ନୟାଗଡ଼ ଅଫିସ,୬ା୪: ନୟାଗଡ଼ ଜିଲାରେ ବିଦ୍ୟୁତ୍ ବିଭାଗର ମନମାନି ବଢ଼ି ଚାଲିଛି। ଏଥିପାଇଁ ଉପଭୋକ୍ତାମାନେ ଆର୍ଥିକ ଓ ମାନସିକସ୍ତରରେ ନିର୍ଯାତିତ ହେଉଛନ୍ତି। ଅଭିଯୋଗ ସତ୍ତ୍ୱେ ପ୍ରତିକାର ପାଇଁ ପଦକ୍ଷେପ ଗ୍ରହଣ କରାଯାଉନାହିଁ। ଅଧିକାଂଶ ଉପଭୋକ୍ତା ଅଭିଯୋଗ କରି ଥକିପଡ଼ିବା ପରେ ବାଧ୍ୟ ହୋଇ ନୀରବ ରହୁଛନ୍ତି । ଏମିତି କିଛି ଅଭିଯୋଗକୁ ନେଇ ଧରିତ୍ରୀର ସ୍ବତନ୍ତ୍ର ଉପସ୍ଥାପନା…
ଅନାବଶ୍ୟକ ଦେୟ ଆଦାୟ
ବିଦ୍ୟୁତ୍ ବିଭାଗ ଉପଭୋକ୍ତାଙ୍କଠାରୁ ଅନାବଶ୍ୟକ ଦେୟ ଆଦାୟ କରି ଚାଲିଛି । ଏମ୍ଏଫ୍ସି, କଷ୍ଟମର ଚାର୍ଜ, ଇଡି, ମିଟର ଚାର୍ଜ ପରି ଅନେକ ଦେୟ ବିଦ୍ୟୁତ୍ ବିଲରେ ଆସୁଛି । ଉପରୋକ୍ତ ଦେୟ ସଂକ୍ରାନ୍ତରେ ମିଟର ରିଡିଂ କର୍ମଚାରୀଙ୍କୁ ପଚାରିଲେ ଉତ୍ତର ମିଳୁନି । ବିଦ୍ୟୁତ୍ ବିଭାଗ ଅଧିକାରୀ ଅଥବା କର୍ମଚାରୀ ଏ ସଂକ୍ରାନ୍ତରେ କୌଣସି ସ୍ପଷ୍ଟ ଉତ୍ତର ଦେଉ ନାହାନ୍ତି। ଉପଭୋକ୍ତାମାନେ କିପରି ନ୍ୟାୟ ପାଇବେ ସେ ନେଇ କୌଣସି ବ୍ୟବସ୍ଥା ନ ଥିବାରୁ ଅସନ୍ତୋଷ ବଢ଼ି ଚାଲିଛି ।
-ଧିରେନ ପଟ୍ଟନାୟକ, ନୟାଗଡ଼
ଶିଡି ଧରି ବୁଲୁଛନ୍ତି ବିଦ୍ୟୁତ୍ କର୍ମଚାରୀ
ଆକାଶରେ କଳାମେଘ ଦେଖିଲେ ଅଥବା ପବନର ଆଭାସ ମିଳିଲେ ଗ୍ରାମାଞ୍ଚଳରେ ବିଦ୍ୟୁତ୍ କାଟ ହୋଇଥାଏ । ସେହିପରି ବିନା ସୂଚନାରେ ବହୁ ଘଣ୍ଟା ଧରି ଅଘୋଷିତ ବିଦ୍ୟୁତ୍ କାଟ ଚାଲୁ ରହିଛି । ପୁଣି ଯଦି କେହି ଉପଭୋକ୍ତା ବିଦ୍ୟୁତ୍ ଦେୟ କିଛି ଅସୁବିଧା ବଶତଃ ଦେଇ ପାରି ନାହାନ୍ତି ବିନା ସୂଚନାରେ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରି ଦିଆଯାଉଛି । ଗାଁ ଗଣ୍ଡାରେ ଓ ସହରରେ ସିଡି ବନ୍ଧା ବିଦ୍ୟୁତ୍ ଗାଡ଼ି ଘୁରି ବୁଲୁଛି। ପୂର୍ବ ସୂଚନା ନ ଦେଇ ବିଦ୍ୟୁତ୍ ବିଚ୍ଛିନ୍ନ ବେଆଇନ ହୋଇଥିଲେ ହେଁ ଏହାକୁ ବିଭାଗ ମାନିବାକୁ ରାଜି ନୁହେଁ ।
-ବିରଞ୍ଚି ନାରାୟଣ ପ୍ରଧାନ,
ଜଗନ୍ନାଥ ପ୍ରସାଦ, ଖଣ୍ଡପଡ଼ା।
ଅଯଥାରେ ବିଲ୍ ବଢ଼ୁଛି
ମିଟର ରିଡିଂ ମାସକୁ ଥରେ ନେବା ପାଇଁ ନିୟମ ରହିଛି। ହେଲେ ଅଧିକାଂଶ ସ୍ଥାନରେ ୧ମାସ ହୋଇ ନ ଥିବ ରିଡିଂ ନିଆଯାଉଛି । ପୁଣି ମାସେ ବିତି ଗଲା ପରେ ରିଡିଂ ନିଆଯାଉଛି। ମାସ ପରେ ମିଟର ରିଡିଂ ନେବା ଯୋଗୁ ଉପଭୋକ୍ତାଙ୍କ ଉପରେ ୟୁନିଟ ପିଛା ଦର ବଢ଼ି ଯାଉଛି । ଉପଭୋକ୍ତା ମାସକୁ ଅଯଥାରେ ୧୦୦ ଟଙ୍କାରୁ ଆରମ୍ଭ କରି ଅଧିକ ଖର୍ଚ୍ଚ କରିବାକୁ ପଡୁଛି। ସେହିଭଳି ବିଦ୍ୟୁତ୍ କାଟିବାର ସୂଚନା ଡାକବାଜି ଯନ୍ତ୍ର ଦ୍ୱାରା ଆଉ ପ୍ରଚାର କରାଯାଉନି । ଟୋଲ ଫ୍ରି ନମ୍ବରରେ ଫୋନ କଲେ ହଇରାଣ ହେବାକୁ ପଡୁଛି ।
-ସନ୍ତୋଷ ଷଢ଼ଙ୍ଗୀ, ଗୋଡିପଡା, ଓଡ଼ଗାଁ ।
ସ୍ବତନ୍ତ୍ର ବ୍ୟବସ୍ଥା ଆବଶ୍ୟକ
ବିଦ୍ୟୁତ୍ ଉପଭୋକ୍ତାମାନଙ୍କ ଅସୁବିଧା ନିରାକରଣ ପାଇଁ ସ୍ବତନ୍ତ୍ର ବ୍ୟବସ୍ଥାର ଆବଶ୍ୟକତା ରହିଛି। ହେଲେ ସେଥିପାଇଁ କୌଣସି ବ୍ୟବସ୍ଥା ନାହିଁ । ଫଳରେ ଉପଭୋକ୍ତାମାନେ ଆର୍ଥିକ ଦୃଷ୍ଟିକୋଣରୁ କ୍ଷତିଗ୍ରସ୍ତ ହୋଇ ଚାଲିଛନ୍ତି । ମିଟର ରିଡିଂରେ ଯେଉଁ ବିଲ୍ ଆସୁଛି ସେଥିରେ ମନଇଛା ଦେୟ ପଡୁଛି । ମିଟର ରିଡିଂ ଠିକ୍ ସମୟ ଅନ୍ତରରେ ନିଆଯାଉନାହିଁ । ପ୍ରତିବାଦ କଲେ ବିଦ୍ୟୁତ୍ ସଂଯୋଗ କାଟି ଦେବାର ଧମକ ମିଳୁଛି । ବିକଳ୍ପ ବ୍ୟବସ୍ଥା ନ ଥିବାରୁ ସବୁ ସହିବାକୁ ପଡୁଛି । ଉପଭୋକ୍ତା କମିଟି ନ ଥିବାରୁ ବିଭାଗ ଏହାର ଫାଇଦା ନେଉଛି।
-ଗୋପବନ୍ଧୁ ଖଣ୍ଡୁଆଳ, ନୂଆଗାଁ ଉପଭୋକ୍ତା ।
ବିଦ୍ୟୁତ୍ ଉପଭୋକ୍ତା କମିଟି ଦରକାର
ବିଦ୍ୟୁତ୍ ବିଭାଗର ନିର୍ଯାତନା ବଢ଼ି ଚାଲିଛି । ଏଥିରେ ଲଗାମ ଦେବା ପାଇଁ ଗାଁ ଓ ସହରରେ ବିଦ୍ୟୁତ୍ ଉପଭୋକ୍ତା ସଂଘ ଦରକାର । ନୟାଗଡ଼ରେ ବିଦ୍ୟୁତ୍ ଉପଭୋକ୍ତା ସଂଘ ଗଠନ କରାଯାଇଛି । ସଂଘ ଉପଭୋକ୍ତାଙ୍କ ସମସ୍ୟାକୁ ସମାଧାନ କରିବା ପାଇଁ ଉଦ୍ୟମ ଜାରି ରଖିଛି । ପ୍ରତି ଗାଁରେ ବିଦ୍ୟୁତ୍ ଉପଭୋକ୍ତା ସମିତି ଗଠନ କରି ଅବ୍ୟବସ୍ଥା ବିରୋଧରେ ମୁହଁ ଖୋଲିବାକୁ ପଡିବ । ବିଦ୍ୟୁତ୍ ବିଭାଗ ଯେମିତି ଠକେଇ ଆରମ୍ଭ କରିଛି ତାର ତୁରନ୍ତ ସମାଧାନ ହେବା ଦରକାର।
-ଅବଦୁଲ ଆରିଫ ଖାନ,ସଭାପତି, ନୟାଗଡ଼ ବିଦ୍ୟୁତ୍ ଉପଭୋକ୍ତା ସଂଘ।
