ରାଉରକେଲା,୧୪।୧(ଦିନେଶ ମିଶ୍ର)ବିଶ୍ୱସ୍ତରୀୟ ବିର୍ସା ମୁଣ୍ଡା ହକି ଷ୍ଟାଡିୟମ ପଛପଟେ ରହିଛି ସହରର ପ୍ରମୁଖ ଡମ୍ପିଂୟାର୍ଡ। ଏହି ଡମ୍ପିଂ ୟାର୍ଡ ଯୋଗୁ ସ୍ଥାନୀୟ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ଆରଏମ୍ସି କର୍ତ୍ତୃପକ୍ଷଙ୍କ ନିକଟରେ ସ୍ଥାନୀୟ ଲୋକେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଅଭିଯୋଗ ହୋଇଛି।
ରାଉରକେଲା ସହରକୁ ସ୍ବଚ୍ଛ ଓ ସବୁଜ କରିବା ପାଇଁ ପ୍ରଶାସନ ପକ୍ଷରୁ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଜାରି ରହିଛି। ରାତି ପାହିଲେ ସହରର ବାସନ୍ତୀ କଲୋନି, ଛେଣ୍ଡ କଲୋନି, ସିଭିଲଟାଉନଶିପ୍, କୋଏଲନଗର, ରେଲୱେ କଲୋନି, ଡେଲିମାର୍କେଟ, ପାନପୋଷ ଆଦି ଅଞ୍ଚଳରେ ଆର୍ଏମ୍ସି କର୍ମଚାରୀମାନେ ଘର ଘର ବୁଲି ଅଳିଆ ଆବର୍ଜନାକୁ ସଂଗ୍ରହ କରୁଛନ୍ତି। ଏହି ଅଳିଆ ସଂଗ୍ରହ ହେବା ପରେ ଉକ୍ତ ଅଞ୍ଚଳରେ ଥିବା ଡମ୍ଫିଂ ୟାର୍ଡରେ ଗଦା କରାଯାଏ। ପରେ ଆରଏମ୍ସିର ଗାଡ଼ିଗୁଡିକ ଏହି ଅଳିଆ ଆବର୍ଜନା ସଂଗ୍ରହ କରି ଛେଣ୍ଡ ସ୍ଥିତ କଳିଙ୍ଗ ବିହାରରେ ଥିବା ବିଶ୍ୱସ୍ତରୀୟ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମ ପଛପଟ ଡମ୍ପିଂୟାର୍ଡରେ ପକାଇଥାନ୍ତି। ଏହି ଅଳିଆ ଗୁଡିକ ବର୍ଷ ବର୍ଷ ଧରି ଗୋଟିଏ ସ୍ଥାନରେ ଜମା ରହିଥିବାରୁ ଏଠାରେ ଏକ କୃତ୍ରିମ ପାହାଡ ସୃଷ୍ଟି ହେବା ସହ ପଚିଶଢି ଉକ୍ତ ଅଞ୍ଚଳକୁ ପୂତିଗନ୍ଧମୟ କରୁଛି। ଡମ୍ପିଂ ୟାର୍ଡ ନିକଟରେ ରାଉରକେଲା ବିମାନ ବନ୍ଦର, ବିପିୟୁଟି, ହଷ୍ଟେଲ, ଛେଣ୍ଡ ଘରୋଇ ଆଇଟିଆଇ ଆଦି ରହିଛି। ଏହି ଅଞ୍ଚଳ ଦେଇ ଯାତାୟାତ କଲେ ଡମ୍ପିଂୟାର୍ଡର ଅସ୍ବାସ୍ଥ୍ୟକର ପରିବେଶ କୁପ୍ରଭାବ ପକାଇଛି। ବିଶେଷ କରି ବର୍ଷାଦିନେ ଏହି ଡମ୍ପିଂୟାର୍ଡର ଅଳିଆରେ ପାଣି ପଶି ଗନ୍ଧ ହେଉଛି। ଏ ନେଇ ସ୍ଥାନୀୟ ସମାଜସେବୀ ତଥା ଆଇନଜୀବୀ ଆନନ୍ଦ ଚନ୍ଦ୍ର ମହାନ୍ତି କୁହନ୍ତି, ଛେଣ୍ଡ କଳିଙ୍ଗ ବିହାର ସହରର ଏକ ପ୍ରମୁଖ କଲୋନି। ଏହାର ଆଖପାଖ ଅଞ୍ଚଳରେ ବିଶ୍ୱସ୍ତରୀୟ ହକି ଷ୍ଟାଡିୟମ ସାଙ୍ଗକୁ ବିମାନବନ୍ଦର ଓ ବିପିୟୁଟି ଭଳି ବୈଷୟିକ ଶିକ୍ଷାତାଲିମ କେନ୍ଦ୍ର ରହିଛି। ଏଠାରେ ଆରଏମ୍ସି ପକ୍ଷରୁ ତିଆରି ହୋଇଥିବା ଡମ୍ପିଂ ୟାର୍ଡ ଯୋଗୁ ସ୍ଥାନୀୟ ଅଞ୍ଚଳରେ ଅସୁବିଧା ହେଉଛି। ସହରର ସମସ୍ତ ଅଳିଆ ଏଠାରେ ପକାଯାଉଥିବାରୁ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ତେଣୁ ଏହି ଡମ୍ପିଂ ୟାର୍ଡକୁ ଏଠାରୁ ଆରଏମ୍ସି କର୍ତ୍ତୃପକ୍ଷ ଯଥାଶୀଘ୍ର ଅନ୍ୟ ସ୍ଥାନକୁ ସ୍ଥାନାନ୍ତର କରିବାକୁ ମହାନ୍ତି ଦାବି କରିଛନ୍ତି। ସେହିପରି ସମାଜସେବୀ ଅଭିନାଶ ଶୁକ୍ଳା କୁହନ୍ତି, ଏହି ଡମ୍ପିଂ ୟାର୍ଡରେ କୁଢ କୁଢ ଅଳିଆ ସର୍ବଦା ଜମି ରହିଥିବାରୁ ଏଠାରୁ ମଶା, ମାଛି ବଂଶ ସୃଷ୍ଟି ହେଉଛି। ଫଳରେ ସ୍ଥାନୀୟ ଅଞ୍ଚଳର ଲୋକେ ରୋଗରେ ପଡୁଛନ୍ତି। ଏହି ଡମ୍ପିଂୟାର୍ଡରେ ବୁଲାପଶୁ ଗୋଡରେ ଖେଳାଇ ଅପରିଷ୍କାର କରୁଛନ୍ତି। ଅଳିଆଗୁଡିକ ଗୋଟିଏ ସ୍ଥାନରେ ଜମି ରହିଥିବାରୁ ବିମାନବନ୍ଦର ନିକଟ ରାସ୍ତାରେ ଯାତାୟାତ କରିବା ସମ୍ଭବ ହେଉନାହିଁ। ତେଣୁ ଏଠାରେ ଆରଏମ୍ସି ଅଳିଆ ନ ପକାଇଲେ ଜନସାଧାରଣ ଉପକୃତି ହୁଅନ୍ତେ ବୋଲି ସେ କହିଥିଲେ। ଏ ସମ୍ପର୍କରେ ଆରଏମ୍ସି ଉପଆୟୁକ୍ତ ସୁଧାଂଶୁ ଶେଖର ଭୋଇଙ୍କୁ ପଚାରିବାରୁ ସେ କହିଥିଲେ, କଳିଙ୍ଗ ବିହାର ଅଞ୍ଚଳରେ ଥିବା ଡମ୍ପିଂୟାଡି ବିଶ୍ୱସ୍ତରୀୟ ହକି ଷ୍ଟାଡିମୟ ନିର୍ମାଣ ପୂର୍ବରୁ ରହିଛି। ଏଠାରେ ସହରର ସମସ୍ତ ଅଳିଆଆବର୍ଜନା ବର୍ଷ ବର୍ଷ ଧରି ପଡିରହିବାରୁ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଥିବା ନେଇ ଆମ ପାଖରେ ଅଭିଯୋଗ ହୋଇଛି। ଏହାକୁ ଦୃଷ୍ଟିରେ ରଖି ଆମେ ଏଠାରେ ଗହା ହୋଇ ରହିଥିବା ମଇଳାକୁ ସ୍ବଚ୍ଛ କରିବା ପାଇଁ ବର୍ଜ୍ୟବସ୍ତୁ ନିଷ୍କାସନ ପ୍ରକିୟା ମେଶିନ ବସାଇଛୁ। ଏହି ମେଶିନ ସାହାଯ୍ୟରେ ଦିନକୁ ୩ରୁ ୫ କୁଇଣ୍ଟାଲ ବର୍ଜବସ୍ତୁରୁ ଖତ ଓ ପିଚୁ ତିଆରି କରି ସହରର ଉନ୍ନତି କାମ ପାଇଁ ବ୍ୟବହାର କରାଯାଉଛି ବୋଲି ଭୋଇ କହିଥିଲେ।
