ପାଟଣା,୧୦।୭(ବୀର କିଶୋର ଦାଶ):କେନ୍ଦୁଝର ଜିଲା ପାଟଣା ତହସିଲ ଅର୍ନ୍ତଗତ ଚେମେଣା ଓ ଯମୁନା ପଶି ପଞ୍ଚାୟତର ୧୨ଟି ମୌଜାର ଜମିକୁ ନେଇ ଜେଏସଡବ୍ଲୁ ଓ ପୋସ୍କୋ ପ୍ରସ୍ତାବିତ ମେଗାଷ୍ଟିଲ ପ୍ଲାଣ୍ଟ ପ୍ରତିଷ୍ଠା ପାଇଁ ୧୨ଟି ଗ୍ରାମସଭା ମଧ୍ୟରୁ ଶୁକ୍ରବାର ଏକାଦଶ ଗ୍ରାମସଭା ଚେମେଣା ପଞ୍ଚାୟତ ଚିଳିଦା ହାଟ ପଡିଆରେ ଅନୁଷ୍ଠିତ ହୋଇଛି। ସଭା ଆରମ୍ଭରେ ଗ୍ରାମବାସୀଙ୍କୁ ଖୁସି କରିବା ପାଇଁ ପ୍ରଶାସନ ତରଫରୁ ରଙ୍ଗାରଙ୍ଗ ଝୁମର ନୃତ୍ୟ ଗୀତ ପରିବେଷଣ କରାଯାଇଥିଲା।
ମୌଜା ର୧୯୫ ଏକର ଘରୋଇ ଜମି ଅଧିଗ୍ରହଣ ନେଇ ଗ୍ରାମସଭାରେ ଲୋକଙ୍କ ଠାରୁ ମତାମତ ଗ୍ରହଣ କରାଯାଇଥିଲା । ଗ୍ରାମ ସଭାରେ ୨ଶହରୁ ଊଦ୍ଧର୍ବ ଲୋକ ଅଂଶ ଗ୍ରହଣ କରିଥିବା ବେଳେ ଗ୍ରାମର ମାତ୍ର ୨ଜଣ ବ୍ୟକ୍ତି ନିଜନିଜ ଦାବି ଉପସ୍ଥାପନ କରିଥିଲେ। ଲୋକମାନେ ପ୍ରଶାସନ ନିକଟରେ ଏକର ପିଛା ୩୦ କୋଟି ଟଙ୍କା କ୍ଷତିପୂରଣ ଦାବି ସହ, ଅନ୍ୟ ୫୦ଦଫା ଦାବି ଗ୍ରାମବାସୀ ଉପସ୍ଥାପନ କରିଥିଲେ । ୫୦ଦଫା ଦାବି ମଧ୍ୟମରେ ଗାଁର ରାସ୍ତାଘାଟ, ପାର୍କ, ଆଦର୍ଶ ପୁଷ୍କରିଣୀ,ପାନୀୟ ଜଳ, ଶିକ୍ଷା ସ୍ବାସ୍ଥ୍ୟ ସ୍ବାସ୍ଥ୍ୟ , ଗମନାଗମନ,ବନିକରଣ,ପାରିପାର୍ଶ୍ୱିକ ବିକାଶ ଦିଗରେ ସରକାର ପଦକ୍ଷେପ ନେବାକୁ ଦାବି କରିଥିଲେ ଲୋକେ।
ଆୟୋଜିତ ଗ୍ରାମସଭା ସ୍ଥାନୀୟ ସରପଞ୍ଚ ହେମଲତା ନାଏକଙ୍କ ଅଧକ୍ଷତାରେ ଅନୁଷ୍ଠିତ ହୋଇଥିଲା। ଅତିରିକ୍ତ ଜିଲାପାଳ ତଥା ସତନ୍ତ୍ର ଭୂଅର୍ଜନ ଅଧିକାରୀ ରବୀନ୍ଦ୍ର କୁମାର ପ୍ରଧାନ, ସମିତି ସଭ୍ୟ ମନୋଜ ମହାନ୍ତ,ୱାର୍ଡ଼ ସଦସ୍ୟା , ପାଟଣା ତହସିଲଦାର ଅଶିନୀ କୁମାର ନାଏକ, ପାଟଣା ବିଡ଼ିଓ ମାନସ ରଞ୍ଜନ ଦଣ୍ଡପାଟ, ଇଡକୋ ଜମି ଅଧିଗ୍ରହଣ ଅଧିକାରୀ ଜୟ କିଶୋର ପାତ୍ର ପ୍ରମୁଖ ଯୋଗ ଦେଇଥିଲେ। ପ୍ରସ୍ତାବିତ ମୋଗା ଷ୍ଟିଲ ପ୍ଲାଣ୍ଟ ପାଇଁ ଚେମେଣା ପଞ୍ଚାୟତରେ ହେବାକୁ ଥିବା ଗ୍ରାମସଭା ମଧ୍ୟରୁ ଆଜି ଅନ୍ତିମ ଗ୍ରାମ ସଭା ସମ୍ପର୍ଣ୍ଣ ହୋଇଛି। କେବଳ ଯମୁନା ପଶି ପଂଚାୟତର ଯମୁନା ପଶି ଗ୍ରାମ ସଭା ବାକି ରହିଛି।
ସୂଚନାନୁସାରେ, ଜେଏସଡବ୍ଲୁ ଏବଂ ପୋସ୍କା କମ୍ପାନୀର ମିଳିତ ସହଯୋଗରେ ପାଟଣା ବ୍ଲକର ୧୨ଟି ମୌଜାରେ ୪୦ ହଜାର କୋଟି ଟଙ୍କା ନିବେଶରେ ବାର୍ଷିକ ୫ ନିୟୁତ ଟନ କ୍ଷମତା ବିଶିଷ୍ଟ ଏକ ମେଗା ଇସ୍ପାତ କାରଖାନା ପ୍ରତିଷ୍ଠା ପାଇଁ ଗ୍ରାମସଭା ଅନୁଷ୍ଠିତ ହେଉଛି । ଦାବି ସମ୍ପର୍କରେ ସରକାରଙ୍କୁ ଅବଗତ କରାଯିବ ବୋଲି କେନ୍ଦୁଝର ଅତିରିକ୍ତ ଜିଲାପାଳ ରବୀନ୍ଦ୍ର ପ୍ରଧାନ କହିଛନ୍ତି।
ସମ୍ଭାବ୍ୟ ଗଣ୍ଡଗୋଳକୁ ଆଖି ଆଗରେ ରଖି ସଭାସ୍ଥଳର ବିଭିନ୍ନ ପ୍ରବେଶ ପଥରେ ୨୨ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଥିଲେ। ଆଇନଶୃଙ୍ଖଳା ପାଇଁ ଅତିରିକ୍ତ ଏସପି ଜ୍ୟୋସ୍ନା ମୟୀ ପ୍ରଧାନ,ବିଜୟ ବିହାରୀ ଏସଡିପିଓ ଚମ୍ପୁ ର ରଶ୍ମି ରଞ୍ଜନ ସାହୁ, ସଦରର ସୁଦର୍ଶନ ଗଙ୍ଗୋଇ, ତୁରୁମୁଙ୍ଗା ଥାନା ଅଧିକାରୀ ଦୀପ୍ତି ରଞ୍ଜନ ସାହୁ ପ୍ରମୁଖ ସାମିଲ ହୋଇଥିଲେ।
