ମୋରଡ଼ା,୧୮ା୬(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ନିର୍ବାଚନମଣ୍ଡଳୀରେ ହାତୀ ଉପଦ୍ରବ ବଢ଼ି ଚାଲିଥିବାରୁ ଜନ ଅସନ୍ତୋଷ ବଢ଼ି ଚାଲିଛି।
ସୂଚନାନୁଯାୟୀ, ଉକ୍ତ ନିର୍ବାଚନମଣ୍ଡଳୀର ରାସଗୋବିନ୍ଦପୁର ରେଞ୍ଜ ଅଧୀନ ନଳଗଜା ପଞ୍ଚାୟତର ଗତକାଲି ୨୫ ଟିକିଆ ହାତୀପଲ ଉପଦ୍ରବ ଚଳାଇଥିବା ବେଳେ ଏଥିରୁ ଦୁଇଟି ହାତୀ ଉକ୍ତ ପଞ୍ଚାୟତର ଶୁଖିଲାଖାଳି ଗ୍ରାମର ବଡ଼ା ମୁର୍ମୁଙ୍କ ଘରେ ଆକ୍ରମଣ କରିଥିଲେ। ବଡ଼ା ନିଜ ଘର ବାରଣ୍ଡାରେ ବୁଧବାର ଭୋର ସମୟରେ ଶୋଇଥିବା ସମୟରେ ଉକ୍ତ ହାତୀ ଦୁଇଟି ତାଙ୍କୁ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ବଡ଼ାଙ୍କୁ ସ୍ଥାନୀୟ ଲୋକେ ରାସଗୋବିନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିବା ଜଣାପଡ଼ିଛି। ଏହାପରେ ଉକ୍ତ ପଞ୍ଚାୟତ ଅଧୀନ ଡକାଶୋଳ ଗ୍ରାମର ନାଗି ହାଁସଦାଙ୍କ ଘର ଭାଙ୍ଗି ହାତୀ ପ୍ରବେଶ କରି ନାଗିଙ୍କୁ ଆକ୍ରମଣ କରି ଘରୁ ଘୋଷାଡ଼ି ଆଣି ଦଳି ଦେଇଥିଲେ। ନାଗିଙ୍କ ଶରୀରରୁ ଗୋଡ଼ ଅଲଗା କରିଥିଲେ। ଖବର ପାଇ ବନବିଭାଗ ପହଞ୍ଚି ନାଗିଙ୍କୁ ରାସଗୋବିନ୍ଦପୁର ଡାକ୍ତରଖାନାରେ ଭର୍ତ୍ତି କରାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
