ବାରିପଦା ଅଫିସ,୧୨।୧: ମୟୂରଭଞ୍ଜ ଜିଲାରେ କାର୍ଯ୍ୟରତ ପୋଲିସ କନଷ୍ଟେବଳ ନୀହାର ରଞ୍ଜନ ଦଣ୍ଡପାଟଙ୍କ ଘରେ ମଙ୍ଗଳବାର ସକାଳେ ଭିଜିଲାନ୍ସ ଚଢ଼ାଉ କରିଛି। ତେବେ ତଦନ୍ତ ଚାଲିଥିବା ସମୟରେ ସେ ଛାତରୁ ଡେଇଁ ଫେରାର ହୋଇଯାଇଥିବା ଭିଜିଲାନ୍ସ ପକ୍ଷରୁ କୁହାଯାଇଛି। ବାରିପଦା ଟାଉନ ପୋଲିସ ସହରର ସମସ୍ତ ରାସ୍ତାରେ ତନଖି କରୁଥିବା ବେଳେ ରିପୋର୍ଟ ଲେଖା ହେବା ସୁଦ୍ଧା ତାଙ୍କୁ ଠାବ କରାଯାଇପାରି ନାହିଁ। କଟକ ଭିଜିଲାନ୍ସ ସେଲ୍ର ୬ଟି ଟିମ୍ରେ ଥିବା ୩୫ଜଣ ଅଫିସର ଏକକାଳୀନ ୭ଟି ସ୍ଥାନରେ ଚଢ଼ାଉ କରିଛନ୍ତି। ବାରିପଦା ସ୍ବତନ୍ତ୍ର ଭିଜିଲାନ୍ସ ଜଜ୍ଙ୍କ ନିର୍ଦ୍ଦେଶ କ୍ରମେ କନଷ୍ଟେବଳ ଦଣ୍ଡପାଟଙ୍କ ବଡ଼ସାହି ଥାନା ଅଧୀନ ବେଲପାଳ ଗ୍ରାମ ପୈତୃକ ଘର, ରାଉରକେଲା ଛେଣ୍ଡ କଲୋନୀ ସ୍ଥିତ ଶ୍ୱଶୁର ଘର, ବାରିପଦା ଭଞ୍ଜପୁର ସ୍ଥିତ ୟୁନିଟ-୧୮ରେ ଥିବା ୩ ମହଲା ବିଶିଷ୍ଟ କୋଠାଘର, ବାରିପଦା ପୋଲିସ ଲାଇନ୍ ସ୍ଥିତ ପି/୮୮ ନଂ.ରେ ସରକାରୀ କ୍ୱାର୍ଟର୍ସ, ବାରିପଦା ଅମ୍ବିକାସାହିରେ ଥିବା ସାଇବର ଆଉଟଲୁକ୍ ଦୋକାନ, ବାରିପଦା ପୂର୍ଣ୍ଣଚନ୍ଦ୍ରପୁର ୱାର୍ଡ ନଂ-୨୧ ଓ ମୁର୍ଗାବାଡ଼ିଠାରେ ଥିବା ହୋତା ଏଣ୍ଟରପ୍ରାଇଜର୍ସରେ ଚଢ଼ାଉ କରାଯାଇଛି। କନଷ୍ଟେବଳ ଦଣ୍ଡପାଟ ବର୍ତ୍ତମାନ ମୟୂରଭଞ୍ଜ ଏସ୍ପିଙ୍କ କାର୍ଯ୍ୟାଳୟରେ କାର୍ଯ୍ୟରତ ଅଛନ୍ତି। କିଛିଦିନ ପୂର୍ବରୁ ଚାକିରିରୁ ଅବସର ନେବା ପାଇଁ ଆବେଦନ କରିଥିଲେ। ତେବେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ହେବା ପରେ ଭିଜିଲାନ୍ସ ଚଢ଼ାଉ କରିଛି। ରିପୋର୍ଟ ଲେଖା ହେବା ବେଳକୁ ଚଢ଼ାଉ ଜାରି ରହିଥିବା ବେଳେ ୧ କୋଟି ୨୭ ଲକ୍ଷ ଟଙ୍କାର ସମ୍ପତ୍ତି ଆକଳନ କରାଯାଇଛି।
