ଓ୍ବାଶିଂଟନ୍,୨୮।୨: ଟେସଲା ସିଇଓ ଏଲନ ମସ୍କ ପୁଣି ବିଶ୍ୱର ଏକ ନମ୍ବର ଧନୀ ବ୍ୟକ୍ତି ହୋଇଛନ୍ତି। ଗତ ବର୍ଷ ଅଧିକ କ୍ଷତି ହେତୁ ବିଶ୍ୱର କୋଟିପତି ତାଲିକାରେ ଦୁଇ ନମ୍ବରକୁ ଖସି ଆସିଥିଲେ, କିନ୍ତୁ ଚଳିତ ବର୍ଷ ସମ୍ପତ୍ତି ବୃଦ୍ଧି ହେତୁ ସେ ବର୍ତ୍ତମାନ ଦୁନିଆର ସବୁଠାରୁ ଧନୀ ବ୍ୟକ୍ତି ହୋଇପାରିଛନ୍ତି। ଟୁଇଟର୍ ଏବଂ ଟେସଲାର ମାଲିକ ମସ୍କ ଫ୍ରାନ୍ସର ବିଲିୟନେୟାର ବର୍ନାର୍ଡ ଆର୍ନଲ୍ଟଙ୍କୁ ପଛରେ ପକାଇଛନ୍ତି।
ଗତ ବର୍ଷ ଡିସେମ୍ବରରେ ବର୍ନାର୍ଡ ମସ୍କକୁ ଅତିକ୍ରମ କରିଥିଲେ। ବ୍ଲୁମବର୍ଗ ବିଲିୟନେୟାରଙ୍କ ରିପୋର୍ଟ ଅନୁଯାୟୀ, ଏଲୋନ ମସ୍କ ମାତ୍ର ୨ ମାସ ମଧ୍ୟରେ ଏକ ନମ୍ବର ମୁକୁଟ ଫେରି ପାଇଛନ୍ତି। କିନ୍ତୁ ସେ ତଥାପି ଫୋର୍ବସ ବିଲିୟନେୟାର ତାଲିକାରେ ଦୁଇ ନମ୍ବରରେ ଅଛନ୍ତି।
ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସ ଅନୁଯାୟୀ, ଏଲନ ମସ୍କଙ୍କ ମୋଟ ସମ୍ପତ୍ତି ମୂଲ୍ୟ ୧୮୭ ବିଲିୟନ ଡ଼ଲାରରେ ପହଞ୍ଚିଥିବାବେଳେ ଦୁଇ ନମ୍ବରରେ ପହଞ୍ଚିଥିବା ବର୍ନାର୍ଡଙ୍କ ସମ୍ପତ୍ତି ୧୮୫ ବିଲିୟନ ଡଲାର ଅଛି। ଚଳିତ ବର୍ଷ ଏଲନ ମସ୍କଙ୍କ ସମ୍ପତ୍ତିରେ ରେକର୍ଡ ବୃଦ୍ଧି ଘଟିଛି। ଜାନୁଆରୀ ଠାରୁ, ମସ୍କ ତାଙ୍କ ସମ୍ପତ୍ତିରେ ୫୦.୧ ବିଲିୟନ ଡଲାର ବୃଦ୍ଧି କରିଛନ୍ତି। ସୋମବାର ମସ୍କଙ୍କ ସମ୍ପତ୍ତି ୬.୯୮ ବିଲିୟନ ଡଲାରରେ ବୃଦ୍ଧି ପାଇଛି।
୨୦୨୧ରେ ମସ୍କଙ୍କର ସମ୍ପତ୍ତି ୨୦୦ ବିଲିୟନ ଡଲାରରୁ ଅଧିକ ଥିଲା। ଗତ ବର୍ଷ ନଭେମ୍ବର ଏବଂ ଡିସେମ୍ବର ମାସରେ ତାଙ୍କ ସମ୍ପତ୍ତି ୧୫୦କୁ ହ୍ରାସ ଘଟିଥିଲା। ମସ୍କଙ୍କ ସମ୍ପତ୍ତି ହ୍ରାସ ଟେସଲା ଶେୟାର ବିକ୍ରି ହେତୁ ହୋଇଥିଲା।
