ଭଞ୍ଜନଗର,୫ା୬(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଟାଟା ପାଓ୍ବାର ଅଧୀନରେ କାର୍ଯ୍ୟରତ କର୍ମଚାରୀ ଦୁର୍ଗାମାଧବ ଜେନା (୪୫) ଶୁକ୍ରବାର ଫିଲ୍ଡରେ କାମ କରୁଥିବା ବେଳେ ହଠାତ୍ ଟଳିପଡ଼ିଥିଲେ। ଦିନବେଳେ ତାପମାତ୍ରା ଅଧିକ ଥିବା ବେଳେ ଅନ୍ୟପଟେ ନିର୍ଦ୍ଧାରିତ ସମୟରୁ ଅଧିକ ସମୟ କର୍ମଚାରୀମାନେ କାମ କରୁଛନ୍ତି। ଏହିଭଳି ପରିସ୍ଥିତିରେ ବିଶ୍ରାମ ନ ପାଇ କର୍ମଚାରୀ ଜଣଙ୍କ ଅଂଶୁଘାତର ଶିକାର ହୋଇ ଅକାଳ ବିୟୋଗ ହୋଇଥିବା ଅଭିଯୋଗ ହୋଇଛି।
ଘଟଣାରୁ ପ୍ରକାଶ ଯେ ବର୍ତ୍ତମାନ ଗ୍ରୀଷ୍ମ ଋତୁ ଚାଲିଛି। ତେଣୁ ବିଦ୍ୟୁତ୍ ଉପରେ ଚାପ ପଡ଼ୁଛି। ତେଣୁ ବାରମ୍ବାର ପାଓ୍ବାର କଟ୍ ହେଉଛି। ଫଳରେ କର୍ମଚାରୀମାନେ ବିଭାଗୀୟ ଉଚ୍ଚ ପଦାଧିକାରୀଙ୍କ ଚାପରେ ବାଧ୍ୟ ହୋଇ ଅଧିକ ସମୟ କାମ କରୁଛନ୍ତ। ଏହିଭଳି ଭଞ୍ଜନଗର ସହରତଳି ବିଛୁଆତିର ଦୁର୍ଗା ମାଧବ ଜେନା ଆଜି ଡୁମାକୁମ୍ପା ନିକଟରେ ପ୍ରବଳ ଗରମ ସତ୍ତ୍ୱେ ଅନ୍ୟ ସହଯୋଗୀମାନଙ୍କ ସହ କାମ କରୁଥିଲେ। ପ୍ରାୟ ସାଢ଼େ ୨ ଟାରୁ ୩ ଟା ମଧ୍ୟରେ ହଠାତ୍ ସେ ଅସୁସ୍ଥ ଅନୁଭବ କରିଥିଲେ। ଏହାପରେ ସେଠାରେ କାର୍ଯ୍ୟରତ ଥିବା ଅନ୍ୟ କର୍ମଚାରୀମାନେ ତାଙ୍କୁ ତୁରନ୍ତ ଚିକିତ୍ସା ପାଇଁ ଭଞ୍ଜନଗର ହସ୍ପିଟାଲକୁ ଆଣିଥିଲେ। ଏଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ଘଟିଛି। ଦୁର୍ଗାମାଧବଙ୍କ ଗୋଟିଏ ଛୁଆ ଓ ସ୍ତ୍ରୀ ଅଛନ୍ତି। ଦୁର୍ଗାମାଧବଙ୍କ ଅକାଳ ବିୟୋଗ ପରେ ପରିବାର ଲୋକେ ଭାଙ୍ଗି ପଡ଼ିଛନ୍ତି। ତେଣୁ ତାଙ୍କ ପରିବାରକୁ ଟାଟା ପାୱାର ପକ୍ଷରୁ ପର୍ଯ୍ୟାପ୍ତ କ୍ଷତିପୂରଣ ଯୋଗାଇ ଦେବାସହ ସ୍ତ୍ରୀଙ୍କୁ କମ୍ପାନୀରେ ଚାକିରି ଦେବାକୁ ଦାବି ହୋଇଛି। ଏହି ଘଟଣା ପରେ କର୍ମଚାରୀ ମହଲରେ ଶୋକର ଛାୟା ଖେଳିଯାଇଛି। ଦୁର୍ଗାମାଧବ ଜଣେ ମେଳାପୀ, ଶାନ୍ତ ସ୍ବଭାବର କର୍ମଚାରୀ ଥିଲେ। ଦୁର୍ଗାମାଧବ ହେଉଛନ୍ତି ଭଞ୍ଜନଗର ଭାଜପା ନେତା ସନ୍ତୋଷ ଜେନା ଓ ମାନସ ଜେନାଙ୍କ ସାନ ଭାଇ।
