ଭଞ୍ଜନଗର,୯।୫(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ତାରସିଂ ରେଞ୍ଜରେ ଶନିବାର ଅପରାହ୍ନରେ ଏକ ଦନ୍ତା ହାତୀ ମୃତ୍ୟୁବରଣ କରିଥିବା ଜଣାପଡ଼ିଛି। ହାତୀର ବୟସ ପ୍ରାୟ ୧୦ ବର୍ଷ ହେବ। ଏହି ଘଟଣା ଜଣାପଡ଼ିବା ପରେ ଡିଏଫ୍ଓ ହିମାଂଶୁ ଶେଖର ମହାନ୍ତି ପ୍ରମୁଖ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ଆଜି ରାତି ହୋଇଯାଇଥିବା ଯୋଗୁ ରବିବାର ଭୁବନେଶ୍ବରରୁ ଜେଟିଏଫ୍ ଟିମ୍ ଆସିବା ପରେ ହାତୀର ମୃତଦେହ ବ୍ୟବଚ୍ଛେଦ ହେଵ।
ସୂଚନାଯୋଗ୍ୟ, ହାତୀଟି ବିଗତ କିଛି ଦିନ ହେବ ଅସୁସ୍ଥ ରହି କେତେବେଳେ ନୟାଗଡ଼ ବନଖଣ୍ଡରେ କେତେବେଳେ ଘୁମୁସର ଉତ୍ତର ବନଖଣ୍ଡରେ ବୁଲୁଥିଲା। ୫ ଦିନ ପୂର୍ବେ ନୟାଗଡ଼ ବନଖଣ୍ଡ ପକ୍ଷରୁ ନନ୍ଦନ କାନନରୁ ଟିମ୍ ଆଣି ହାତୀର ଚିକିତ୍ସା କରାଯାଉଥିଲା। ଏହାପରେ ହାତୀଟି ସାମାନ୍ୟ ସୁସ୍ଥ ଅନୁଭବ କରିବା ପରେ ବିଭାଗୀୟ କର୍ମଚାରୀ ହାତୀ ଉପରେ ଆଉ ଠିକ୍ ଭାବେ ନଜର ରଖି ପାରି ନ ଥିଲେ। ଫଳରେ ହାତୀ ଘଞ୍ଚ ଜଙ୍ଗଲ ଭିତରକୁ ଚାଲି ଯାଇଥିଲା। ଆଜି ହାତୀର ମୃତଦେହ ଘୁମୁସର ଉତ୍ତର ବନଖଣ୍ଡରେ ଠାବ କରାଯାଇଥିଲା । ଅସୁସ୍ଥ ହାତୀଟି ସମ୍ପୂର୍ଣ ସୁସ୍ଥ ହୋଇ ନ ଥିବା ବେଳେ ତାକୁ ଛାଡ଼ି ଦିଆଯିବା ଯୋଗୁ ଅକାଳରେ ହାତୀଟି ମୃତ୍ୟୁବରଣ କରିଥିବା ଆଶଙ୍କା କରାଯାଉଛି।
