ନବରଙ୍ଗପୁର,୧୩ା୩(ବି.ପ୍ର.)ସବୁ କ୍ଷେତ୍ରରେ ପଛୁଆ ଜିଲା ଭାବେ ପରିଗଣତି ନବରଙ୍ଗପୁରରେ ଶିକ୍ଷା ବ୍ୟବସ୍ଥା ଭୁଶୁଡ଼ିବାରେ ଲାଗିଛି। ଜିଲାରେ ଚଳିତବର୍ଷ ମାଟ୍ରିକ ପରୀକ୍ଷା ଦେବାକୁ ଫର୍ମ ପୂରଣ କରି ମଧ୍ୟ ମୋଟ ୯୭୩ଜଣ ପରୀକ୍ଷାର୍ଥୀ ପ୍ରଥମ ଦିନର ଓଡ଼ିଆ ପରୀକ୍ଷା ଦେଇନାହାନ୍ତି। ଶିକ୍ଷା ବିଭାଗୀୟ ଅଧିକାରୀଙ୍କ ନିର୍ଦ୍ଦେଶକୁ କେହି ମାନିବାକୁ ନାରାଜ। ତାଙ୍କ ପରିଚାଳନାଗତ ତ୍ରୁଟି ଯୋଗୁ ଜିଲାରେ ଶିକ୍ଷାର ମୂଳଦୁଆ ଭାଙ୍ଗି ପଡୁଛି । ବିଦ୍ୟାଳୟଗୁଡିକରେ ଛାତ୍ରୀଛାତ୍ର ନିଜେ ଫର୍ମ ପୂରଣ କରିଥିଲେ ନା କେବଳ ସେମାନଙ୍କ ଲାଗି ଆସୁଥିବା ଷ୍ଟାଇପେଣ୍ଡ, ପୋଷାକ ପତ୍ର ପାଇଁ ସଂଖ୍ୟା ବଢ଼ାଯାଇଛି କି ଏହା ରାଜ୍ୟ ସରକାର ଏବଂ ଜିଲା ଶିକ୍ଷା ବିଭାଗର ନୂଆ ଷଡ଼ଯନ୍ତ୍ର ବୋଲି ଏଆଇସିସି ସଭ୍ୟା ମନସା ତ୍ରିପାଠୀ ପ୍ରଶ୍ନ ଉଠାଇଛନ୍ତି। ସ୍ଥାନୀୟ କଂଗ୍ରେସ ଭବନରେ ଆୟୋଜିତ ଖବରଦାତା ସମ୍ମିଳନୀ ସମ୍ମିଳନୀରେ ଏଆଇସିସି ସଭ୍ୟା ତଥା ଛାତ୍ର କଂଗ୍ରେସ ସଦସ୍ୟା ମନସା ଅଧ୍ୟକ୍ଷତା କରି ରାଜ୍ୟ ସରକାରଙ୍କ ଶିକ୍ଷା ବ୍ୟବସ୍ଥା ଉପରେ ଆଙ୍ଗୁଳି ଉଠାଇଥିଲେ। କେବଳ ୫ଟି ନାଁରେ ଖାଲି କୋଠା ବାଡ଼ି ତିଆରି ଚାଲିଛି । ବାସ୍ତବରେ ମାଟ୍ରିକ ଛାତ୍ର ଯାହାର ବୟସ ମାତ୍ର ୧୫ ବର୍ଷ ସେ ଆଜି ଦାଦନ ଖଟିବାକୁ ବାହାର ରାଜ୍ୟକୁ ଯାଉଛି। ଏହାକୁ ନେଇ ନବରଙ୍ଗପୁର ଜିଲା ରାଜ୍ୟସ୍ତରରେ ଲଜ୍ଜିତ l ରାଜ୍ୟ ସରକାର ତୁରନ୍ତ ଏଥିରେ ହସ୍ତକ୍ଷେପ କରି ପ୍ରକୃତ ସତ୍ୟାସତ୍ୟ ବାହାର କରନ୍ତୁ l ସେପଟେ ଯାତାୟାତ ଖର୍ଚ୍ଚ ଦେଇ ନିଜ ବିଦ୍ୟାଳୟ ପରିବର୍ତ୍ତେ ଅନ୍ୟ ବିଦ୍ୟାଳୟ କେନ୍ଦ୍ରକୁ ଯାଇ ଗରିବ ପିଲା ପରୀକ୍ଷା ଦେବାକୁ ଅସମର୍ଥ ହୋଇପଡୁଛନ୍ତି। ଜିଲା ଶିକ୍ଷା ଅଧିକାରୀଙ୍କ ପ୍ରତି ଶିକ୍ଷକଙ୍କ ଭୟ ନାହିଁ। ପୂର୍ବରୁ ସିଆଇ ଏବଂ ଡିଆଇ ରହୁଥିଲେ। ଶିକ୍ଷୟିତ୍ରୀ ଶିକ୍ଷକ ମାନଙ୍କ ଭୟ ରହୁଥିଲା । ପିଲାଙ୍କ ପାଖରେ ପାଠ୍ୟ ପୁସ୍ତକ ନାହିଁ । ଅର୍ଥ ଅଭାବ ଯୋଗୁ ମାଟ୍ରିକ ପାସ ପରେ ପିଲା ଉଚ୍ଚ ଶିକ୍ଷା ପାଇଁ ଇଚ୍ଛା ପ୍ରକାଶ କରୁନାହାନ୍ତି। କଲେଜରେ ମାତ୍ରାଧିକ ଡୋନେସନ । ଗାଁରୁ ସହରକୁ ଆସି ପିଲା ଘରଭଡା ଦେଇ ପାଠପଢ଼ିବା ସମ୍ଭବ ହେଉନି। ବିଦ୍ୟାଳୟରେ ଶିକ୍ଷକ ଲମ୍ବା ଛୁଟିରେ ରହିଲେ ଦରମା କରାଯାଉଛି। ବିନାଛୁଟିରେ ଶିକ୍ଷୟିତ୍ରୀ ଶିକ୍ଷକ ଘରେ ରହିଲେ ମଧ୍ୟ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ । ଏ ସମସ୍ତ ଘଟଣାକୁ ଦେଖିଲେ ଜିଲାରେ ଶିକ୍ଷା ବ୍ୟବସ୍ଥା କେତେ ନିମ୍ନଗାମୀ ହୋଇପଡିଛି ତାହା ଜଣାପଡ଼ୁଛି ବୋଲି ମନସା କହିଛନ୍ତି। ଖବରଦାତା ସମ୍ମିଳନୀରେ ଛାତ୍ର କଂଗ୍ରେସ ସଭାପତି ପବିତ୍ର ଚନ୍ଦ୍ର, ପିସିସି ସଭ୍ୟା ହରାବତୀ ଗଣ୍ଡ, ଦିବାକର ପୂଜାରୀ ପ୍ରମୁଖ ଉପସ୍ଥିତ ଥିଲେ।
