ପଟ୍ଟାମୁଣ୍ଡାଇ,୬ା୬(ସ୍ବ.ପ୍ର.): ବିଦ୍ୟୁତ୍ ପରିଚାଳନା ଦାୟିତ୍ୱ ଟାଟା କମ୍ପାନୀକୁ ଦିଆଯିବା ପରେ ପୂର୍ବ ଅବସ୍ଥାରେ ସୁଧାର ଆସିବ ବୋଲି ଆଶା କରାଯାଉଥିଲା। ଏନ୍ଜେନ୍ ହାତରୁ ଦାୟିତ୍ୱ କାଢ଼ି ରାଜ୍ୟ ସରକାର ଟାଟା କମ୍ପାନୀକୁ ଦାୟିତ୍ୱ ଦେବା ପରେ ପରିସ୍ଥିତି ସୁଧୁରିବା ବଦଳରେ ଅଧିକ ବିଗିଡ଼ି ଯାଇଛି। ଖାଲି ସେତିକି ନୁହେଁ, ବିଦ୍ୟୁତ୍ ଖୁଣ୍ଟ ଭାଙ୍ଗିଯାଇଥିବାବେଳେ ତାରକୁ ବିପଜ୍ଜନକ ଭାବେ ବାଉଁଶ ଖୁଣ୍ଟ ସାହାଯ୍ୟରେ ନିଆଯାଉଛି। ଏଭଳି ଏକ ଦୃଶ୍ୟ ପଟ୍ଟାମୁଣ୍ଡାଇ ବ୍ଲକ ଡାମରପୁର ପଞ୍ଚାୟତରେ ଦେଖିବାକୁ ମିଳିଛି। ରାସ୍ତାପାର୍ଶ୍ୱରେ ବିଦ୍ୟୁତ୍ ଟ୍ରାନ୍ସଫର୍ମର ଲାଗିଥିବା ସ୍ଥାନ ଫୁଙ୍ଗୁଳା ପଡ଼ିଥିବାବେଳେ ହାତପାହାନ୍ତାରେ ଝୁଲିରହିଛି ଉଚ୍ଚ ଶକ୍ତିସମ୍ପନ୍ନ ୧୧ କେଭି ବିଦ୍ୟୁତ୍ ତାର। ଖାଲି ସେତିକି ନୁହେଁ, ଘରୋଇ ବ୍ୟବହାର ପାଇଁ ଯାଇଥିବା ବିଦ୍ୟୁତ୍ ତାରର ଖୁଣ୍ଟ ଭାଙ୍ଗି ଯାଇଥିବାରୁ ବିଭାଗ ପକ୍ଷରୁ ବାଉଁଶ ଖୁଣ୍ଟ ଠେସ ଦିଆଯାଇଛି।
ପ୍ରତିଦିନ ବାରମ୍ବାର ବିଦ୍ୟୁତ୍ କାଟ୍ ନିତିଦିନିଆ ଘଟଣାରେ ପରିଣତ ହେଲାଣି। ଗ୍ରୀଷ୍ମର ଅସହ୍ୟ ତାତି ତଥା ଗୁଳୁଗୁଳିରେ ଲୋକେ ଅତିଷ୍ଠ ହୋଇପଡୁଥିବା ବେଳେ ଘନ ଘନ ବିଦ୍ୟୁତ କାଟ୍ ଯୋଗୁ ବୃଦ୍ଧାବୃଦ୍ଧଙ୍କଠାରୁ ଆରମ୍ଭ କରି ଶିଶୁମାନେ ଆଉଟୁପାଉଟୁ ହୋଇପଡୁଛନ୍ତି। ବିଦ୍ୟୁତ୍ କ୍ଷେତ୍ରରେ ଓଡ଼ିଶା ବଳକା ରାଜ୍ୟ ଭାବେ ପରିଚିତ ହୋଇଥିଲେ ହେଁ ବିଭ୍ରାଟକୁ ନେଇ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତେବେ ଦିନବେଳା ବିଦ୍ୟୁତ୍ ନ କାଟିବାକୁ ଶକ୍ତି ସଚିବଙ୍କ ନିର୍ଦ୍ଦେଶକୁ ଟିପିସିଓଡିଏଲ କର୍ତ୍ତୃପକ୍ଷ ଗ୍ରହଣ କରୁ ନ ଥିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଅନ୍ୟପକ୍ଷରେ ବିଦ୍ୟୁତ୍ ଉପଭୋକ୍ତାଙ୍କ ଘରେ ଲାଗିଥିବା ଭଲ ମିଟରଗୁଡିକୁ ଜୋରଜବରଦସ୍ତ ବଦଳାଇବା, କୌଣସି କାରଣ ନ ଥାଇ ଉପଭୋକ୍ତାଙ୍କ ଘରେ ବିଦ୍ୟୁତ ସ୍କ୍ବାଡ୍ ପଶି ମୋଟାଅଙ୍କର ଅର୍ଥ ଜରିମାନା କରିବା, କୌଣସି ନୋଟିସ ନ ଥାଇ ଖୁଣ୍ଟରୁ ସର୍ଭିସ୍ ତାର ସଂଯୋଗ କାଟିଦେବା ଆଦି ଘଟଣାରେ ଲୋକେ ଅତିଷ୍ଠ ହୋଇପଡ଼ିଲେଣି। ଅନ୍ୟପକ୍ଷରେ ଉଚ୍ଚ ଶକ୍ତିସମ୍ପନ୍ନ ୧୧ କେଭି ଓ ୩୩ କେଭି ତାର ହାତ ପାହାନ୍ତାରେ ଝୁଲୁଛି। ଉପଭୋକ୍ତାମାନେ ବିଦ୍ୟୁତ୍ ଦେୟ ଦେଇ ମଧ୍ୟ ଉପଯୁକ୍ତ ସେବା ପାଇବାରୁ ବଞ୍ଚତ୍ତ ହେଉଛନ୍ତି। କମ୍ପାନୀର ଏପରି ଖେଳ ଲୋକଙ୍କ ଜୀବନ ପ୍ରତି କାଳ ବୋଲି ସାଧାରଣରେ ମତପ୍ରକାଶ ପାଇଛି।
