ଏଡ଼ୱାର୍ଡ଼ସ ସିଣ୍ଡ୍ରୋମ ଏକ ଜିନ୍ ଗତ ସମସ୍ୟା। କ୍ରୋମୋଜୋମ ୧୮ର ତୃତୀୟ କପିର ଆଂଶିକ ବା ସମ୍ପୂର୍ଣ୍ଣ ଉପସ୍ଥିତି ଯୋଗୁ ଏହି ସମସ୍ୟା ସୃଷ୍ଟି ହୋଇଥାଏ। ଏହାଦ୍ୱାରା ଶରୀରର ବହୁ ଅଂଶ ପ୍ରଭାବିତ ହୁଏ । ଏହାର ପ୍ରଭାବରେ ଜନ୍ମ ସମୟରେ ଶିଶୁର ଆକାର ଛୋଟ ହୁଏ ଓ ଜନ୍ମଠାରୁ ହାର୍ଟରେ ସମସ୍ୟା ରୁହେ। ନବଜାତ ଶିଶୁର ଛୋଟ ମୁଣ୍ଡ ଓ ଛୋଟ ନିମ୍ନ ହନୁ ହାଡ଼ ଥାଏ। ସେହିପରି ଆଙ୍ଗୁଳି ଗୁଡ଼ିକ ତଳ ଉପର ଛନ୍ଦି ହୋଇ ମୁଠା ଆକାରରେ ଥିବାର ଦେଖିବାକୁ ମିଳେ। ଏହା ଯୋଗୁ ଶିଶୁ ବୌଦ୍ଧିକସ୍ତରରେ ପଛୁଆ ରହିଥାଏ। ପ୍ରଜନନ ପରବର୍ତ୍ତୀ ସମୟରେ ଜୀବକୋଷର ତିଆରି ବେଳେ ଭୃଣର ବିକାଶରେ ସମସ୍ୟା ଯୋଗୁ ଏଭଳି ସ୍ଥିତି ଉତ୍ପନ୍ନ ହୁଏ । ବେଳେ ଏହା ବଂଶାନୁକ୍ରମିକ ମଧ୍ୟ ହୋଇଥାଏ ବୋଲି ଚିକିତ୍ସକ କହିଥାନ୍ତି। ଗର୍ଭବତୀଙ୍କର ଅଲଟ୍ରାସାଉଣ୍ଡ କରାଗଲେ ଗର୍ଭସ୍ଥ ଶିଶୁଠାରେ ଏଭଳି ସମସ୍ୟା ଥିବା ଅନୁମାନ କରାଯାଇପାରେ। ତେବେ ଆମ୍ନିଓସେଣ୍ଟେସିସ ଦ୍ୱାରା ଏହାର ଚିହ୍ନଟ ହୋଇପାରିଥାଏ। ଜୀବନ୍ତ ଜନ୍ମ ହୋଇଥିବା ପ୍ରତି ୫୦୦୦ ଶିଶୁଙ୍କ ମଧ୍ୟରୁ ଜଣକଠାରେ ଏଭଳି ସମସ୍ୟା ଦେଖାଯିବାର ଆଶଙ୍କା ରହିଥାଏ। ଏହି ସମସ୍ୟା ସହିତ ଜନ୍ମ ହୋଇଥିବା ଅଧିକାଂଶ ଶିଶୁକନ୍ୟା ହିଁ ରହିଥାନ୍ତି। ଅଧିକାଂଶ ଶିଶୁଙ୍କର ଜନ୍ମ ପୁର୍ବରୁ ମା’ ପେଟରେ ମୃତ୍ୟୁ ଘଟିଥାଏ। ଜୀବିତ ଜନ୍ମ ହୋଇଥିବା ଶିଶୁଙ୍କ ମଧ୍ୟରୁ ଏକ ବର୍ଷ ବୟସ ପରେ ବଞ୍ଚିବା ହାର ୭.୫ ପ୍ରତିଶତ ରହିଥାଏ ବୋଲି ଚିକିତ୍ସକ କହିଥାନ୍ତି। ଜନ ହିଲଟନ ଏଡ଼ୱାର୍ଡ଼ସ ନାମାନୁସାରେ ଏହି ସମସ୍ୟାର ନାମକରଣ ହୋଇଛି। ୧୯୬୦ରେ ସେ ଏହି ସମସ୍ୟା ସମ୍ପର୍କରେ ଜାଣିପାରିଥିଲେ।
