କେନ୍ଦୁଝର,୨୬ା୯(ସ୍ବ.ପ୍ର.): କେନ୍ଦୁଝର ସହରର ମଇଳା ଆବର୍ଜନା ଠିକ୍ ଭାବରେ ସଫେଇ ହେଉ ନ ଥିବା ବେଳେ ସହରର ମଇଳା ଆବର୍ଜନା ଠିକ୍ ପରିଚାଳନା ହେଉନାହିଁ। ଫଳରେ ସହରର ପରିମଳ ବ୍ୟବସ୍ଥା ଏକ ପ୍ରକାର ବିପର୍ଯ୍ୟସ୍ତ ହୋଇପଡ଼ିଛି। ଶ୍ମାଶନ ଜମି, ମୁଖ୍ୟ ରାସ୍ତାକଡ଼, ସର୍ବସାଧାରଣ ଲୋକଙ୍କ ଯାତାୟାତ ସ୍ଥାନରେ ମଇଳା ଆବର୍ଜନା ଗଚ୍ଛିତ ରଖାଯାଉଛି। ଫଳରେ ସହର ପରିବେଶ ଅପରିଷ୍କାର ହେଉଥିବା ବେଳେ ବିଶେଷ କରି ବର୍ଷାଦିନରେ ମଇଳା ଆବର୍ଜନା ଚାରିଆଡ଼େ ଭାସିି ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ଏ ନେଇ ବହୁବାର ପୌର ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି। ମାତ୍ର କେହି କର୍ଣ୍ଣପାତ କରୁ ନ ଥିବା ସ୍ଥାନୀୟ ସଂଖ୍ୟା ଲଘୁ ସମ୍ପ୍ରଦାୟ ଲୋକ କହିଛନ୍ତି।
ମୁତାବକ, ସ୍ଥାନୀୟ ଢାଙ୍ଗରପଡ଼ାରେ ମୁଖ୍ୟ ରାସ୍ତାକଡ଼ ଜମିକୁ ସଂଖ୍ୟା ଲଘୁ ସମ୍ପ୍ରଦାୟ ତଥା ସାଧାରଣ ଲୋକେ ୧୯୬୦ ମସିହାରୁ ଶ୍ମଶାନ ଭାବରେ ବ୍ୟବହାର କରୁଛନ୍ତି। ଏଠାରେ ପାଖାପାଖି ୫୦ ଡେସିମିଲ ଜମି ରହିଛି। ଉକ୍ତ ସ୍ଥାନରେ ୬୦ ଜଣ ସଂଖ୍ୟାଲଘୁ ସମ୍ପ୍ରଦାୟ ଲୋକଙ୍କୁ କବର ଦିଆଯାଇଛି। ଏହାର ସୁରକ୍ଷା କରିବା ପରିବର୍ତ୍ତେ ଖୋଦ ପୌରପାଳିକା ଏଠାରେ ଡମ୍ପିଂୟାର୍ଡ କରି ମଇଳା ଆବର୍ଜନା ଜମା କରୁଛି। ଫଳରେ ଧାର୍ମିକ ଭାବନା ପ୍ରତି ଆଘାତ ସୃଷ୍ଟି ହେଉଛି ବୋଲି ସଂଖ୍ୟା ଲଘୁ ସମ୍ପ୍ରଦାୟ ଲୋକେ କହିଛନ୍ତି। ଏଥିସହ ସ୍ଥାନୀୟ ଢାଙ୍ଗରପଡ଼ା ନିକଟରେ ରାସ୍ତା କଡ଼ରେ ଜନବସତି ନିକଟରେ ପୌରପାଳିକା ପକ୍ଷରୁ ନିର୍ମାଣ ହୋଇଥିବା ବ୍ୟୟବହୁଳ ଗୋଦାମ ଘର ତଥା କଂସେଇଖାନା ନିକଟରେ ମଇଳା ଆବର୍ଜନା ଫିଙ୍ଗାଯାଉଥିବାରୁ ପରିବେଶ ବହୁ ମାତ୍ରାରେ ପ୍ରଦୂଷିତ ହେଉଛି। ଆବର୍ଜନା ଯୁକ୍ତ ବିଷାକ୍ତ ପାଣି ବର୍ଷା ଜଳରେ ଭାସି ଯାଇ ବିଲ, ନଦୀ, ନାଳରେ ପଡୁଛି। ଫଳରେ ଡାଇରିଆ, ଡେଙ୍ଗୁ, ମ୍ୟାଲେରିଆ ଭଳି ରୋଗ ବ୍ୟାପିବା ଆଶଙ୍କା ଦେଖା ଦେଇଛି। ସେହିପରି ସହରକୁ ଆସୁଥିବା ପର୍ଯ୍ୟଟକ ଓ ଲୋକମାନେ ଏସବୁ ଦେଖି ସହର ଅବସ୍ଥା ପରଖିବା ସହ ନାକ ଟେକି ଯାତାୟାତ କରୁଛନ୍ତି। ପୌର ପ୍ରଶାସନକୁ ୟୁନିୟନ ବାପ୍ଟିଷ୍ଟ ଚର୍ଚ୍ଚର ସମ୍ପାଦକ ରାଜେନ୍ଦ୍ର ମିଶ୍ରଙ୍କ ନେତୃତ୍ୱରେ ଏକ ଟିମ୍ ପୌର ପ୍ରଶାସନଙ୍କ ନିକଟରେ ଏ ନେଇ ବାରମ୍ବାର ଜଣାଇଥିଲେ ହେଁ ଏହାର ସୁରକ୍ଷା କରାଯାଉ ନ ଥିବାରୁ ଆସୋସିଏଟ ପାଷ୍ଟର ସଲୋମୋନ ଦାସ ଦୁଃଖ ପ୍ରକାଶ କରି କହିଛନ୍ତି।
ସୌନ୍ଦର୍ଯ୍ୟକରଣ ନାମରେ କୋଟି କୋଟି ଟଙ୍କା ବ୍ୟୟରେ ପାର୍କ ନିର୍ମାଣ କରୁଛନ୍ତି। କିନ୍ତୁ ମଇଳା ଆବର୍ଜନା ପରିଚାଳନା କରି ସହରର ସୌନ୍ଦର୍ଯ୍ୟ ବୃଦ୍ଧି କରିବା ନେଇ ଆଗ୍ରହ ପ୍ରକାଶ କରୁ ନାହିଁ। ଶ୍ମଶାନ ଭଳି ଜମିର ସୁରକ୍ଷା କରିବା ପରିବର୍ତ୍ତେ ସେଥିରେ ମଇଳା ଜମା କରିବା ଆଦୌ ଗ୍ରହଣୀୟ ନୁହେଁ ବୋଲି ଭାଜପା ସଂଖ୍ୟା ଲଘୁ ସମ୍ପ୍ରଦାୟର ନେତା ଜଲାଲୁଦ୍ଦିନ ଆକବର କହିଛନ୍ତି।
