କୋଲକାତା/ନୂଆଦିଲ୍ଲୀ,୧୪ା୪: ପଶ୍ଚିମବଙ୍ଗ ବିଧାନସଭା ନିର୍ବାଚନ ‘ଗଣତନ୍ତ୍ରର ଉତ୍ସବ’ ରୂପେ ଉତ୍ସାହଜନକ ହୋଇନାହିଁ। ଶାସକ ତୃଣମୂଳ କଂଗ୍ରେସ ଏବଂ ବିରୋଧୀ ଭାଜପା ନେତାଙ୍କ ବୟାନବାଜି ସମଗ୍ର ପ୍ରଚାରକୁ ତିକ୍ତ ଓ ଅରୁଚିକର କରିଦେଇଛି। ମୁଖ୍ୟ ଦୁଇ ଦଳ ପରସ୍ପର ବିରୋଧରେ ହିଂସା ଭିଆଇବା ଏବଂ ଆଦର୍ଶ ଆଚରଣ ବିଧି ଉଲ୍ଲଂଘନ କରୁଥିବା ଅଭିଯୋଗ ଆଣିବାରେ ଲାଗିଛନ୍ତି। ପଶ୍ଚିମବଙ୍ଗବାସୀଙ୍କ ଆସ୍ଥାକୁ ପୁନଃ ଅବସ୍ଥାପିତ କରିବା ପାଇଁ ନିର୍ବାଚନ କମିଶନ ଉଚିତ ପଦକ୍ଷେପ ନେଇପାରିଥାଆନ୍ତେ। ଭୋଟରଙ୍କ ରାଜନୈତିକ ମତାଧିକାରକୁ ସୁରକ୍ଷା ଦେଇପାରିଲେ ହିଁ ଇସିଙ୍କ ଉପରେ ଲୋକଙ୍କ ଭରସା ବଜାୟ ରହିବ ବୋଲି ମତ ପ୍ରକାଶ ପାଇଛି। ଏଥିସହ ଆୟୋଗଙ୍କ ନିରପେକ୍ଷତା ଓ ସ୍ବାୟତ୍ତତା ଉପରେ ପ୍ରଶ୍ନଚିହ୍ନ ଲାଗିଛି।
ପଶ୍ଚିମବଙ୍ଗର ୮ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ମାରାଥନ ପ୍ରଚାର ଚାଲିଥିବାବେଳେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ‘ଖେଲା’ରେ ହଠାତ୍ ୨୪ ଘଣ୍ଟିଆ ରୋକ୍ ଲଗାଇଦେଇଥିଲେ ଭାରତର ନିର୍ବାଚନ କମିଶନ (ଇସିଆଇ)। ଏହାର ପ୍ରତିବାଦରେ ମମତା କୋଲକାତାରେ ଧାରଣାରେ ବସି ବିକ୍ଷୋଭ କରିଥିଲେ। ନିର୍ବାଚନ ଆୟୋଗଙ୍କ ପ୍ରଚାର ବାସନ୍ଦ ନିଷ୍ପତ୍ତିକୁ ତୃଣମୂଳ କଂଗ୍ରେସ (ଟିଏମ୍ସି) ସୁପ୍ରିମୋ ମମତା ଅସାମ୍ବିଧାନିକ ଓ ଅଗଣତାନ୍ତ୍ରିକ ବୋଲି ଦର୍ଶାଇଛନ୍ତି। ମମତା ମଙ୍ଗଳବାର ପୂର୍ବାହ୍ନ ୧୧ଟା ୪୦ରେ ହୁଇଲ୍ ଚେୟାରରେ ମାୟୋ ରୋଡ୍କୁ ଆସି ଗାନ୍ଧୀ ମୂର୍ତ୍ତି ନିକଟରେ ଏକୁଟିଆ ଧାରଣାରେ ବସିଥିଲେ। ପ୍ରତିବାଦ ଜଣାଇବାକୁ ଯାଇ ସେ ଏକ କଳା ସ୍କାର୍ପ ଘୋଡ଼ି ହୋଇଥିଲେ। ସେ ପେଣ୍ଟିଂ ମଧ୍ୟ କରିଥିଲେ। ଧାରଣାସ୍ଥଳରେ ଦଳର ଅନ୍ୟ ନେତାଙ୍କୁ ଦେଖିବାକୁ ମିଳି ନ ଥିଲା। ରାତି ୮ଟାରେ ଧାରଣାରୁ ଉଠିବା ପରେ ମମତା ବରସାତ ଓ ବିଧାନନଗରରେ ଟିଏମ୍ସିର ୨ଟି ନିର୍ବାଚନୀ ସଭାକୁ ସମ୍ବୋଧିତ କରିଛନ୍ତି।
