୨୦୨୩ ମସିହା ମେ’ ମାସରୁ ମଣିପୁରରେ ‘ମେଇତି’ ଏବଂ ‘କୁକି’ ମଧ୍ୟରେ ଲାଗିରହିଥିବା ଜାତିଆଣ ହିଂସା ଥମିବା ପରିବର୍ତ୍ତେ ଦିନକୁ ଦିନ ଉଗ୍ରରୂପ ନେବା ସହ ‘ଡ୍ରୋନ୍’ ମୋର୍ଟାର ବ୍ୟବହାର ବିବାଦକୁ ନୂଆ ମୋଡ଼ ଦେଇଛି । ଏହା କେବଳ ଦଙ୍ଗାଗ୍ରସ୍ତ ମଣିପୁରରେ ଆଇନ ଶୃଙ୍ଖଳା ପରିସ୍ଥିତିକୁ ଆହୁରି ନିମ୍ନଗାମୀ କରିଛିି, ସମସ୍ୟା ସମାଧାନ କରିବାରେ ଉଭୟ କେନ୍ଦ୍ର, ରାଜ୍ୟ ସରକାର ଏବଂ ସୁରକ୍ଷାକର୍ମୀଙ୍କ ବିଫଳତାକୁ ପ୍ରମାଣିତ କରୁଛି ବୋଲି କହିଲେ ହୁଏତ ଅତିରଞ୍ଜିତ ହୋଇ ନ ପାରେ। ମେଇତି ସମ୍ପ୍ରଦାୟ ଅଧ୍ୟୁଷିତ ଇମ୍ଫାଲ ପଶ୍ଚିମ ଜିଲାର ଏକ ଗ୍ରାମ ଉପରେ ଚରମପନ୍ଥୀଙ୍କ ଡ୍ରୋନ୍ ଆକ୍ରମଣରେ ୨ଜଣଙ୍କର ମୃତ୍ୟୁ ଘଟିବା ସଙ୍ଗେ ୯ଜଣ ଗୁରୁତର ଆହତ ହୋଇଛନ୍ତି। ଡ୍ରୋନ୍ ସହାୟତାରେ ଚରମପନ୍ଥୀମାନେ ବୋମା ମାଡ଼ କରିଥିବା କୁହାଯାଇଥିବାବେଳେ ଏହି ଆକ୍ରମଣରେ କୁକି ସମ୍ପ୍ରଦାୟର ମିଲିଟାଣ୍ଟ ସଂଗଠନ ଭାବେ ପରିଚିତ କୁକି-ଜୋ’ର ହାତ ଥିବା ଅନୁମାନ କରାଯାଏ। ଏହି ଅଞ୍ଚଳରେ କୁକି-ଜୋ’ର ଲୋକଙ୍କ ଉପରେ ମେଇତିର ଉଗ୍ରପନ୍ଥୀ ଗୋଷ୍ଠୀର ଆକ୍ରମଣର ପ୍ରତିଶୋଧ ସ୍ବରୂପ ଡ୍ରୋନ୍ ଆକ୍ରମଣ ହୋଇଥିବା କୁହାଯାଏ। ତେବେ ଏଭଳି ଏକ ଆକ୍ରମଣ ପାଇଁ କୌଣସି ସଂଗଠନ ନିଜକୁ ଦାୟୀ କରି ନ ଥିବାବେଳେ କିମ୍ବା ସ୍ପଷ୍ଟ ଭାବେ କୌଣସି ପ୍ରମାଣ ମିଳି ନ ଥିବାବେଳେ ଡ୍ରୋନ୍ ଆକ୍ରମଣ ଯେ ଜାତିଆଣ ଦଙ୍ଗା ସୃଷ୍ଟିକାରୀଙ୍କ ଏକ ନୂତନ କୌଶଳ ଏହା ସ୍ବୀକାର କରିବାକୁ ହେବ।
ଏହା ନିଃସନ୍ଦେହ ଯେ, ମଣିପୁରରେ ସନ୍ଦିଗ୍ଧ ଉଗ୍ରପନ୍ଥୀଙ୍କ ବୋମାମାଡ଼ ଏବଂ ସୁରକ୍ଷା ବାହିନୀ ଉପରେ ଆକ୍ରମଣ ପାଇଁ ଡ୍ରୋନ୍ ବ୍ୟବହାର ନିଶ୍ଚିତ ଭାବେ ଚିନ୍ତାଜନକ। ଏହି ଡ୍ରୋନ୍ ଆକ୍ରମଣରେ ଅନୁଧ୍ୟାନ ଏବଂ ଏହାର ମୁକାବିଲା ପାଇଁ ଏକ ଉଚ୍ଚସ୍ତରୀୟ କମିଟି ଗଠନ ହୋଇଛି। ଏହା ସତ୍ୟ ଯେ, ବିଶ୍ୱରେ ବିଭିନ୍ନ ଅଞ୍ଚଳରେ ବିବାଦୀୟ ଜୋନ୍ଗୁଡିକରେ ଡ୍ରୋନ୍ ବ୍ୟବହାର ଏବେ ଏକ ସାଧାରଣ ଘଟଣାରେ ପରିଣତ ହୋଇଛି। ୟେମେନର ହୁଟି ଆତଙ୍କବାଦୀ ସଂଗଠନ ଲୋହିତ ସାଗରରେ ଜାହାଜ ଚଳାଚଳକୁ ହାରାଶ କରିବା ପାଇଁ ଡ୍ରୋନ୍ ବ୍ୟବହାର କରିଥିବାବେଳେ ୨୦୨୦ରେ ଆଜରବୈଜାନ ଏବଂ ଆର୍ମେନିଆ ମଧ୍ୟରେ ନାଗୋର୍ଣ୍ଣୋକାରବାଗ ଦ୍ୱିତୀୟ ଯୁଦ୍ଧରେ ଆଜେରି ବାହିନୀ ବ୍ୟାପକ ଡ୍ରୋନ୍ ବ୍ୟବହାର କରିଥିଲେ। ଗତ କିଛିବର୍ଷ ଧରି ଭାରତୀୟ ସୀମାର ପ୍ରକୃତ ନିୟନ୍ତ୍ରଣ ରେଖା (ଏଲ୍ଓସି) ନିକଟରେ ପାକିସ୍ତାନୀ ଡ୍ରୋନ୍ଗୁଡ଼ିକ ବ୍ୟାପକ ଅସ୍ତ୍ରଶସ୍ତ୍ର ଓ ନିଷିଦ୍ଧ ଔଷଧ ବାରମ୍ବାର ପକାଇଥିଲେ, ଯାହାକି ଭାରତ ସରକାର ଏବଂ ଭାରତୀୟ ସେନା ପାଇଁ ମୁଣ୍ଡବିନ୍ଧାର କାରଣ ହୋଇଛି। ମଣିପୁର ଘଟଣାରେ ଡ୍ରୋନ୍ରେ ରାଜ୍ୟ ଅସ୍ତ୍ରାଗାର ଏବଂ ବିଭିନ୍ନ ଥାନାରୁ ଲୁଟ ହୋଇଥିବା ଅସ୍ତ୍ରଶସ୍ତ୍ର, ଗୁଳିଗୋଳା, ବୋମା ଖଞ୍ଜାଯାଇଥିବା ବିଶ୍ୱାସ କରାଯାଉଛି। ତେବେ ମଣିପୁରରେ ଡ୍ରୋନ୍ ଆକ୍ରମଣ ଘଟଣା ୨୦୨୧ରେ ଭାରତ ସରକାରଙ୍କ ଡ୍ରୋନ୍ ନୀତି ଉପରେ କୌଣସି ପ୍ରଭାବ ପକାଇବ ନାହିଁ ବୋଲି ଆଶା କରାଯାଏ। ଡ୍ରୋନ୍ ସହାୟତାରେ ଦେଶର ବିଭିନ୍ନ ହସ୍ପିଟାଲକୁ ଜୀବନ ରକ୍ଷାକାରୀ ଔଷଧ, ରକ୍ତ, କିଡ୍ନୀ, ମାନବ ଅଙ୍ଗ ପଠାଯାଉଛି। ଯାହାକି ଭାରତ ସରକାରଙ୍କ କୋହଳ ନୀତି ଯୋଗୁ ସମ୍ଭବ ହୋଇପାରିଛି। ତେବେ ମାନବ ସମାଜର ଅହିତକର ଓ ଧ୍ୱଂସର ତାଣ୍ଡବ ରଚୁଥିବା ଘଟଣାରେ ଡ୍ରୋନ୍ ବ୍ୟବହାରର ମୁକାବିଲା ପାଇଁ ଏବେ ସମୟ ଉପନୀତ ହୋଇଛି । ମଣିପୁର ହିଂସାକୁ ଇତିମଧ୍ୟରେ ୧୬ମାସ ପୂରିବାକୁ ଯାଉଥିବାବେଳେ କୌଣସି ଫଳପ୍ରଦ ପଦକ୍ଷେପ ଗ୍ରହଣ କରାଯାଇ ନ ଥିବା ମନେହୁଏ। କେବଳ ବ୍ୟାପକ ଅର୍ଦ୍ଧସାମରିକ ବାହିନୀ ଯବାନ ମୁତୟନ ଏବଂ ସିବିିଆଇ ତଦନ୍ତ ନିର୍ଦ୍ଦେଶ ଦେଇ ଉଭୟ କେନ୍ଦ୍ର ଓ ରାଜ୍ୟସରକାର ନିଜର କର୍ତ୍ତବ୍ୟ ସାରିଦେଇଥିବା କୁହାଯାଇପାରେ। ଗଲା ଲୋକ ସଭା ନିର୍ବାଚନରେ ରାଜ୍ୟର ଦୁଇଟି ଯାକ ଆସନରେ ଭାଜପାର ଶୋଚନୀୟ ପରାଜୟ ସତ୍ତ୍ୱେ ଏଥିରୁ ଦଳ କିମ୍ବା ସରକାର କିଛି ଗ୍ରହଣ କରି ନ ଥିବା ମନେହୁଏ। ଯାହାର ପରିଣତି ସ୍ବରୂପ ହିଂସାକାଣ୍ଡ ଉଗ୍ରରୂପ ନେବା ସହ ଦିନକୁ ଦିନ ମୃତ୍ୟୁ ସଂଖ୍ୟା ବଢିଚାଲିଛି। ମଣିପୁରରେ ଶାନ୍ତି ପ୍ରତିଷ୍ଠା ପାଇଁ କେନ୍ଦ୍ର ଓ ରାଜ୍ୟ ସରକାର ବଳିଷ୍ଠ ପଦକ୍ଷେପ ନେବା ଜରୁରୀ। ଅନ୍ୟଥା ପାହାଡିଆ ରାଜ୍ୟର ପରିସ୍ଥିତି ଚରମପନ୍ଥୀ ହାତକୁ ଚାଲିଯାଇପାରେ। ଯାହାର ଜ୍ୱଳନ୍ତ ଉଦାହରଣ ହେଉଛି ଡ୍ରୋନ୍ରେ ବୋମାମାଡ଼।
ଗଙ୍ଗୋତ୍ରୀ ନଗର, ଶିଶୁପାଳଗଡ଼, ଭୁବନେଶ୍ୱର
ମୋ:୯୪୩୭୯୯୪୩୭୯
