ପାରଳାଖେମୁଣ୍ଡି,୨ା୯(ଗିରିଧାରୀ ପରିଛା): ସୁନା ଅଳଙ୍କାର ବନ୍ଧକ ରଖି ୫ ଲକ୍ଷ ଟଙ୍କା ଋଣ ନେବା ପରେ, ସୁଧ ଓ ମୂଳଧନ ଟଙ୍କା ଫେରସ୍ତ କରିବାରୁ ଅଳଙ୍କାର ଫେରାଇବାକୁ ମନା କରିବା ସହ ବନ୍ଧକ ରଖାଯାଇ ନଥିବା କହି ପ୍ରତାରଣା କରାଯାଇଥିବା ଅଭିଯୋଗ ହୋଇଛି। ଏ ନେଇ ପାରଳାଖେମୁଣ୍ଡି ମାର୍କେଟ ସାହିର ୭୧ ବର୍ଷୀୟ ବୃଦ୍ଧ କିଲାରୀ ଲକ୍ଷ୍ମୀନାରାୟଣା ପାରଳାଖେମୁଣ୍ଡି ଆଦର୍ଶ ଥାନାରେ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ୨୦୨୫ ଅକ୍ଟୋବର ୬ ତାରିଖରେ ଲକ୍ଷ୍ମୀନାରାୟଣା ନିଜର ୭୭ ଗ୍ରାମ ସୁନା ଅଳଙ୍କାର ବାରାଟାମ୍ ଯୋଗାରାଓ ଓ ବାରାଟାମ୍ ରାମମୂର୍ତ୍ତିଙ୍କ ନିକଟରେ ବନ୍ଧକ ରଖିଥିଲେ। ଏହା ବାବଦକୁ ସେ ନଗଦ ୪ ଲକ୍ଷ ୫୮ ହଜାର ଟଙ୍କା ଏବଂ ଫୋନ୍ପେ ମାଧ୍ୟମରେ ୪୨ ହଜାର ଟଙ୍କା, ମୋଟ ୫ ଲକ୍ଷ ଟଙ୍କା ଆଣିଥିଲେ। ଏହି ମୋଟ ଟଙ୍କା ଉପରେ ସେ ନିୟମିତ ମାସିକ ସୁଧ ପ୍ରଦାନ କରିବାକୁ ଚୁକ୍ତି ହୋଇଥିଲା। ସେହିଦିନଠାରୁ ସେ ପ୍ରତିମାସରେ ଫୋନ୍ପେ ମାଧ୍ୟମରେ ସୁଧ ଟଙ୍କା ପୈଠ କରିଆସୁଥିଲେ, ଯାହାର ସମସ୍ତ ପ୍ରମାଣ ତାଙ୍କ ପାଖରେ ରହିଛି।
ତେବେ ଗତ ଜୁଲାଇ ୩୦ ତାରିଖରେ ଲକ୍ଷ୍ମୀନାରାୟଣା ସମ୍ପୂର୍ଣ୍ଣ ମୂଳଧନ ଟଙ୍କା ଫେରସ୍ତ କରି ନିଜର ସୁନା ଅଳଙ୍କାର ମାଗିବାରୁ ଅଭିଯୁକ୍ତମାନେ ତାଙ୍କ ନାମରେ କୌଣସି ସୁନା ବନ୍ଧକ ନ ଥିବା କହି ଚଞ୍ଚକତା କରିଥିଲେ। ଏହାକୁ ନେଇ ସେ ପ୍ରତିବାଦ କରିବାରୁ ତାଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ମାରପିଟ୍ କରିବାକୁ ଉଦ୍ୟମ କରାଯାଇଥିଲା।
ଏହି ଅଭିଯୋଗକୁ ଆଧାର କରି ପାରଳାଖେମୁଣ୍ଡି ଆଦର୍ଶ ଥାନା ପୋଲିସ ମାମଲା ନଂ. ୩୬୦/୨୦୨୬ ରୁଜୁ କରି ତଦନ୍ତ ଜାରି ରଖିଛି। ମାମଲାର ତଦନ୍ତକାରୀ ଅଧିକାରୀ ଏସ୍ଆଇ ବଳରାମ ବେହେରାଙ୍କ ସୂଚନାନୁଯାୟୀ, ପୋଲିସ ଘଟଣାର ତଦନ୍ତ ଚଳାଇଛି ଏବଂ ତଦନ୍ତ ପରେ ହିଁ ପ୍ରକୃତ ତଥ୍ୟ ସାମ୍ନାକୁ ଆସିବ।
