ଜଗତ୍ସିଂହପୁର ଅଫିସ, ୧୩ା୨: ରାଜନୈତିକ ଦୃଷ୍ଟିକୋଣରୁ ପୂର୍ବତନ ଉପମୁଖ୍ୟମନ୍ତ୍ରୀ ତଥା ସ୍ବର୍ଗତ ବସନ୍ତ ବିଶ୍ୱାଳଙ୍କ ଅଞ୍ଚଳ ହିସାବରେ ଅତୀତରୁ ଜଗତ୍ସିଂହପୁର ଜିଲାର ତିର୍ତ୍ତୋଲ ବ୍ଲକର ସ୍ବତନ୍ତ୍ର ପରିଚୟ ରହିଆସିଛି। ତିର୍ତ୍ତୋଲ ବ୍ଲକ ଅଞ୍ଚଳରେ ୪ଟି ଜିଲା ପରିଷଦ ଜୋନ ରହିଛି। ସେଥିମଧ୍ୟରୁ ୧ନଂ. ଜିଲା ପରିଷଦ ଜୋନର ଗୁରୁତ୍ୱ ରହିଛି। କାରଣ ଗତ ନିର୍ବାଚନରେ ବିଜେଡି ଓ କଂଗ୍ରେସ ପ୍ରାର୍ଥୀଙ୍କ ଭିତରେ କଡା ଟକ୍କର ହୋଇଥିଲା। ମାତ୍ର ୭୬ ଖଣ୍ଡ ଭୋଟ ବ୍ୟବଧାନରେ କଂଗ୍ରେସକୁ ହରାଇ ବିଜେଡି ପ୍ରାର୍ଥୀ ଜିତିଥିଲେ। ବଡ କଥା ହେଲା ଏହି ନିର୍ବାଚନରେ ସ୍ବାଧୀନ ପ୍ରାର୍ଥୀ ପ୍ରମୁଖ ଭୂମିକା ନିଭାଇଥିଲେ। ଚଳିତ ନିର୍ବାଚନରେ କେହି ସ୍ବାଧୀନ ପ୍ରାର୍ଥୀ ହୋଇ ନ ଥିବାରୁ ଲଢେଇ ବିଶେଷକରି ବିଜେଡି, କଂଗ୍ରେସ ଓ ଭାଜପା ମଧ୍ୟରେ ହେବ ବୋଲି ରାଜନୈତିକ ବିଶେଷଜ୍ଞମାନେ ମତପ୍ରକାଶ କରୁଛନ୍ତି ।
ତିର୍ତ୍ତୋଲ ୧ନଂ. ଜୋନ ଗତଥର ପଛୁଆବର୍ଗ ମହିଳାଙ୍କ ପାଇଁ ସଂରକ୍ଷିତ ଥିଲା। କିନ୍ତୁ ଏଥର ମହିଳାଙ୍କ ପାଇଁ ସଂରକ୍ଷିତ କରାଯାଇଛି। ଏହି ଜୋନ ଆମ୍ବେରୀ, ବିଶୁନପୁର, ଦାଇଁଲୋ, ଗୋପାଳପୁର(ଏସ୍), କନିମୂଳ, କ୍ରୀଷ୍ଣାନନ୍ଦପୁର ଓ ସାମନ୍ତରାପୁର ପଞ୍ଚାୟତକୁ ନେଇ ଗଠିତ। ଗତ ନିର୍ବାଚନରେ ଜୋନର ଭୋଟର ସଂଖ୍ୟା ୩୪,୧୫୦ ଥିଲା। ଏଥର ଅଧିକ ୨୪୦୫ ଜଣ ଯୋଡି ହୋଇଛନ୍ତି। ଯାହାଦ୍ୱାରା ମୋଟ ଭୋଟର ସଂଖ୍ୟା ୩୬,୫୫୫ରେ ପହଞ୍ଚତ୍ଛି। ୨୦୧୭ ନିର୍ବାଚନ ଫଳାଫଳ ଦେଖିଲେ ଏହି ଜୋନରୁ ବିଜେଡି ପ୍ରାର୍ଥୀ ସନାତନ ଦଳେଇଙ୍କୁ ୮୦୪୩ ଖଣ୍ଡ, ଅର୍ଥାତ୍ ମୋଟ ମତଦାନର ୨୩.୫୫% ଭୋଟ ମିଳିଥିଲା। କଂଗ୍ରେସର ମନୋରଞ୍ଜନ ସାମଲଙ୍କ ସପକ୍ଷରେ ୭୯୬୭ ଖଣ୍ଡ, ଅର୍ଥାତ୍ ୨୩.୩୨% ଭୋଟ ଯାଇଥିଲା। ଭାଜପାର ଜ୍ୟୋତିରଞ୍ଜନ ସାହୁଙ୍କୁ ୩୩୬୯ ଖଣ୍ଡ, ଅର୍ଥାତ୍ ୯.୮୬% ଭୋଟ ମିଳିଥିଲା। ଏହି ନିର୍ବାଚନରେ ସ୍ବାଧୀନ ଭାବେ ପ୍ରାର୍ଥୀ ହୋଇଥିବା ଉପେନ୍ଦ୍ରନାଥ ମହାନ୍ତିଙ୍କୁ ୫୮୭୨ ଖଣ୍ଡ, ଅର୍ଥାତ୍ ୧୭.୧୯% ଭୋଟ ମିଳିବା ସବୁ ସମୀକରଣ ଗୋଳମାଳ କରି ଦେଇଥିଲା। ଏଥର ବିଜେଡିରୁ ରଞ୍ଜିତା ସିଂହ, କଂଗ୍ରେସରୁ ଶମିଷ୍ଠା ଦାସ ଓ ଭାଜପାରୁ କିରଣବାଳା ରାଉତ ପ୍ରାର୍ଥୀ ହୋଇଛନ୍ତି।
ଭାଜପା ପ୍ରାର୍ଥୀ ରାଉତ କହିଛନ୍ତି, ଜୋନ ଅନ୍ତର୍ଗତ ସମସ୍ତ ୭ଟି ପଞ୍ଚାୟତରେ ତାଙ୍କର ସ୍ଥିତି ଭଲ ଅଛି। କିନ୍ତୁ କନିମୂଳ, ଗୋପାଳପୁର, ସାମନ୍ତରାପୁର ଓ ଦାଇଁଲୋରେ ଅଧିକ ଭଲ ରହିଛି। ପଞ୍ଚାୟତଗୁଡିକରେ ଅସନ୍ତୁଷ୍ଟ ସରପଞ୍ଚ ଓ ସମିତି ସଭ୍ୟ ପ୍ରାର୍ଥୀ ହୋଇଥିବା ଏକାଧିକ ନେତା ବିଜେଡି ଉପରେ ଅସନ୍ତୋଷ ବ୍ୟକ୍ତ କରୁଛନ୍ତି। ସେମାନେ ତାଙ୍କୁ ସ୍ବତଃ ସହଯୋଗ କରିବେ ବୋଲି ବିଶ୍ୱାସ ଦେଉଛନ୍ତି। ସ୍ବାମୀ ଭାରତୀୟ ସେନାର ଜଣେ ଗାଡି ଚାଳକ ଥିଲେ। ଅବସର ପରେ ଓଡ଼ିଶା ପୋଲିସରେ କାମ କରିଛନ୍ତି। ମୁଖ୍ୟମନ୍ତ୍ରୀଙ୍କ ସିପିଟି (କ୍ଲୋଜ ପ୍ରୋଟେକ୍ସନ ଟିମ୍)ରେ ଡ୍ରାଇଭର ଥିଲେ। ଏ ପର୍ଯ୍ୟନ୍ତ କଳଙ୍କ ଲାଗିନି। ତେଣୁ ସ୍ବଚ୍ଛତାକୁ ସେ ସମ୍ବଳ କରିବା ସହ ଠାକୁରଙ୍କ ଆଶ୍ରିତ ଅଛନ୍ତି। ବିଭିନ୍ନ ଆଧ୍ୟାତ୍ମିକ କାର୍ଯ୍ୟକ୍ରମରେ ସାମିଲ ରହୁଥିବାରୁ ଲୋକମାନଙ୍କ ଆଦର ଦେଖିବାକୁ ମିଳୁଛି। ତେଣୁ ଜନମତ ତାଙ୍କ ସପକ୍ଷରେ ଯିବ ବୋଲି ରାଉତ କହିଛନ୍ତି। ବିଜେଡିର ସିଂହ କହିଛନ୍ତି, ବାପା ରାଜନୀତିରେ ଥିଲେ, କିନ୍ତୁ ସେ ରାଜନୀତିରେ ନୂଆ। ମହିଳା ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ୨୦୦୬ରୁ ମହିଳାମାନଙ୍କୁ ସଶକ୍ତୀକରଣ ପାଇଁ ଅହରହ ଉଦ୍ୟମ କରି ଚାଲିଛନ୍ତି। ଯେଉଁ କାରଣରୁ ବିଜେଡି ତାଙ୍କ ଉପରେ ଆସ୍ଥା ପ୍ରକଟ ସହ ତିର୍ତ୍ତୋଲ ବ୍ଲକ ବିଜୁ ମହିଳା ଜନତା ଦଳ ସଭାପତି କରିଛି। ଜୋନ ଅନ୍ତର୍ଗତ ସମସ୍ତ ପଞ୍ଚାୟତରେ ଲୋକ ସମ୍ପର୍କ ଅଛି। ତେଣୁ ଭଲ ଭୋଟ ମିଳିବ। ଶାଶୁ ଘର କନିମୂଳ ହୋଇଥିବାରୁ ଏହି ପଞ୍ଚାୟତରୁ ଭଲ ଭୋଟ ମିଳିବ। ବିଜେଡି ଶାସନ ଉପରେ ଲୋକେ ଆସ୍ଥା ପ୍ରକଟ କରୁଥିବାରୁ ତାଙ୍କ ସପକ୍ଷରେ ଜନମତ ଯିବ ବୋଲି ସେ ଆଶାବ୍ୟକ୍ତ କରିଥିଲେ। କଂଗ୍ରେସ ଜିଲା ସଭାପତି ନଟବର ବାରିକ କହିଛନ୍ତି, ଏହି ଜୋନରେ ଗତ ନିର୍ବାଚନରେ କଂଗ୍ରେସ ଭଲ ସ୍ଥିତିରେ ଥିଲା। ବହୁ କମ ଭୋଟ ବ୍ୟବଧାନରେ ଦଳୀୟ ପ୍ରାର୍ଥୀ ହାରି ଯାଇଥିଲେ। ସ୍ବାଧୀନ ପ୍ରାର୍ଥୀଙ୍କ ସପକ୍ଷରେ ଅଧିକ ଭୋଟ ଯାଇ ନ ଥିଲେ କଂଗ୍ରେସ ପ୍ରାର୍ଥୀ ଜିତିବାର ଯଥେଷ୍ଟ ସମ୍ଭାବନା ଥିଲା । ଏଥର ମଧ୍ୟ କଂଗ୍ରେସ ଜଣେ ଯୋଗ୍ୟ ପ୍ରାର୍ଥୀ ଦେଇଛି। ଲଢେଇ ଜୋରଦାର ହେବ। ଅସନ୍ତୁଷ୍ଟ ବିଜେଡି ଭୋଟ କଂଗ୍ରେସ ସପକ୍ଷରେ ଅଧିକ ଜନମତ ସୃଷ୍ଟି କରିବ ବୋଲି ବାରିକ କହିଛନ୍ତି। ତେବେ ଆଗକୁ ଦେଖିବାର ଅଛି ପରିସ୍ଥିତିରେ କି ପରିବର୍ତ୍ତନ ଆସୁଛି।
