ବେଗୁନିଆପଡ଼ା,୧୫।୩(ଡି.ଏନ୍.ଏ.): ରାଜ୍ୟ ସରକାରଙ୍କ ସହ ଆଲୋଚନା ବିଫଳ ପରେ ଓ ଡ୍ରାଇଭର ମହାସଂଘର ନିଷ୍ପତ୍ତି କ୍ରମେ ୧୦ଦଫା ଦାବି ନେଇ ବୁଧବାରଠାରୁ ଅନିର୍ଦ୍ଧିଷ୍ଟ କାଳପାଇଁ ଷ୍ଟିଅରିଂ ଛାଡ଼ ଆନ୍ଦେଳନ ଆରମ୍ଭ ହୋଇଯାଇଛି। ଗଞ୍ଜାମ ଜିଲା କୋଦଳାଠାରେ ଡ୍ରାଇଭରମାନେ ଏହି ବନ୍ଦକୁ ପାଳନ କରିଛନ୍ତି। ତେବେ ସରକାର ପ୍ରମୁଖ ୧୦ଦଫା ଦାବି ନ ମାନିଲେ ଏହି ଆନ୍ଦୋଳନ ଅନିର୍ଦ୍ଧିଷ୍ଟ କାଳ ପାଇଁ ଜାରି ରହିବ ବୋଲି ସେମାନେ କହିଛନ୍ତି। ଶହ ଶହ ଡ୍ରାଇଭର ଏକାଠି ହୋଇ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କରିଛନ୍ତି। କୌଣସି ଅପ୍ରତିକର ପରିସ୍ଥିତିର ମୁକାବିଲା ପାଇଁ ପୋଲିସ ଫୋର୍ସ ମୁତୟନ ହୋଇଥିବା ଦେଖିବାକୁ ମିଳିଛି । କୋଦଳାଠାରେ ଡ୍ରାଇଭର ସଂଘର ଗଞ୍ଜାମ ଜିଲା ସଭାପତି ଓ ରାଜ୍ୟ ଉପସଭାପତି ଯୋଗ ଦେଇଥିଲେ।
ବନ୍ଦ ପାଳନ ଯୋଗୁ କୋଦଳା ଓ ବେଗୁନିଆପଡ଼ା ଅଞ୍ଚଳରୁ ବସ ବ୍ରହ୍ମପୁର ଓ ଭୁବନେଶର ଅଭିମୁଖେ ଯାଇନାହିଁ। ଯାତ୍ରୀମାନେ ନିଜନିଜ ଗନ୍ତବ୍ୟସ୍ଥଳକୁ ଯିବା ପାଇଁ ହନ୍ତସନ୍ତ ହେଉଥିବା ଦେଖିବାକୁ ମିଳିଥିଲା। କୋଦଳା ବସଷ୍ଟାଣ୍ଡ ଖାଁ ଖାଁ ପରିଲକ୍ଷିତ ହୋଇଛି। ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଛନ୍ତି।
ସେପଟେ ଡ୍ରାଇଭରମାନଙ୍କ ଷ୍ଟିଅରିଂ ଛାଡ଼ ଆନ୍ଦୋଳନକୁ ଯଥାର୍ଥତା ଦର୍ଶାଇ ଏହାକୁ ସମର୍ଥନ କରିଛନ୍ତି କୋଦଳା ଏନ୍ଏସିର ପୂର୍ବତନ ଅଧକ୍ଷ ତଥା ବିଜେଡି ନେତା ହରପ୍ରସାଦ ସାହୁ। ସରକାର ଏନେଇ ସଚେତନ ଅଛନ୍ତି। ଖୁବଶୀଘ୍ର ଡ୍ରାଇଭରମାନଙ୍କ ଦାବି ନେଇ ସରକାର ପଦକ୍ଷେପ ନେବେ ବୋଲି ସେ କହିଛନ୍ତି। ଅନ୍ୟପଟେ କୋଦଳା ଏନ୍ଏସି ଅଧ୍ୟକ୍ଷ ତଥା ବିଜେପି ନେତା ସୂର୍ଯ୍ୟ ନାରାୟଣ ନାୟକ ମଧ୍ୟ ଆନ୍ଦୋଳନକୁ ସମର୍ଥନ ଜଣାଇଛନ୍ତି। ସରକାର ଡ୍ରାଇଭରମାନଙ୍କ ଆନ୍ଦୋଳନ ତୁରନ୍ତ ମାନିବା ଉଚିତ ଓ ପଦକ୍ଷେପ ନିଅନ୍ତୁ ବୋଲି ସେ କହିଛନ୍ତି।
