ଓ୍ବାଶିଂଟନ,୧୩।୧୦: ସୁଦୂର ଆମେରିକାର ଫ୍ଲୋରିଡା ରାଜ୍ୟରେ ବସବାସ କରୁଥିବା ପ୍ରବାସୀ ଓଡ଼ିଆମାନଙ୍କ ଅନୁଷ୍ଠାନ ‘ଫ୍ଲୋରିଆ’ ପକ୍ଷରୁ ଟାମ୍ପା ସହରରେ ଶାରଦୀୟ ଦୁର୍ଗାତ୍ସୋବର ଭବ୍ୟ ଆୟୋଜନ କରାଯାଇଛି। ସ୍ଥାନୀୟ ଆୟାପ୍ପା ମନ୍ଦିରରେ ଅକ୍ଟୋବର ୧୧ ତାରିଖରୁ ଅକ୍ଟୋବର ୧୬ ତାରିଖ ପର୍ଯ୍ୟନ୍ତ ଦୁର୍ଗାପୂଜାର ବ୍ୟବସ୍ଥା ହୋଇଛି।
ସାଧାରଣତଃ କର୍ମସଂସ୍ଥାନର କଟକଣା ତଥା ବ୍ୟକ୍ତିଗତ ଜୀବନର କାର୍ଯ୍ୟଭାର ଯୋଗୁଁ ବିଦେଶରେ ପୂଜା, ପର୍ବ, ପର୍ବାଣୀ ସପ୍ତାହାନ୍ତରେ ପାଳନ କରାଯାଇଥାଏ। କିନ୍ତୁ ସମସ୍ତ ପ୍ରକାର ପ୍ରତିକୂଳତାକୁ ଏଡାଇ ଫ୍ଲୋରିଆ ପରିବାରର ସଦସ୍ୟମାନେ ତିଥି ଅନୁଯାୟୀ ଏହି ପୂଜା ସଞ୍ଚାଳନ କରୁଛନ୍ତି।
ଓଡିଶାରେ ପ୍ରଚଳିତ ଦୁର୍ଗାପୂଜାର ସମସ୍ତ ପ୍ରକାରର ନୀତିକାନ୍ତିକୁ ଏଠାରେ ପାଳନ କରାଯାଉଛି। ଟାମ୍ପା ନିକଟବର୍ତ୍ତୀ ଅର୍ଲାଣ୍ଡୋ ତଥା ଅନ୍ୟ ସହରରେ ରହୁଥିବା ଅନ୍ୟାନ୍ୟ ପ୍ରବାସୀ ଭାରତୀୟମାନେ ମଧ୍ୟ ଏହି ପୂଜାରେ ବହୁସଂଖ୍ୟାରେ ଯୋଗ ଦେଇଥିବା ‘ଫ୍ଲୋରିଆ’ ପରିବାର ପକ୍ଷରୁ ସୂଚନା ପ୍ରଦାନ କରାଯାଇଛି।
ସ୍ଥାନୀୟ ସରକାରଙ୍କ ସ୍ବାସ୍ଥ୍ୟ ବ୍ୟବସ୍ଥାର ନିୟନ୍ତ୍ରକଙ୍କ ଅନୁସାରେ ଅନୁଷ୍ଠାନ ପକ୍ଷରୁୁ କୋଭିଡ-୧୯ ସଚେତନା ସମ୍ପର୍କିତ ସମସ୍ତ ମାର୍ଗଦର୍ଶିକାକୁ ପାଳନ କରି ଏହି ପୂଜାର ଆୟୋଜନ କରାଯାଇଛି। ଫ୍ଲୋରିଆର ବରିଷ୍ଠ ସଦସ୍ୟମାନଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ଯୁବ ସଦସ୍ୟମାନେ ଏହି ଶାରଦୀୟ ଦୁର୍ଗାତ୍ସୋବକୁ ସୂଚାରୁରୂପେ ସମ୍ପାଦନ କରୁଛନ୍ତି।
ଏହି ପ୍ରକାର ଭବ୍ୟ ଆୟୋଜନ ମାଧ୍ୟମରେ ଓଡିଶାର ପରମ୍ପରା, ଐତିହ୍ୟ ତଥା ବର୍ତ୍ତମାନକୁ ଅନ୍ୟମାନଙ୍କ ପାଖରେ ପହଞ୍ଚାଇବାର ପ୍ରୟାସକୁ ପ୍ରବାସୀ ଭାରତୀୟଙ୍କ ପକ୍ଷରୁ ସ୍ବାଗତ କରାଯାଇଛି।
