ପ୍ୟାରିସ୍ ,୨୨।୧୧: ହିଜାବ ବିରୋଧୀ ଆନ୍ଦୋଳନକୁ ସମର୍ଥନ ଜଣାଇଥିବା ଇରାନର ଦୁଇଜଣ ଖ୍ୟାତନାମା ଅଭିନେତ୍ରୀଙ୍କୁ ଗିରଫ କରାଯାଇଛି। ସେମାନେ ସର୍ବସାଧାରଣ ସ୍ଥାନରେ ହିଜାବ କାଢ଼ି ଶାସନକୁ ଅବମାନନା କରିଥିବା ସରକାରୀ ଗଣମାଧ୍ୟମରେ କୁହାଯାଇଛି। ସୋସିଆଲ ମିଡିଆରେ ଉତ୍ତେଜନା ସୃଷ୍ଟିକାରୀ ପୋଷ୍ଟ କରିବା ଓ ଅନ୍ୟାନ୍ୟ ପ୍ରଚାରଧର୍ମୀ କାର୍ଯ୍ୟ ଅଭିଯୋଗର ତଦନ୍ତର ସମ୍ମୁଖୀନ ହେବା ଲାଗି ଅଭିନେତ୍ରୀ ହେଙ୍ଗାମେହ ଗଜିଆନି ଏବଂ କାଟାୟୁନ ରିଆହିଙ୍କୁ ସମନ କରାଯାଇଥିଲା।
ଇରାନରେ ଦୁଇମାସରୁ ଊର୍ଦ୍ଧ୍ୱ ହିଜାବ ବିରୋଧୀ ଆନ୍ଦୋଳନ ଜାରି ରହିଛି। ବିରୋଧୀଙ୍କ ସ୍ବର ଚାପିଦେବା ସହ କଠୋର ହସ୍ତରେ ଆନ୍ଦୋନ ଦମନ କରିବାକୁ ସରକାର ଉଦ୍ୟମ କରୁଛନ୍ତି। ହିଜାବ ଆଇନ ଅବମାନନା ଅଭିଯୋଗରେ ତେହରାନ୍ ପୋଲିସ ଗିରଫ କରିଥିବା ୨୨ ବର୍ଷୀୟା କୁର୍ଦ୍ଦିଶ ମହିଳା ମହସା ଅମିନିଙ୍କ ହାଜତ ମୃତ୍ୟୁ ପରେ ଆନ୍ଦୋଳନ ଜୋର୍ଦାର ହୋଇଥିଲା। ଇସ୍ଲାମିକ୍ ରିପବ୍ଲିକ୍ କର୍ତ୍ତୃପକ୍ଷ ଏହି ଆନ୍ଦୋଳନକୁ ଦଙ୍ଗା କହିବା ସହ ବିକ୍ଷୋଭକାରୀଙ୍କ ବିରୋଧରେ ଦମନ ଲୀଳା ଚଳାଇଥିବାରୁ ଏଥିରେ ୧୩୩ରୁ ଊର୍ଦ୍ଧ୍ୱ ପ୍ରାଣ ହରାଇଲେଣି। ଦଙ୍ଗା ଅଭିଯୋଗରେ ଇରାନ ସରକାର ୧୫,୦୦୦ରୁ ଅଧିକ ବିକ୍ଷୋଭକାରୀଙ୍କୁ ଅଟକ ରଖିଛନ୍ତି। ସେମାନଙ୍କୁ ସରକାର ମୃତ୍ୟୁଦଣ୍ଡ ଦେଇପାରନ୍ତି ବୋଲି ବିଭିନ୍ନ ସୋସିଆଲ ମିଡିଆରେ ଖବର ପ୍ରକାଶ ପାଇଛି।
ଉପରେ ସରକାରଙ୍କ ଦମନଲୀଳାକୁ ଅଭିନେତ୍ରୀ ଗଜିଆନି ସମାଲୋଚନା କରିଆସୁଥିଲେ। ବିରୋଧୀଙ୍କ ସହ ହାତ ମିଳାଇ ସେ ଦଙ୍ଗାକୁ ସମର୍ଥନ କରୁଥିବା ଅଭିଯୋଗରେ ଗିରଫ କରାଯାଇଛି। ଏହି ୫୨ ବର୍ଷୀୟା ଅଭିନେତ୍ରୀଙ୍କୁ ସମନ କରାଯିବା ପରେ ସେ ହିଜାବ କାଢ଼ିଦେଇ ଏକ ଭିଡିଓ ଇନ୍ଷ୍ଟାଗ୍ରାମରେ ଶେୟାର କରିଥିଲେ ଏବଂ ଏହା ହୁଏତ ଶେଷ ପୋଷ୍ଟ ବୋଲି ଲେଖିଥିଲେ। ଏବେଠୁ ତାଙ୍କ ପ୍ରତି ଯାହା ଘଟୁ ପଛେ, ସେ ଶେଷନିଃଶ୍ୱାସ ପର୍ଯ୍ୟନ୍ତ ଇରାନବାସୀଙ୍କ ସହ ରହିବେ ବୋଲି କହିଥିଲେ। ଗତ ସପ୍ତାହରେ ସେ କରିଥିବା ଏକ ପୋଷ୍ଟରେ ଇରାନ ସରକାରଙ୍କୁ ଶିଶୁ ହତ୍ୟାକାରୀ କହିଥିଲେ। ଏହି ସରକାର ୫୦ରୁ ଊର୍ଦ୍ଧ୍ୱ ଶିଶୁଙ୍କୁ ମାରିଲାଣି ବୋଲି ସେ ଅଭିଯୋଗ କରିଥିଲେ।
ଅନୁରୂପ ତଦନ୍ତରେ ଅଭିନେତ୍ରୀ ରିଆହିଙ୍କୁ ଗିରଫ କରାଯାଇଛି। ଏହି ଅଭିନେତ୍ରୀ ଅନେକ ପୁରସ୍କାର ବିଜୟୀ ଚଳଚ୍ଚିତ୍ରରେ କାମ କରିବା ସହ ଦାତବ୍ୟ କାର୍ଯ୍ୟରେ ନିଜକୁ ନିୟୋଜିତ କରିଥିଲେ। ଗତ ସେପ୍ଟେମ୍ବରରେ ସେ ଲଣ୍ଡନରେ ଥିବା ଇରାନ ଇଣ୍ଟରନ୍ୟାଶନାଲ ଟିଭିକୁ ଏକ ସାକ୍ଷାତ୍କାର ଦେବାବେଳେ ହିଜାବ ପିନ୍ଧି ନ ଥିଲେ। ମହସା ଅମିନି ମୃତ୍ୟୁ ପରେ ଇରାନରେ ଲାଗିରହିଥିବା ହିଜାବ ବିରୋଧୀ ଆନ୍ଦୋଳନକୁ ରିଆହି ସମର୍ଥନ କରିଆସୁଥିଲେ। ସୋସିଆଲ ମିଡିଆରେ ଉତ୍ତେଜନାପୂର୍ଣ୍ଣ ବିଷୟ ପୋଷ୍ଟ କରିବା ଅଭିଯୋଗର ତଦନ୍ତ ଲାଗି ଗଜିଆନିଙ୍କ ସମେତ ୮ ଜଣଙ୍କୁ ସମନ କରାଯାଇଥିବା ବିଚାର ବିଭାଗର ବିଜାନ ଅନ୍ଲାଇନ୍ ନ୍ୟୁଜ୍ ଓ୍ବେବ୍ସାଇଟ୍ରେ କୁହାଯାଇଛି। ଅନ୍ୟମାନଙ୍କ ମଧ୍ୟରେ ତେହରାନ ଫୁଟ୍ବଲ ଟିମ୍ ପର୍ସେପୋଲିସ୍ ଏଫ୍ସିର କୋଚ ୟାହୟା ଗୋଲମହମ୍ମଦି ଅଛନ୍ତି। ହିଜାବ ବିରୋଧୀ ଆନ୍ଦୋଳନ ପୂର୍ବରୁ ମଧ୍ୟ ଇରାନ ସିନେମା କଳାକାର ଚାପରେ ଥିଲେ ପୁରସ୍କାର ବିଜୟୀ ନିର୍ଦ୍ଦେଶକ ମହମ୍ମଦ ରାସୌଲଫ୍ ଏବଂ ଜାଫର ପନାହି ପୂର୍ବରୁ ଗିରଫ ହୋଇ ଜେଲରେ ଅଛନ୍ତି।
