ଭୁବନେଶ୍ୱର, ୨୦।୭(ବ୍ୟୁରୋ): ହାତୀ ଆକ୍ରମଣରେ ଗତ ତିନିବର୍ଷରେ ଦେଶରେ ୧,୫୭୮ ଲୋକଙ୍କ ମୃତ୍ୟୁ ଘଟିଛି। ଏଥିରେ ଓଡ଼ିଶାରେ ସର୍ବାଧିକ ୩୨୨ଜଣଙ୍କ ଜୀବନ ଯାଇଥିବା କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦର ଯାଦବ ସୂଚନା ଦେଇଛନ୍ତି। ମଙ୍ଗଳବାର ଲୋକସଭାରେ ମନ୍ତ୍ରୀ ଏହି ତଥ୍ୟ ରଖିବା ସହ କହିଛନ୍ତି, ହାତୀ ଆକ୍ରମଣରେ ୨୦୧୯-୨୦ରେ ୫୮୫ଜଣଙ୍କ ମୃତ୍ୟୁ ଘଟିଥିବାବେଳେ ୨୦୨୦-୨୧ରେ ୪୬୧ ଓ ୨୦୨୧-୨୨ରେ ୫୩୨ଜଣଙ୍କ ଜୀବନ ଯାଇଛି। ତେବେ ଓଡ଼ିଶାରେ ସର୍ବାଧିକ ୩୨୨ଜଣ ମୃତକଙ୍କ ମଧ୍ୟରେ ୨୦୧୯ରେ ୧୧୭, ୨୦୨୦ରେ ୯୩ ଏବଂ ୨୦୨୧ରେ ୧୧୨ଜଣଙ୍କ ମୃତ୍ୟୁ ହୋଇଛି। ଓଡ଼ିଶା ପରେ ଝାଡ଼ଖଣ୍ଡ ରହିଛି। ଏଠାରେ ୨୯୧ଜଣଙ୍କ ମୃତ୍ୟୁ ଘଟିଥିବାବେଳେ ପଶ୍ଚିମବଙ୍ଗରେ ୨୪୦, ଆସାମରେ ୨୨୯, ଛତିଶଗଡ଼ରେ ୧୮୩, ତାମିଲନାଡ଼ୁରେ ୧୩୨, କର୍ନାଟକରେ ୬୯, କେରଳ ୫୭, ମେଘାଳୟ ୧୨ ଓ ଆନ୍ଧ୍ରପ୍ରଦେଶରେ ୧୦ଜଣଙ୍କ ମୃତ୍ୟୁ ହୋଇଛି। ଏହି ଅବସରରେ କେନ୍ଦ୍ର ମନ୍ତ୍ରୀ କହିଥିଲେ, ବନ୍ୟପ୍ରାଣୀ ପରିଚାଳନା ଏବଂ ହାତୀ-ମଣିଷ ଲଢ଼େଇରେ ରୋକ ଲଗାଇବା ପ୍ରତ୍ୟେକ ରାଜ୍ୟ ସରକାରଙ୍କ ଦାୟିତ୍ୱ। ହାତୀ ଆକ୍ରମଣରେ ମୃତ୍ୟୁ ସହ ହାତୀ ଶିକାର ରୋକିବା ପାଇଁ ରାଜ୍ୟଗୁଡ଼ିକ ପଦକ୍ଷେପ ନେବା ଉଚିତ। ହାତୀ ଆକ୍ରମଣରେ ଯେଉଁ ଲୋକଙ୍କର ମୃତ୍ୟୁ ଘଟୁଛି ଓ ଯେଉଁମାନଙ୍କର ଫସଲ କିମ୍ବା ଅନ୍ୟାନ୍ୟ ସମ୍ପତ୍ତି ନଷ୍ଟ ହେଉଛି, ଉକ୍ତ ଧନଜୀବନର କ୍ଷୟକ୍ଷତି ନିମନ୍ତେ ଅନୁକମ୍ପା ରାଶି ପ୍ରଦାନ କରାଯାଉଛି। ସେହିପରି ୨୦୧୭ରେ କେନ୍ଦ୍ର ସରକାର ହାତୀ-ମଣିଷ ଲଢ଼େଇ ପରିଚାଳନା ପାଇଁ ଏକ ଗାଇଡ୍ଲାଇନ ପ୍ରସ୍ତୁତ କରିଥିଲେ। ଗତ ଏପ୍ରିଲ ମାସରେ ସମ୍ମୁଖ କର୍ମଚାରୀଙ୍କ ପାଇଁ ଫିଲ୍ଡ ମାନୁଆଲ ଲାଗୁ କରାଯାଇଥିଲା।
