ଭୁବନେଶ୍ୱର, ୧୪।୭(କ୍ରୀଡ଼ା ପ୍ରତିନିଧି)- ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଲିମ୍ପିକ୍ସରେ ଭାଗ ନେବାକୁ ଯାଉଥିବା ଭାରତୀୟ ଆଥ୍ଲେଟଙ୍କ ସହ ମଙ୍ଗଳବାର ଭର୍ଚୁଆଲ୍ ମୋଡ୍ରେ ଭାବର ଆଦାନପ୍ରଦାନ କରିଛନ୍ତି। ଏହି ଅବସରରେ ସେ ଭାରତୀୟ ସ୍ପ୍ରିଣ୍ଟ କୁଇନ୍ ଓଡ଼ିଶାର ଦୂତୀ ଚାନ୍ଦଙ୍କ ସହିତ ମଧ୍ୟ କଥା ହୋଇଛନ୍ତି। ଦୂତୀର ଅର୍ଥ ହେଉଛି ଚମକ, ଏହାର ଅନ୍ୟ ଏକ ଅର୍ଥ ଆଭା। ଆପଣ ଖେଳ ଜରିଆରେ ଚମକ ଦେଖାଇବାରେ ଲାଗିଛନ୍ତି। ଏବେ ଅଲିମ୍ପିକ୍ସରେ ପ୍ରଭାବୀ ପ୍ରଦର୍ଶନ ପାଇଁ ପ୍ରସ୍ତୁତ ରୁହନ୍ତୁ। ଏତେବଡ଼ ପ୍ରତିଯୋଗିତାକୁ ଆପଣ କିପରି ଦେଖୁଛନ୍ତି ବୋଲି ଦୂତୀଙ୍କୁ ପ୍ରଶ୍ନ କରିଥିଲେ ପ୍ରଧାନମନ୍ତ୍ରୀ। ଉତ୍ତରରେ ଦୂତୀ କହିଥିଲେ ଯେ, ମୁଁ ଏକ ଗରିବ ପରିବାରରୁ ଆସିଛି। କ୍ୟାରିୟର ଆରମ୍ଭରୁ ମୁଁ ସଂଘର୍ଷ କରିଛି। ଭଲ ଖେଳିଲେ ମୁଁ ଦେଶକୁ ଗର୍ବିତ କରିପାରିବି ଏବଂ ମୋତେ ସରକାରୀ ଚାକିରି ମିଳିବ। ଫଳରେ ମୁଁ ପରିବାରର ଦାୟିତ୍ୱ ନେଇପାରିବି। ଏହି ଲକ୍ଷ୍ୟରେ ମୁଁ ଆଗକୁ ବଢ଼ୁଛି। ଖେଳ ପାଇଁ ଆଜି ଏହି ସ୍ଥାନରେ ପହଞ୍ଚତ୍ ପାରିଛି ଏବଂ ପରିବାର ପାଇଁ କିଛି କରିପାରିଛି। ଏଥିପାଇଁ ମୁଁ ଆପଣଙ୍କୁ, ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କୁ ଧନ୍ୟବାଦ ଦେଉଛି। ସମସ୍ତଙ୍କ ସମର୍ଥନ ଯୋଗୁ ମୁଁ ଆଗକୁ ବଢ଼ିବାରେ ସକ୍ଷମ ହୋଇପାରିଛି। ମୁଁ ଜୀବନରେ ଅନେକ ସମୟରେ ବିବାଦୀୟ ପରିସ୍ଥିତିର ସାମ୍ନା କରିଛି। ମାତ୍ର ସାହସର ସହିତ ସବୁ ଚ୍ୟାଲେଞ୍ଜର ସମ୍ମୁଖୀନ ହୋଇଛି। ମୁଁ ଏବେ ଦ୍ୱିତୀୟ ଥର ପାଇଁ ଅଲିମ୍ପିକ୍ସରେ ଭାଗନେବାକୁ ଯାଉଛି। ପୂର୍ବରୁ ରିଓ ଅଲିମ୍ପିକ୍ସରେ ଅଂଶଗ୍ରହଣ କରିଥିଲି। ଟୋକିଓରେ ଶ୍ରେଷ୍ଠ ପ୍ରଦର୍ଶନ କରି ମୁଁ ଦେଶକୁ ଗର୍ବିତ କରିବାକୁ ଚେଷ୍ଟା କରିବି ବୋଲି ଦୂତୀ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, ଆପଣଙ୍କ ବର୍ଷ ତମାମର ଫଳ କିଛି ସେକେଣ୍ଡରେ ଫଇସଲା ହୋଇଥାଏ। ହାରଜିତ୍ରେ କିଛି ସେକେଣ୍ଡର ଫରକ ରହିଥାଏ। ଏହାକୁ ସମ୍ମୁଖୀନ ହେବା କେତେ କଷ୍ଟକର ହୋଇଥାଏ। ଜବାବରେ ଦୂତୀ କହିଥିଲେ ଯେ, ମୁଁ ୧୦୦ ଓ ୨୦୦ ମିଟରରେ ପ୍ରତିଦ୍ୱନ୍ଦ୍ୱିତା କରୁଥିବାରୁ ଅନେକ ଚ୍ୟାଲେଞ୍ଜର ସମ୍ମୁଖୀନ ହୋଇଥାଏ। ରେସ୍ ଷ୍ଟାର୍ଟରେ ତ୍ରୁଟି ରହିଲେ ଅଯୋଗ୍ୟ ହେବାକୁ ପଡ଼ିଥାଏ। ତେଣୁ ସବୁକୁ ଦୃଷ୍ଟିରେ ରଖି ଟ୍ରେନିଂ ସମୟରେ ମାନସିକ ସ୍ତରରେ ନିଜକୁ ପ୍ରସ୍ତୁତ କରିବାକୁ ପଡ଼ିଥାଏ। ମୁଁ ମୋ ବ୍ୟକ୍ତିଗତ ଜୀବନରେ ଯେପରି ସାହସର ସହିତ ଲଢ଼େଇ କରିଛି ସେପରି ରେସ୍ ସମୟରେ ମଧ୍ୟ ସାହସ ଦେଖାଇଛି। ଫଳରେ ଅନେକ ସମୟରେ ସଫଳ ହୋଇଛି ଏବଂ ଦେଶ ପାଇଁ ପଦକ ଜିତିଛି। ପ୍ରଧାନମନ୍ତ୍ରୀ କହିଥିଲେ ଯେ, ଦୂତୀ ତୁମେ ଦେଶ ପାଇଁ ଅନେକ ରେକର୍ଡ କରିଛ। ଏଥର ଅଲିମ୍ପିକ୍ ପୋଡିୟମ ମଣ୍ଡନ କରିବ ବୋଲି ଦେଶ ଆଶା ରଖିଛି। ଆପଣ ନିର୍ଭୀକ ଭାବେ ଖେଳରେ ଭାଗ ନିଅନ୍ତୁ। ପୂରା ଭାରତ ଏହାର ଅଲିମ୍ପିକ୍ ଖେଳାଳିଙ୍କ ସହିତ ରହିଛି। ମୁଁ ଆପଣଙ୍କୁ ଶୁଭକାମନା ଦେବା ସହିତ ଆପଣଙ୍କ ମାତାପିତାଙ୍କୁ ପ୍ରଣାମ ଜଣାଉଛି ବୋଲି ପ୍ରଧାନମନ୍ତ୍ରୀ ପ୍ରକାଶ କରିଥିଲେ। ପ୍ରକାଶଯୋଗ୍ୟ ଯେ, ଟୋକିଓ ଅଲିମ୍ପିକ୍ସରେ ଓଡ଼ିଶାରୁ ଦୂତୀଙ୍କ ସମେତ ମହିଳା ହକି ଖେଳାଳି ଦୀପ୍ ଗ୍ରେସ୍ ଏକ୍କା, ପୁରୁଷ ହକି ତାରକା ବୀରେନ୍ଦ୍ର ଲାକ୍ରା, ଅମିତ ରୋହିଦାସ ପ୍ରତିନିଧିତ୍ୱ କରିବାକୁ ଯାଉଛନ୍ତି। ସେହିପରି ପାରାଲିମ୍ପିକ୍ସରେ ବ୍ୟାଡ୍ମିଣ୍ଟନ ତାରକା ପ୍ରମୋଦ ଭଗତ ଖେଳିବେ।
