକ୍ସରେ ରହୁଥିବା ବାଲେଶ୍ୱର ଜିଲା କମର୍ଦା ଥାନା ଅଞ୍ଚଳର ରାଜକିଶୋର ପଟ୍ଟନାୟକ ଓ ନୟାପଲ୍ଲୀ ଥାନା ଅନ୍ତର୍ଗତ ରେଣ୍ଟାଲ୍ କଲୋନିରେ ରହୁଥିବା ଭୋଗରାଇ ଥାନା ଅଞ୍ଚଳର ଅରୁଣ ମହାନ୍ତି। ଇଓଡବ୍ଲ୍ୟୁ ସେମାନଙ୍କ ଘରୁ ୧୦୦ ଆଶାୟୀଙ୍କ ବାୟୋଡାଟା, ମାର୍କସିଟ୍, ଆବେଦନ ପତ୍ର, ସରକାରୀ ଲୋଗ ଥିବା ନକଲି ନିଯୁକ୍ତି ପତ୍ର ଆଦି ଜବତ କରିଛି। ଏଥିସହ ୱେବ୍ ପୋର୍ଟାଲ ସୁର୍ଯ୍ୟାଲୋକ ନିଉଜ୍ର ଏକ ବୁମ୍ ଓ ଅଭିଯୁକ୍ତ ରାଜକିଶୋରଙ୍କ ଏକ ଜିହ୍ବା ନିଉଜ ୱେବ ପୋର୍ଟାଲର ପରିଚୟ ପତ୍ର ମଧ୍ୟ ଜବତ ହୋଇଛି। ଅଭିଯୁକ୍ତଦ୍ୱୟଙ୍କୁ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଦ୍ୱୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ରାକେଟ୍ରେ ସଦସ୍ୟ ଥିବା ନୟାଗଡ଼ର ଭବାନୀ ଶଙ୍କର ଦାସ ନାମକ ଜଣେ ବ୍ୟକ୍ତି ଫେରାର ଥିବା ସୂଚନା ମିଳିଛି। ଭବାନୀଙ୍କ ସହ ଅନ୍ୟମାନଙ୍କୁ ଇଓଡବ୍ଳ୍ୟୁ ଧରିବାକୁ ପ୍ରୟାସ ଜାରି ରଖିଛି।
