ସଜନା ଛୁଇଁ ଆମ ଦେଶର ପ୍ରାୟ ଅଧିକାଂଶ ସ୍ଥାନରେ ମିଳିଥାଏ । ଏହା ଖାଦ୍ୟର ସ୍ୱାଦ ବଢାଇବା ସହ ଶରୀରକୁ ସୁସ୍ଥ ରଖିବାରେ ବି ସହାୟକ ହୋଇଥାଏ । ଯେଉଁମାନେ କୁପୋଷଣର ଶିକାର ହୁଅନ୍ତି ସେମାନଙ୍କୁ ସଜନା ଛୁଇଁ ଖାଇବାକୁ କୁହାଯାଇଥାଏ । ଛୋଟ ପିଲା ଓ ଗର୍ଭବତୀଙ୍କ ପାଇଁ ଏହା ବରଦାନ ବୋଲି କୁହାଯାଏ । ସଜନା ଗଛର ମୂଳ, ଜୁଆଣି, ହେଙ୍ଗୁ ଓ ଶୁଣ୍ଠିରୁ ପ୍ରସ୍ତୁତ କାଢା ପିଇଲେ ଅନେକ ଲାଭ ମିଳିଥାଏ । ଏହା ସାଇଟିକା ଓ ଗୋଡରେ ହେଉଥିବା ଯନ୍ତ୍ରଣାର ଉପଶମ କରିଥାଏ । ଏଥିରେ କ୍ୟାଲିସୟମର ମାତ୍ରା ଅଧିକ ଥିବାରୁ ଏହା ହାଡ ମଜଭୁତ କରିବାରେ ସାହାଯ୍ୟ କରିଥାଏ । ଏହା ବ୍ୟତୀତ ଏଥିରେ ଆଇରନ, ମ୍ୟାଗ୍ନେସିୟମ, ସିଲିୟମ ରହିଛି । ଯେଉଁଥିପାଇଁ ଏହା ମହିଳା ଓ ଶିଶୁଙ୍କ ପାଇଁ ଲାଭଦାୟକ । ଏଥିରେ ଅଧିକ ପରିମାଣର ଜିଙ୍କ ଥିବାରୁ ଏହା ପୁରୁଷମାନଙ୍କ ପାଇଁ ମଧ୍ୟ ଲାଭଦାୟକ ଯାହା ସେମାନଙ୍କ ଦୁର୍ବଳତା ଦୂର କରିଥାଏ । ଆୟୁର୍ବେଦ ମତରେ ସଜନା ପତ୍ରର ଗୁଣ୍ଡ କ୍ୟାନସର ଓ ହୃଦରୋଗୀଙ୍କ ପାଇଁ ଲାଭକାରୀ । ଏହା ରକ୍ତଚାପ କଣ୍ଟ୍ରୋଲ କରିଥାଏ । ପେଟରେ ହୋଇଥିବା ଅଲସର ଚିକିତ୍ସା ପାଇଁ ମଧ୍ୟ ଏହା ବ୍ୟବହାର କରାଯାଇଥାଏ । ସଜନା ଶାଗର ସୁପ୍ ପିଇଲେ ରକ୍ତ ସଫା ହୋଇଥାଏ । ସଜନା ପତ୍ରରେ ତିଆରି ସୁପ୍ ପିଇଲେ ବ୍ରୋଙ୍କାଇଟିସ୍, ଆଜମା ଆଦି ରୋଗ ପାଇଁ ଔଷଧ ଭଳି କାମ କରେ । ସଜନା ଶାଗ ହେଉ ଅବା ଫଳ ମଣିଷ ଶରୀର ପାଇଁ ବେଶ୍ ଉପକାରୀ । ସଜନା ଛୁଇଁରୁ ପ୍ରସ୍ତୁତ ଆଚାର ଓ ଚଟଣି କିଛି ରୋଗରୁ ଉପଶମ ମଧ୍ୟ ଦେଇଥାଏ ।
