ୱାଶିଂଟନ,୨୦ ।୧୧: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଟୁଇଟରକୁ ଫେରିଛନ୍ତି । ବ୍ଲୁ ଟିକ ସହ ପୁଣିଥରେ ତାଙ୍କ ଟୁଇଟର ଆକାଉଣ୍ଟକୁ ଆକ୍ଟିଭ କରଦିଆଯାଇଛି । ସୂଚନାଯୋଗ୍ୟ, ଗୋଟିଏ ଦିନ ପୂର୍ବରୁ ଟୁଇଟରର ନୂଆ ମାଲିକ ଏଲନ ମସ୍କ ଡୋନାଲ୍ଡ ଟ୍ରମ୍ପଙ୍କ ଟୁଇଟର ଆକାଉଣ୍ଟ ଉପରେ ଥିବା ବ୍ୟାନକୁ ହଟାଇବାକୁ ନେଇ ଏକ ଭୋଟ କରିଥିଲେ । ଏଥିରେ ୧.୫୦କୋଟିରୁ ଅଧିକ ଲୋକ ଭାଗ ନେଇଥିଲେ । ଏମାନଙ୍କ ମଧ୍ୟରୁ ୫୧.୮ ପ୍ରତିଶତ ଲୋକେ ଟ୍ରମ୍ଫଙ୍କ ଟୁଇଟର ଆକାଉଣ୍ଟ ଫେରାଇ ଆଣିବାକୁ ନେଇ ସହମତି ପ୍ରକାଶ କରିଥିଲେ । ହେଲେ ୪୮.୨ ପ୍ରତିଶତ ଏଥିରେ ରାଜି ନ ଥିଲେ ।
ହେଲେ ମସ୍କଙ୍କ ଘୋଷଣାର କିଛି ସମୟ ପରେ ଡୋନାଲ୍ଡ ଟ୍ରମ୍ଫଙ୍କ ଆକାଉଣ୍ଟରୁ ବ୍ୟାନ ହଟିଯାଇଥିବା ଦେଖାଯାଇଥିଲା । ପ୍ରାୟ ୨୨ ମାସ ପରେ ପୁଣିଥରେ ଡୋନାଲ୍ଡ ଟ୍ରମ୍ଫ ଟୁଇଟରକୁ ଫେରିଛନ୍ତି । ଭୋଟ ପରେ ମସ୍କ ଟୁଇଟ କରିଥିଲେ କି ଜନତା କହି ସାରିଛନ୍ତି, ଟ୍ରମ୍ଫଙ୍କୁ ପୁଣି ଟୁଇଟରକୁ ଫେରାଇ ଅଣାଯିବ ।
ଏହାକୁ ନେଇ ଭିନ୍ନ ଭିନ୍ନ କମେଣ୍ଟ ଆସିଛି । ଜଣେ ବିନାଲାଭକାରୀ ଲାଇବ୍ରେରୀର ମଣ୍ଡଳ ଅଧ୍ୟକ୍ଷ ଲେଖିଛନ୍ତି ଯଦି ଟୁଇଟରକୁ ଟ୍ରମ୍ପ ଫେରନ୍ତି ତେବେ ସେ ଏହି ପ୍ଲାଟଫର୍ମ ଛାଡିଦେବେ । ଏହାସହ ଅନ୍ୟମାନେ ବି ଭିନ୍ନ ଭିନ୍ନ ପ୍ରତିକ୍ରିୟା ଦେଇଛନ୍ତି । ଜଣେ ୟୁଜର୍ସ ମସ୍କଙ୍କୁ ଏହିଭଳି ଅନ୍ୟ ଆକାଉଣ୍ଟ ପାଇଁ ବି ଭୋଟିଂ କରିବାକୁ ଉପଦେଶ ଦେଇଛନ୍ତି । ଅନ୍ୟ ଜଣେ ଲେଖିଛନ୍ତି ଯଦି ଟ୍ରମ୍ପ ଏହି ଭୋଟିଂରେ ହାରିଯିବେ ତେବେ ସେ କହିବେ ଏଥିରେ ଘୋଟାଲା ହୋଇଛି । ଏହି ଭୋଟିଂକୁ ନେଇ ଲଗାତାର ମସ୍କ ବି କମେଣ୍ଟର ରିପ୍ଲାଇ ଦେଇଛନ୍ତି । ଟୁଇଟରରେ ଟ୍ରମ୍ପକ ଭୋଟିଂ ଦେଖିବାକୁ ମଜା ଲାଗୁଛି ବୋଲି ମସ୍କ କହିଥିଲେ ।
ସୂଚନାଯୋଗ୍ୟ, ଟୁଇଟର ଆକାଉଣ୍ଟରେ ଉସକାଇବା ଭଳି ଟୁଇଟ କରିବା ଅଭିଯୋଗରେ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ବ୍ଲକ କରି ଦିଆଯାଇଥିଲା । ଆମେରକାରେ ହୋଇଥିବା ନିର୍ବାଚନରେ ଜୋ ବାଇଡେନଙ୍କୁ ରାଷ୍ଟ୍ରପତି ଭାବେ ନିର୍ବାଚିତ କରାଯିବା ପରେ ଏହାକୁ ନେଇ ଟ୍ରମ୍ପଙ୍କ ସମର୍ଥକମାନେ ହ୍ୱାଇଟ ହାଉସ ବାହାରେ ବିରୋଧ ପଦର୍ଶନ କରିଥିଲେ । ପରେ ଏହା ହିଂସାର ରୂପ ନେଇଥିଲା । ଏହାକୁ ନଜରରେ ରଖି ପ୍ରଥମେ ୧୨ ଘଣ୍ଟା ପାଇଁ ଟ୍ରମ୍ପଙ୍କ ଟୁଇଟର ଆକାଉଣ୍ଟକୁ ବନ୍ଦ କରି ଦିଆଯାଇଥିଲା ଓ ପରେ ଏହାକୁ ସମ୍ପୂର୍ଣ୍ଣ ଭାବେ ସସପେଣ୍ଡ କରାଯାଇଥିଲା ।
