ଏକାମ୍ର ଜମି ଜିଏ ବିଭାଗକୁ ଯିବା ପ୍ରସଙ୍ଗରେ ବିରୋଧୀ କ୍ଷୁବ୍ଧ
9:39 amNovember 4, 2020November 4, 2020 / 43

ଭୁବନେଶ୍ୱର, ୪।୧୧(ବ୍ୟୁରୋ) : ରାଜଧାନୀର ଶୋଭା ବର୍ଦ୍ଧନ ଏବଂ ଉଦ୍ୟାନ କୃଷିର ପ୍ରଗତି ପାଇଁ ୧୯୮୦ ଦଶକରେ କଂଗ୍ରେସ ସରକାର ୨୬ ଏକର ପରିମିତ ଏକାମ୍ର ପାର୍କ ପ୍ରତିଷ୍ଠା କରିଥିଲେ। ଏହାକୁ ବର୍ତ୍ତମାନ ହଡପ କରିବାକୁ ରାଜ୍ୟ ସରକାର ଯେଉଁ ଚକ୍ରାନ୍ତ କରୁଛନ୍ତି ତାହା ଦୁର୍ଭାଗ୍ୟଜନକ ବୋଲି ଜଟଣୀ ବିଧାୟକ ସୁରେଶ କୁମାର ରାଉତରାୟ କହିଛନ୍ତି। କଂଗ୍ରେସ ଭବନଠାରେ ମଙ୍ଗଳବାର ଆୟୋଜିତ ଖବରଦାତା ସମ୍ମିଳନୀରେ ସୁର କହିଛନ୍ତି ଯେ, ଏହି ପାର୍କରେ ବିଭିନ୍ନ ପ୍ରକାର ଉଦ୍ୟାନ ଭିତ୍ତିକ ବୃକ୍ଷଲତା ରୋପଣ କରାଯାଇ ଚାଷୀଙ୍କୁ ସୁଲଭ ମୂଲ୍ୟରେ ଉନ୍ନତମାନର ଫୁଲ, ଫଳ ଚାରା ଯୋଗାଇ ଦେବାର ବ୍ୟବସ୍ଥା ଥିଲା। ଏପରିକି ୩୦ ହଜାରରୁ ଉର୍ଦ୍ଧ୍ୱ ବିଭିନ୍ନ ପ୍ରକାରର ମୂଲ୍ୟବାନ ଫୁଲ ଗଛ ଲଗାଯାଇଥିଲା। ଏହାଛଡା ଉନ୍ନତମାନର ପଲ୍ଲୀ ହାଉସ ଏବଂ ଉଦ୍ୟାନ ନିର୍ଦ୍ଦେଶାଳୟ ପରିସରରେ ଉଦ୍ୟାନ ଫ୍ରେସ୍‌ ପ୍ରଭୃତିରେ କୋଟି କୋଟି ଟଙ୍କା ବ୍ୟୟ କରାଯାଇ ଏହାର ଭିତ୍ତିିଭୂମି ସୁଦୃଢ଼ କରାଯାଇଥିଲା। ଏହା ଏକ ସଫଳ କାର୍ଯ୍ୟକ୍ରମ ହୋଇଥିଲା। ମାତ୍ର ରାଜ୍ୟ ସରକାର ୨୦ ବର୍ଷ ହେଲା ଏହାର ରକ୍ଷଣାବେକ୍ଷଣ କଲେନାହିଁ। ଏବେ ରାଜ୍ୟ ସରକାର ଗତ ୧୩ ତାରିଖ ଦିନ ଏଠାରେ ଥିବା ୨୬ ଏକରରୁ ୨୦ ଏକର ୯୦ ଡେସିମିଲ ଜାଗାକୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗକୁ ହସ୍ତାନ୍ତର କରିବା ପାଇଁ ସହକାରୀ ଉଦ୍ୟାନ ନିର୍ଦ୍ଦେଶକଙ୍କୁ ଚିଠି କରିଛନ୍ତି। ବର୍ତ୍ତମାନ ଏହି ସମଗ୍ର ଜମିକୁ ରାଜ୍ୟ ସରକାର ବ୍ୟବସାୟିକ ପ୍ରତିଷ୍ଠାନ ହାତରେ ଶାଗମୁଗ ମୂଲ୍ୟରେ ଟେକି ଦେବା ଲାଗି ଚକ୍ରାନ୍ତ କରିଛନ୍ତି। ଏହାସହ ଡମଣା ଏବଂ ଜଟଣୀ ନିର୍ବାଚନମଣ୍ଡଳୀର ତମାଣ୍ଡୋ, ଅନ୍ଧାରୁଆ, ପାତ୍ରପଡା, ତରାବୋଇ, ଗଙ୍ଗପଡା, ଜାମୁକୋଳି, ମେଣ୍ଢାଶାଳ, କୁମାରବସ୍ତ, ବେଲପଡା ଇତ୍ୟାଦି ଗ୍ରାମଗୁଡିକର ମଶାଣୀ, ଖେଳପଡିଆ, ମେଲଣପଡିଆ, ସ୍କୁଲ ପଡିଆକୁ ରାଜ୍ୟ ସରକାରଙ୍କ ବଡ ଅଫିସରମାନେ ସଲାସୁତୁରା କରି ବାହାର ସଂସ୍ଥାଗୁଡିକୁ ଶାଗମୁଗ ମୂଲ୍ୟରେ ବିକ୍ରି କରିବାକୁ ମଧ୍ୟ ଉଦ୍ୟମ ଆରମ୍ଭ କରଥିବା ସେ ଅଭିଯୋଗ କରିଛନ୍ତି। ଏକାମ୍ରକାନନକୁ ବିକ୍ରି କରିବା ପାଇଁ ଯେଉଁ ଚକ୍ରାନ୍ତ ଚାଲିଛି ତାକୁ ସଫଳ କରିବାକୁ ଦିଆଯିବ ନାହିଁ। ତୁରନ୍ତ ସରକାର ତାଙ୍କ ଚିଠିକୁ ବାତିଲ କରି ଉଦ୍ୟାନ କୃଷି ବିଭାଗ ହାତରେ ସେହି ଜମି ରଖନ୍ତୁ ବୋଲି ସୁର ଚେତାବନୀ ଦେଇଛନ୍ତି।
ଅନ୍ୟପଟେ ଏହି ପ୍ରସଙ୍ଗକୁ ନେଇ ଭାଜପା ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି, ଏମିତି କ’ଣ ଆବଶ୍ୟକତା ପଡିଲା ସରକାର ଏଭଳି ନିଷ୍ପତ୍ତି ନେଲେ। ୨୦ ଏକର ଜମିରେ ବହୁ ଓଷଧିୟ ବୃକ୍ଷ ସୃଷ୍ଟି କରାଯାଇଛି। ଏହାକୁ ନଷ୍ଟ କରି ସରକାର ସେଠାରେ କଂକ୍ରିଟ ଜଙ୍ଗଲ କରିବାକୁ ବସିଛନ୍ତି। ଏହି ଉତ୍ତର ସରକାରଙ୍କୁ ଦେବାର ଆବଶ୍ୟକତା ଅଛି ବୋଲି ପୃଥ୍ବିରାଜ କହିଛନ୍ତି। ବିଜେଡି ବିଧାୟକ ଅମର ଶତପଥୀ କହିଛନ୍ତି, ସରକାର ଯେଉଁ ନିଷ୍ପତ୍ତି ନିଅନ୍ତି ତାର ବିକଳ୍ପ ତିଆରି କରନ୍ତି। ସେମାନେ ନଈ ନ ଦେଖି ଲଙ୍ଗଳା ହୋଇପଡୁଛନ୍ତି। ଆଗାମୀ ଦିନରେ ନିଶ୍ଚିତଭାବେ ସେନେଇ ସରକାର ସ୍ପଷ୍ଟ କରିବେ ବୋଲି ଶତପଥୀ କହିଛନ୍ତି।