ପାଟଣା,୨୫।୮(ସ୍ବ. ପ୍ର.): କେନ୍ଦୁଝର ଜିଲା ପାଟଣା ରେଞ୍ଜ୍ରେ ୨୩ ଟିକିଆ ହାତୀ ପଲଙ୍କ ଉପଦ୍ରବ ବଢ଼ିବାରେ ଲାଗିଛି। ହାତୀପଲ ଦିନବେଳେ ଜଙ୍ଗଲ ଭିତରେ ରହୁଥିବାବେଳେ ସାହେଲେ ଗାଁଭିତରକୁ ପଶି ଆଶି ଆତଙ୍କ ଖେଳାଉଛନ୍ତି। ଏହି ହାତୀପଲ ରବିବାର ପୁଣି କରଞ୍ଜିଆ ରେଞ୍ଜରୁ ଆସି ପାଟଣା ରେଞ୍ଜ ର ଗୋରାଣ୍ଡି ଯୋଡି ଓ ଉଦୟପୁର ବିଟ ଅନ୍ତର୍ଗତ ଚାତର ପାଣି, ଗୋଜିଟାଙ୍ଗିରି, ବାଲିତୋଟା, ବରବେଡା, ଲକ୍ଷ୍ମୀପଶୀ, ଜଗନ୍ନଥପୁର ଓ ଖୁଣ୍ଟାପଡା ଗ୍ରାମରେ ପଶି ଉପଦ୍ରବ କରିଛନ୍ତି। ଏହି ହାତୀପଲ ଖୁଣ୍ଟା ପଡା ଗ୍ରାମର ବନ ମାଳି ମୁଣ୍ଡାଙ୍କ ଆଜବେଷ୍ଟସ ଘର, ବରବେଡା ଗ୍ରାମର ପ୍ରଭାକର ମହନ୍ତଙ୍କ ପକ୍କା ଘର ଓ ଗୋଜିଟାଙ୍ଗିରି ଗ୍ରାମର ବୁଧୁ ମୁଣ୍ଡାଙ୍କ ଚାଳ ଘର କାନ୍ଥ ଓ ଆଜବେଷ୍ଟଷ୍ଟେସ କଣା କରିପକାଇବା ସହ ଭାଙ୍ଗି ଦେଇଛନ୍ତି। ହାତୀ ପଲଙ୍କ ଭୟଙ୍କର ଗର୍ଜନରେ ରାତିରେ ଲୋକେ ଭୟରେ ଉଜାଗର ହୋଇ ରହୁଛନ୍ତି। ଏଣେ ବନ ବିଭାଗର ଶତ ଚେଷ୍ଟା ପରେ ବି ପାଟଣା ଓ କରଞ୍ଜିଆ ରେଞ୍ଜରୁ ହାତୀପଲ ହଟୁ ନାହାନ୍ତି। ଏହି ହାତୀ ପଲ ଲୋକଙ୍କ ନିଦ ହଜାଇଦେବା ସହ ବନ ବିଭାଗକୁ ମଧ୍ୟ ୩ ଦିନ ହେବ ନାକେଦମ କରିସାରିଲେଣି। ଘଟଣା ସ୍ଥଳରେ ହାତୀ ଘଉଡାଇବା ଓ ତାଙ୍କ ଗତିବିଧିଉପରେ ନଜର ରଖିବାକୁ ସାହରାପଡା ଫରେଷ୍ଟର ସୁନିତା ବୋଘେଲଙ୍କ ସହ ରାଇଡିହା, ମାଛଗଡ଼, ଉଦୟପୁର ଫରେଷ୍ଟ ଗାର୍ଡ ଓ ପାରା ଷ୍ଟାଫ ଜଗି ରହି କାମ କରୁଥିବା ରେଞ୍ଜର ପବିତ୍ର ମୋହନ ନାୟକ ସୂଚନା ଦେଇଛନ୍ତି। ରବିବାର ୨୩ ଟିକିଆ ହାତୀପଲ ପାଟଣା ରେଞ୍ଜରେ ଉପଦ୍ରବ କରିବା ପରେ ୧୫ଟି ହାତୀ ସୋମବାର ସକାଳୁ ଦେଓ ନଦୀ ପାର ହୋଇ କରଞ୍ଜିଆ ରେଞ୍ଜକୁ ଚାଲି ଯାଇଥିବା ବେଳେ ୮ ହାତୀ ଉଦୟପୁର ବିଟ ଲକ୍ଷ୍ମୀପଶି ଖେସେରା ଜଙ୍ଗଲ ଓ ଜଗନ୍ନଥ ପୁର ଅଞ୍ଚଳରେ ସୋମବାର ଏକର ଏକର ଧାନ ଫସଲ ନଷ୍ଟ କରିଛନ୍ତି।
