ଭୁବନେଶ୍ୱର, ୧୭।୩(ବ୍ୟୁରୋ): ଓଡ଼ିଶୀ ନୃତ୍ୟ ଅନୁଷ୍ଠାନ ତ୍ରିଧାରା ପକ୍ଷରୁ ୩୪ତମ ଶ୍ରଦ୍ଧାଞ୍ଜଳି ସମାରୋହ ମଙ୍ଗଳବାର ରବୀନ୍ଦ୍ର ମଣ୍ଡପଠାରେ ଆୟୋଜିତ ହୋଇଯାଇଛି। ପ୍ରଥମ ପର୍ଯ୍ୟାୟକୁ ବିଧାୟକ ଦେବୀପ୍ରସାଦ ମିଶ୍ର ଉଦ୍ଘାଟନ କରିଥିଲେ। ପ୍ରଥମେ ତ୍ରିଧାରାର ଶିଳ୍ପୀମାନଙ୍କ ଦ୍ୱାରା ପଞ୍ଚଦେବ ନୃତ୍ୟ ପରିବେଷଣ କରାଯାଇଥିଲା। ପରେ ନୟାଗଡ ନୃତ୍ୟ ପ୍ରଣାମ ଅନୁଷ୍ଠାନ କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ରଚିତ ‘କୁଞ୍ଜବନେ କଳାନିଧି’ ପରିବେଷଣ କରିଥିଲେ। ବ୍ରହ୍ମପୁର ଓଡ଼ିଶୀ ସାଧନା ପୀଠର କଳାକାରମାନେ ‘ମହାକାଳୀ ଧ୍ୟାନ’, ସନ୍ଧ୍ୟା ଓଡ଼ିଶୀ ନୃତ୍ୟ ଏକାଡେମୀର କଳାକାର ‘ସ୍ଥାୟୀ ନୃତ୍ୟ’, ନୃତ୍ୟପ୍ରଭାର କଳାକାର ‘ଶିବଅଷ୍ଟକ’ ପରିବେଷଣ କରିଥିଲେ। ଦ୍ୱିତୀୟ ପର୍ଯ୍ୟାୟକୁ ନାଟ୍ୟକାର ରମେଶ ପ୍ରସାଦ ପାଣିଗ୍ରାହୀ ଉଦ୍ଘାଟନ କରିଥିଲେ। ବେଙ୍ଗାଲୁରୁର ନନର୍ତ୍ତୀଶା ଡ୍ୟାନ୍ସ ଏକାଡେମୀ ଗଣେଶ ତାଣ୍ଡବ ପରିବେଷଣ କରିଥଲେ। ତାଙ୍କ ପରେ କଟକର ଲାସ୍ୟ ଡ୍ୟାନ୍ସ ଏକାଡେମୀ ‘ଗଙ୍ଗାତରଙ୍ଗ’, ବଉଦର ନଟରାଜ କଳାମନ୍ଦିର ଶ୍ରୀ ଜୟଦେବଙ୍କ ରଚନାରୁ ‘ଶ୍ରିତକମଳ’, ଅଙ୍ଗହାର ନୃତ୍ୟାୟନ ପକ୍ଷରୁ ‘ଥାଇ ନୃତ୍ୟ’, ତ୍ରିଭଙ୍ଗ କଳା ନିକେତନ ପକ୍ଷରୁ ‘ଶିବସ୍ତୁତି’ ଆଦି ୧୬ଟି ନୃତ୍ୟ ପରିବେଷଣ କରିଥିଲେ। କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟକୁ ରାଜ୍ୟ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ଉଦ୍ଘାଟନ କରିଥଲେ। ତ୍ରିଧାରାର ଶିଳ୍ପୀମାନଙ୍କ ଦ୍ୱାରା ଲକ୍ଷ୍ମୀନୃସିଂହ ଧ୍ୟାନ, ନୃତ୍ୟ ବିଳାସ ପକ୍ଷରୁ ‘କୃଷ୍ଣ ବନ୍ଦନା’ ଭଳି ୧୧ଟି ନୃତ୍ୟ ପରିବେଷଣ କରାଯାଇଥିଲା। ଏହି ଅବସରରେ ୧୧ଜଣ ନୃତ୍ୟଶିଳ୍ପୀ ଓ ଗୁରୁମାନଙ୍କୁ ‘ଗୁରୁ ଦେବପ୍ରସାଦ ନୃତ୍ୟ ରତ୍ନ ସମ୍ମାନ’ ପ୍ରଦାନ କରାଯାଇଥିଲା। ଅନୁଷ୍ଠାନର କାର୍ଯ୍ୟକାରୀ ସଭାପତି ସିମାଞ୍ଚଳ ପଣ୍ଡା ତିନୋଟିଯାକ ଅଧିବେଶନରେ ସଭାପତିତ୍ୱ କରିଥିଲେ। କାର୍ଯ୍ୟକ୍ରମକୁ ଇଂ ଶ୍ରୀନିବାସ ଘଟୁଆରୀ ସଂଯୋଜନା କରିଥିଲେ।
